4 وصفات طبيعية لعلاج شحوب البشرة

اوقات كتير بتمر علينا بنحس ان بشرتنا شاحبة وباهتة وده ممكن يحصل بسبب الارهاق, او في وقت الدورة الشهرية, او بسبب الدايت, والنهاردة هنقولكم على 3 وصفات بسيطة لعلاج شحوب وبهتان البشرة وهتساعد على توريد ونضارة البشرة.

ماسك البيض وزيت الزيتون:

اخلطي 2 معلقة صغيرة خميرة مع صفار بيضتين, ومعلقتين عسل, ومعلقتين كريمة, و 1/2 معلقة خل التفاح, و 2 معلقة زيت زيتون, امزجيهم مع بعض كويس, وبعدين ادهني البشرة كلها بالخليط, سيبيه لمدة 20 دقيقة, وبعدها دلكيه بالراحة على البشرة واغسليه بمية فاترة.

ماسك عصير البرتقان والعسل:

اخلطي 3 معالق عسل نحل مع عصير 1/2 برتقانة, دفي الخليط شوية على حمام مية سخنة لحد ما العسل يدوب, لما يبرد شوية وبشرتك تقدر تستحمله افرديه على وشك, وسيبيه 15 دقيقة وبعدين اغسليه بمية فاترة, كرريه 3 مرات في الاسبوع.

ماسك الفراولة والعسل:

اهرسي 100 جرام فراولة وضيفي لها معلقة صغيرة عسل نحل ومعلقة صغيرة عصير ليمون, اخلطيهم مع بعض كويس وبعدين افرديه على البشرة وسيبيه 10 دقايق وبعدها اغسليه بمية فاترة.

ماسك اللبن:

اخلطي 3 معالق صغيرة عسل نحل مع معلقتين لبن, قلبيهم مع بعض كويس وادهني البشرة بالخليط, سيبيه لمدة من 10 – 15 دقيقة, وبعدين اغسليه بمية فاترة, وفي الاخر امسحي البشرة بقطنة فيها مية ورد.