١٠ نصايح لعلاقات صحية
العلاقات الصحية بتزود من سعادتنا، وبتحسن صحتنا، وبتقلل من التوتر، والدراسات اظهرت ان الاشخاص اللي بتربطهم علاقة صحية بيتمتعوا بقدر اكبر من السعادة ومستويات اقل من التوتر، وعلى الرغم من اختلاف كل علاقة عن التانية، الا انه في اسس عامة للوصول لعلاقة صحية، والنصايح دي بتنطبق على كل انواع العلاقات، سواء كانت صداقات، او علاقات في بيئة العمل، او علاقات عائلية، او علاقة عاطفية.
1- حافظي على توقعات واقعية:
مافيش حد هنلاقيه زي ما بنتمنى او زي ما راسمين في خيالنا، والعلاقات الصحية معناها تقبل الاخرين زي ما هما، من غير ما نحاول نغيرهم.
2- اتكلموا مع بعض:
- التواصل عنصر اساسي لبناء علاقات صحية.
- خصصوا وقت كافي، وكونوا حاضرين بصدق في اللحظة.
-اسمعوا بعض باهتمام حقيقي، واتجنبوا المقاطعة او التفكير في الكلام اللي هتقولوه وتردوا بيه على بعض، حاولوا استيعاب وجهة نظر الطرف التاني تماما.
- اسألوا واظهروا اهتمامكم من خلال السؤال عن تجارب الاخرين، ومشاعرهم، وارائهم، واهتماماتهم.
- شاركوا المعلومات، الدراسات اظهرت ان تبادل المعلومات بيساعد على بناء العلاقات، عرفوا اللي حواليكم عن نفسكم، ولكن من غير مبالغة في الكشف عن تفاصيل شخصية كتير في وقت بدري اوي من العلاقة.
3- خليكي مرنة:
طبيعي انك تحسي بعدم ارتياح من التغييرات، ولكن العلاقات بتديكي فرصة للتغيير والنمو والنضج، فضروري تكوني مرنة مع التغييرات.
4- اهتمي بنفسك:
العلاقات الصحية قايمة على التبادل، وان يبقى في مساحة للطرفين.
5- خليكي جديرة بالثفة:
لو عاملة خطة معينة مع شخص ما، يبقى كمليها، لو تحملتي مسئولية حاجة كمليها للاخر، لان العلاقات الصحية بتحتاج اطراف جديرة بالثقة وقد كلامها.
6- اختلفي بانصاف:
كل العلاقات بيحصل فيها خلافات، وده معناه انكم بس مختلفين على موضوع معين او في وجهة نظر معينة، ومش معناه بالضرورة ان مافيش مودة او حب بينكم.
- هدي اعصابك قبل ما تتكلمي، في اي خلاف هتكون المحادثة اكتر فاعلية لو عملتيها لما تهدي مشاعرك شوية مش في لحظة العصبية، عشان ماتقوليش حاجة تندمي عليها بعد كده.
- استخدمي “صيغ التعبير عن الذات” (جمل تبدأ بـ “انا”) عبري عن مشاعرك واللي انتي عايزاه من غير توجيه اتهامات او افتراض دوافع للطرف التاني، على سبيل المثال، قولي “لما مش بتتصل بيا، بحس انك مش مهتم بيا” بدل ما تقولي “انت مش بتتصل بيا ابدا لما بتكون بعيد، واضح اني الوحيدة اللي مهتمة بالعلاقة دي”.
- خلي لغتك واضحة ومحددة، حاولي توصفي التصرف اللي بيضايقك وصف واقعي، مع تجنب الانتقاد واصدار الاحكام، ركزي على علاج المشكلة، مش على مهاجمة الطرف التاني.
- ركزي على المشكلة الحالية، الخلاف ممكن يكبر لو قولتي كل اللي بيضايقك مرة واحدة، “جبتي القديم والجديد”، اتجبني استخدام كلمات زي “دايما” او “ابدا” واتكلمي عن كل مشكلة لوحدها.
- اتحملي مسؤولية اخطائك، لو غلطتي اعتذري، لان ده هيقطع شوط طويل لحل الامور.
- اعرفي ان مش كل المشاكل ممكن تتحل بسهولة، مش كل الخلافات او الصعوبات قابلة للتسوية، انتوا شخصين مختلفين، قيمكم ومعتقداتكم وعاداتكم وشخصياتكم مش هتبقى متوافقة دايما، ورغم ان التواصل بيلعب دور جوهري واساسي في زيادة التفاهم وعلاج المخاوف والمشاكل، الا انه بتبقى في امور متجذرة بعمق مش بتتغير بشكل ملموس، عشان كده لازم تحددي بنفسك ايه اللي ممكن تتقبليه، وتقدري تعرفي امتى العلاقة تبقى غير صحية بالنسبة لك.
7- قدمي التعزيز الايجابي:
حسب الدراسات، الازواج السعداء بشكل اكبر، هما اللي بيعبروا عن مشاعرهم الايجابية اكتر، وبيعبروا عن حبهم ومشاعرهم بشكل اكبر.
8- حافظي على توازن حياتك:
مهما كنا مرتبطين بالطرف التاني وبينا حب وتفاهم، فهو مش هيلبي كل احتياجاتنا، عشان كده لازم يكون ليكي اهتمامات خاصة، العلاقات الصحية هي اللي كل طرف فيها بيسيب قدر من المساحة الخاصة للتاني.
9- العلاقات الصحية بتحتاج وقت:
التعرف على الناس وبناء علاقات صحية معاهم بيحتاج وقت، بالاضافة انه مهارات تكوين علاقات صحية هي حاجات ممكن تتعلميها وتمارسيها، وقابلة للتطور والتحسن باستمرار مع الخبرة.
10- خليكي على طبيعتك:
لما تكوني صادقة مع نفسك اسهل بكتير واكتر متعة من التظاهر بانك شخص تاني او حاجة مختلفة عن شخصيتك الحقيقة، العلاقات الصحية بتقوم على اشخاص حقيقيين.
