طرق للتخلص من ذباب الفاكهة ومنع رجوعه

ذباب الفاكهة من المشاكل الشائعة المزعجة، هتلاقيه دايما حوالين الفاكهة الطازة زي الموز وغيره من الفواكه والخضروات، او حوالين حوض المطبخ، اوحوالين سلة الزبالة، والنهاردة هنشارك معاكم افضل الطرق للتخلص من ذباب الفاكهة بفعالية، ومنع رجوعه تاني.

سبب وجود ذباب الفاكهة:

ذباب الفاكهة بينجذب للفواكه والخضروات الطازة او المتعفنة، عشان كده ضروري تحافظي على نضافة المطبخ من بقايا الاكل، احرصي دايما على نضافة رخامات المطبخ، وتنضيف الارضيات بالمكنسة (العادية او الكهربائية) بانتظام، وحفظ الفواكه والخضروات في التلاجة لتقليل تعرضها للهوا.

ذباب الفاكهة بينجذب كمان للمواد المتخمرة، وبيتكاثر في الاماكن الضلمة والرطبة زي مصارف الاحواض، وسلة الزبالة، وجرادل المسح.

طريقة للتخلص من ذباب الفاكهة:

للتخلص من ذباب الفاكهة، جربي المحلول ده.

هاتي طبق صغير او كوباية امليها خل تفاح وضيفي له كام نقطة من سائل غسيل الاطباق، وغطي الخليط بغلاف بلاستيك، واعملي فيه اخرام، وحطيه جنب مكان انتشار ذباب الفاكهة، الذباب هينجذب للريحة وهيقع في الخليط.

وفي خلال يوم واحد هتلاحظي وجود عدد كبير من ذباب الفاكهة ميت على سطح السائل، واحرصي على تغيير السائل بشكل يومي لحد ما تتخلصي من كل الذباب.

او ممكن تفكري في استخدام جهاز “ZEVO” الكهربائي لصيد الحشرات الطايرة، هو عبارة عن جهاز بيتوصل بالكهربا وبيخلصك من مشكلة الحشرات.

طرق الوقاية من ذباب الفاكهة:

- اغسلي الفاكهة بالماية الجارية

لما تشتري الفاكهة والخضار، اغسليهم كويس قبل تخزنيهم.

وذباب الفاكهة بينجذب دايما للماية الراكدة، عشان كده ضروري تجففي الاحواض، واماكن الاستحمام واي اماكن تانية ممكن يتجمع فيها ذباب، واحرصي دايما على تصليح اي انابيب بتسرب وعلاج المناطق اللي ممكن تكون الماية بتتجمع فيها.

- اغسلي الفاكهة والخضروات بالخل:

غسل الفاكهة والخضروات بمحلول الخل هيحافظ عليها طازة فترة اطول، وهيساعد على الوقاية من ذباب الفاكهة، ولتحضير المحلول ده، اخلطي مقدارين من الماية مع مقدار واحد من الخل ورشي الخليط على الفاكهة والخضار، وسيبيه شوية وبعدين اشطفيه بالماية.

- ركبي سلك على الشبابيك:

تركيب سلك على الشبابيك والابواب فكرة فعالة لمنع دخول مختلف انواع الحشرات، ومنع ذباب الفاكهة.

نضفي مكانك:

اعمال التنضيف المنزلية البسيطة هتساعد في السيطرة على ذباب الفاكهة، احرصي دايما على تنضيف الاسطح والرخامات، نقل الفاكهة اللي استوت اوي للتلاجة، التخلص من الزبالة بانتظام، تنضيف حوض المطبخ بانتظام لمنع تجمع الحشرات حواليه.