١٠ طرق لانقاص الوزن بأقل مجهود

التغييرات البسيطة في اسلوب حياتك ممكن تأدي لنتايج ملموسة وعميقة، وتخلصك من الوزن الزيادة بأقل مجهود، والنهاردة هنشارك معاكم ١٠ طرق بسيطة لفقدان الوزن.

1- اشربي ماية اكتر:

الماية مفيدة لاسباب كتير، اول حاجة وجود الماية في المعدة بيدي شعور بالامتلاء، وده بيمنع الجوع، ورغم ان ده مش بيأدي لفقدان الوزن بشكل مباشر، الا انه بيقلل من احتمالية اكل وجبات خفيفة بين الوجبات الرئيسية، وده بدوره هيقلل من اجمالي السعرات الحرارية اليومية، بالاضافة ان في اشخاص كتير بيلاقوا صعوبة في التمييز بين اشارات الجوع واشارات العطش اللي بيبعتها الجسم، في كتير من الاوقات لما بنحس بالجوع، بيكون الجسم في الحقيقة محتاج للماية بس، ولو الجسم اخد الماية اللي محتاجها، الاحساس بالجوع هيختفي.

٢- وقفي شرب الصودا والعصاير:

المشروبات الغازية وعصاير الفاكهة والقهوة المحلاه بتحتوي على سعرات حرارية فارغة كتير، على سبيل المثال، علبة الكولا بتحتوي على ١٤٠ سعرة حرارية، وكوباية الموكا فرابتشينو الكبير بتحتوي على اكتر من ٤٠٠ سعرة حرارية.

بالنسبة لكتير من الاشخاص، ممكن توصل السعرات الحرارية اللي بتدخل جسمهم من المشروبات بس لحد ١٠٠٠ سعرة حرارية يوميا، وحتى لو بتشربي ٢٠٠ سعرة حرارية بس، فهي بتتراكم في الجسم، عشان كده لما هتقللي من المشروبات دي في نظامك الغذائي، هتفقدي وزن بسرعة.

٣- ممارسة التمارين اثتاء فترات الراحة:

ممارسة التمارين هي المفتاح الحقيقي لفقدان الوزن على المدى الطويل وبشكل دائم، ولكن بما اننا في موضوعنا بنعتمد على الطرق البسيطة لانقاص الوزن، مش هنقولك لازم تروحي جيم وتضغطي على نفسك في التمارين.

بس خلال استراحة الشغل، ممكن تعملي شوية تمارين ضغط، او تمارين القفز، او المشي في المكان حواليكي او حوالين المبنى، هي طرق بسيطة لحرق بعض السعرات الحرارية وتنشيط الدورة الدموية، والدراسات اثبتت ان فترات النشاط البدني المكثف حتى لو كانت قصيرة لمدة ١٠ دقايق بس، هتساهم في تعزيز عملية الحرق طول اليوم.

٤- كلي سلطة يوميا:

حتى لو مش هتعملي اي تغييرات تانية في نظامك الغذائي، اكل طبق سلطة كبير يوميا هيديكي فوايد كتير، هتزود جسمك بكميات وفيرة من الفيتامينات والمعادن والالياف الغذائية، بالاضافة انها هتخليكي تحسي بالشبع، وبطبيعة الحال لازم تختاري سلطة صحية خالية من اللحوم والاجبان، واتجنبي اضافة كميات كبيرة من الصوصات الدسمة او قطع الخبز المحمص، وممكن تخلي الصوص في طبق منفصل بحيث تاخدي مع كل معلقة سلطة كمية صغيرة من الصوص، وتتحكمي في الكمية اكتر.

٥- كلي حبوب كاملة والياف اكتر:

الاطعمة الغنية بالالياف بتساعد على الشعور بالشبع بشكل اسرع، وده معناه استهلاك سعرات حرارية اقل.

عشان تضيفي الياف اكتر لنظامك الغذائي، اتجنبي الاطعمة المكررة او المصنعة واستبدليها بالحبوب الكاملة، الفواكه، الخضروات، البقوليات، مش صعب انك تحولي لاكل المكرونة المصنوعة من الحبوب الكاملة، او الخبز الكامل، او الارز البني، وبينصح للنساء ٢٥ جرام من الالياف يوميا، وللرجال ٣٨ جرام، جربي تزودي حصتك من الالياف وهتلاحظي ازاي ان الوزن الزيادة بدأ يختفي.

٦- كلي اكتر وجبات معمولة في البيت:

طبيعي الاكلات اللي معمولة في البيت بتكون صحية اكتر من وجبات المطاعم، وجبات المطاعم غالبا بتكون غنية بالدهون والزيوت وعالية السعرات الحرارية ومليانة بالملح، ومن ناحية تانية في مسألة التحكم في حجم الوجبات، في المطعم غالبا هتاكلي وجبة اكبر بكتير من اللي بتاكليها في البيت، كمان الاعتماد على الوجبات المنزلية هيخليكي تتحكمي بشكل افضل في اجمالي العناصر الغذائية اللي هتدخل جسمك، وجمع كل العناصر دي مع بعض هيبقى وسيلة بسيطة لفقدان الوزن.

٧- كلي وجبات خفيفة صحية:

السناكس عادة بتكون غنية بالسكر والدهون والملح، وهي مصدر واضح للسعرات الحرارية، وفي حين انه الافضل عدم اكل سناكس خالص، الا انه اكل سناكس صحية هو تغيير بسيط تقدري تعمليه، بدل ما تاكلي شيبسي او جرانولا، كلي تفاحة او مكسرات وزبيب او بعض اعواد الجزر، السناكس دي بتحتوي على سعرات حرارية اقل وتغذية اكتر والياف اكتر.

٨- ما تتجاهليش وجبة الفطار:

وجبة الفطار عنصر مهم واساسي لتحقيق فقدان وزن دائم، لانها بتساعد على تنشيط عملية الحرق الصبح، وده هيأدي لحرق سعرات حرارية اكتر على مدار اليوم، وهيمنعك من الاحساس بالجوع الشديد على نص اليوم والاتجاه للسناكس غير الصحية.

٩- نضفي اسنانك بالفرشة والخيط بعد الوجبة:

نصيحة بسيطة بتعتمد فكرتها على الجانب النفسي مش على التأثير الجسدي المباشر، تنضيف الاسنان بالفرشة والخيط بعد الوجبة بيبعت اشارة للمخ بان وقت الاكل انتهى، وحتى لو ده محصلش، فانتي من نفسك مش هتروحي تاكلي وجبة خفيفة تاني عشان ما تضطريش تغسلي اسنانك تاني، بالاضافة كمان ان طعم الحاجة بيتغير بعد غسل الاسنان بسبب طعم المعجون في الفم.

١٠- النوم:

اجسامنا بتحتاج من ٧ - ٨ ساعات نوم يوميا، النوم عدد ساعات قليلة اوي او عدد ساعات زيادة اوي بيأدي لمجموعة آثار سلبية، وواحد منها هو زيادة الوزن.

اول حاجة الحرمان من النوم بيأدي لتغيير الطريقة اللي الجسم بينظم بيها الشهية، نقص النوم هيأدي لزيادة الشهية عن معدلها الطبيعي، كمان قلة النوم بتخلي الشخص يميل لاكل الاطعمة الغنية بالدهون والكربوهيدرات، كمان نقص النوم بيأثر على عملية الحرق في الجسم، وده معناه ان الجسم هيحرق عدد اقل من السعرات الحرارية على مدار اليوم.