نصايح بنات حوا لأحمر الخدود أو الروجاجو

اعرفي معلومات جديدة كل يوم عن إزاي تحطي احمر الخدود أو الروجاجو, إزاي تختاري المناسب لبشرتك سواء كانت دهنية أو جافة وكمان اختيار الألوان وأكتر.

استخدمي قلم تحديد الشفايف بدل البلاشر

لو عايزة تعملي لون خفيف وطبيعي بالبلاشر او البلاشر اللي عندك خلص, ممكن تستخدمي قلم تحديد الشفايف كبديل للبلاشر باللون اللي تفضليه وترسمي بيه على الخد علامة هاشتاج كبيرة “#” وبعدين افرديها بصوابعك على عضمة الخد وامزجيها كويس على البشرة, هتأدي نفس مهمة البلاشر وفي نفس الوقت هتديكي لوك طبيعي حلو.

حولي فرشة البلاشر لفرشة كونتور !

كلنا عارفين كل مكياج ليه الفرشة الخاصة بيه اللي بتظبطه وبتطلع شكله حلو, وفرشة البلاشر اكيد مختلفة عن فرشة الكونتور فرشة البلاشر بتكون كبيرة والشعر سوا واحد, لكن فرشة الكونتور بتبقى ارفع والشعر بتاعها مايل شوية عشان تظبط رسمة الكونتور على الخد.
طيب لو انتي عايزة ترسمي كونتور ومعندكيش فرشة مخصوص ليه هتعملي ايه ؟ ممكن تستخدمي فرشة البلاشر وتغيري شكلها بحيلة بسيطة اوي هاتي بنسة وحطيها ما بين شعر الفرشة بطريقة مايلة هتديكي شكل فرشة الكونتور وتقدري ترسمي بيها عادي جدا وهيطلع معاكي مظبوط.
استخدمي قلم تحديد الشفايف بدل البلاشر

اعملي كونتور الانف بالشوكة !

كتير مننا مش بيعرفوا يرسموا الكونتور او يظبطوا الخطوط بتاعته كويس على الوش, النهاردة جايبين لكم حيلة سهلة اوي عشان تعملي بيها كونتور الانف ويطلع مظبوط معاكي وهي باستخدام الشوكة ؟! ايوه الشوكة اللي بناكل بيها هنستغلها في رسم الكونتور هنحط الشوكة على الانف والناحية المنحنية او المقوسة هتبقى لجوه على الانف وتجيبي الكونتور ترسمي خط باللون الغامق من فتحات الشوكة من الجنبين واللي في النص ترسمي فيها اللون الفاتح وبعدين تدمجيهم مع بعض بالسبونج, وكده الكونتور يبقى اترسم عندك بطريقة سهلة وسريعة جدا وهيطلع معاكي مظبوط.

اعملي لون طبيعي على خدودك

لو عايزة تعملي لون طبيعي على خدودك او عندك روج وعايزة لون بلاشر زيه ممكن بدل ما تشتري البلاشر تحطي من الروج بسيط جدا على تفاحتين الخد وبعدين تدمجي اللون على البشرة بصوابعك كويس هيديكي لوك حلو وطبيعي اوي .

الطريقة الصح للبرونزر

البرونزر من الحاجات اللي بتدي للوش شكل حلو اوي ومش بس كده كمان بتحدد ملامح الوش وبتبرزها, لكن عشان يدينا النتيجة المطلوبة لازم نوزعه بشكل صح على الوش, تعالوا نعرف مع بعض بالخطوات ازاي نحط البرونزر صح .

1- اول حاجة اختيار درجة لون البرونزر لازم يكون اغمق بدرجة او درجتين من لون بشرتك الطبيعي عشان يظهر ملامح الوش اجمل.

2- البرونزر ميتحطش على الوش كله ولكن بيتوزع على مناطق معينة بس في الوش اللي هي عايزين نبرزها زي الانف وعضمة الخدين.

3- لو احنا لابسين مفتوح مننساش نحط البرونزر على خط الرقبة عشان ميبقاش لون الوش والرقبة مختلفين عن بعض.

4- الطريقة الصح لتوزيع البرونزر هو كانك بترسمي رقم 3 على الوش وانتي بتحطي البرونزر يعني تبدأي الاول على الجبين, وبعدين عضمة الخدين, وبعدين الدقن.

إزاي تحولي البلاشر البودر لبلاشر كريمي بطريقة سهلة؟

البلاشر الكريمي ممتاز لأصحاب البشرة العادية والجافة, شكله بيبان طبيعي أكتر وبيدي لمعة ونضارة للبشرة ده غير انه بيدوم وقت اطول..
عشان تحولي تحولي البلاشر البودر لبلاشر كريمي, هتستعملي كريم مرطب تحطي كمية منه في كف اديك وبعود قطن هتخدي شوية من البلاشر البودر وتحطيه علي الكريم وتمزجيهم بصباعك, كده إنتي عملتي البلاشر الكريمي بتاعك :)