حيلة بسيطة لكن فعالة للتخلص من الهالات السودا بسرعة
لان البشرة المحيطة بالعين بتكون حساسة، فالافضل تعتمدي لعلاج المشكلة دي على الحلول الطبيعية بدل من المنتجات الكيميائية.
العلاج ١: زيت الارجان
خدي كمية من زيت الارجان على راحة ايدك، وباستخدام صوباعك البنصر وزعي الزيت تحت العين، ودلكيه لمدة من دقيقتين لتلات دقايق، كرري العملية دي يوميا للحصول على افضل النتايج.
زيت الارجان بيحتوي على خصائص مضادة للشيخوخة، وبيساعد على التخلص من الهالات السودا بشكل سريع جدا، كمان بيحتوي على خصائص مضادة للاكسدة بتساعد على ازالة الشوائب وتنقية البشرة، كمان بيحتوي على فيتامين E اللي بيساعد في التخلص من الهالات السودا.
العلاج ٢: العسل
وزعي كمية صغيرة من العسل تحت العين، ودلكيه بحركات دائرية مرة باتجاه عقارب الساعة ومرة عكس اتجاه عقارب الساعة، كرري العملية دي مرتين في اليوم، وممكن كمان تسيبيه على البشرة طول الليل.
العسل بيحتوي على خصائص مضادة للبكتيريا والالتهابات، بالاضافة لخصائص مضادة للشيخوخة.
العلاج ٣: زيت الخروع
وزعي كمية من زيت الخروع تحت العين، وسيبيه لمدة ١٥ دقيقة او طول الليل، كرري العملية دي مرتين في اليوم.
زيت الخروع بيساعد على تجديد البشرة والتخلص من الهالات السودا، كمان بيحتوي على خصائص مضادة للاكسدة بتساعد على تقوية البشرة وازالة الشوائب في وقت قياسي.
نصايح للتخلص من الهالات السودا:
- اشربي كمية كافية من الماية، للحفاظ على ترطيب البشرة.
- نامي ٨ ساعات يوميا على الاقل، لتجنب ظهور انتفاخات العين والهالات السودا.
- كلي اطعمة صحية، زي السلطات الطازة، البقوليات، الزبادي، واللبن غير المعالج.
- قللي من الملح، لانه بيأدي لجفاف الجسم.
- لو بتقعدي قدام الشاشة فترة طويلة، استخدمي نضارات واقية او عدسات مضادة للانعكاس لحماية عينيكي.
- اتجنبي اكل الوجبات السريعة قدر الامكان.
- حاولي تقليل كمية السكر في نظامك الغذائي.
- واظبي على ممارسة تمارين العين بانتظام.
