٨ مفاتيح لزواج ناجح

اي زواج زي ما في لحظات حلوة في صعوبات، ولكن برغم الصعوبات ايه اللي بيخلي الزواج يستمر والطرفين يحافظوا على الحب بينهم؟ هو ده اللي هنعرفه مع بعض النهاردة هنشارك معاكم بعض المباديء لزواج ناجح.

1- ما تحطيش الزواج في مكانة مثالية:

كل زواج بيمر بتحديات ومشاكل وصعوبات، وفي بداية الجواز ممكن تفكري انكملازم تكونوا مثال الناس تعمل زيه، ولكن مع الوقت هتكتشفي ان الناس مش محتاجين يشوفوا جواز خالي من العيوب او مثالي، ولكن محتاجين يشوفوا ان الزوجين دول مروا بصعوبات ومع ذلك مستمرين ولسه بيحبوا بعض رغم العيوب والمشاكل وازاي بيواجهوا المشاكل ويتعلموا منها.

٢- عاملي شريك حياتك بالطريقة اللي بتتمني يعاملك بيها:

فكري دايما في نتايج كلامك وافعالك، اسألي نفسك دايماتحبي يتكلم معاكي ازاي، او يعاملك ويهتم بيكي ازاي، واعملي اللي انتي بتتمني يتعملك.

خليكي دايما شخص لطيف، مش بتنتقدي طول الوقت، مش بتعاتبي على كل كبيرة وصغيرة، خليكي دايما رحيمة، هتلاقي الحياة بقت اسهل بكتير، اعملي مجهود، وهتلاقي الحياة بتردلك ده واكتر، العطاء هيترد لك عطاء اكبر، والكرم بيولد كرم.

٣- اعترفوا باختلافاتكم وخليكوا مستعدين للتنازل لبعض:

شريك حياتك مش نسخة طبق الاصل منك، لازم تتعلموا تتعايشوا مع اختلافاتكم، بدل التركيز على مدى اختلافك عن شريك حياتك، فكري في الحاجات المشتركة بينكم، وخليكوا مستعدين تتنازلوا عن حاجات بتحبوها عشان بعض.

٤- افتكري دايما ان الصداقة العميقة هي مفتاح الود:

العلاقة الحميمية مش هي بس مفتاح العلاقة الزوجية القوية، ولكن لازم تكونوا اصحاب قبل اي حاجة، والاصحاب في الطبيعي بيعملوا ايه؟ بيقضوا وقت مع بعض، بيعملوا اي حاجة بيحبوها سوا، وبيستمتعوا بحياتهم، وده اللي لازم تكون عليه العلاقة بين الزوج والزوجة.

٥- حبي من غير قيد او شرط:

الطريقة الوحيدة اللي ممكن من خلالها تحبي شريك حياتك من غير تحفظ او شروط انك تخلي ربنا في مركز علاقتك، ده هيخليكي تهتمي بشريكك من غير ما تتوقعي اي حاجة في المقابل، لانه في اللحظة اللي هتتوقفي فيها في الاعتماد على ربنا عشان يساعدك في نجاح زواجك، هي اللحظة اللي هيسيطر فيها قانون الانانية على حياتكم، وهتكون النتيجة في النهاية فشل الزواج.

٦- ماتفكريش انك اكبر من الغلط:

اي انسان في الدنيا ممكن يغلط، وعشان الغلط يعدي لازم اللي غلط يعترف بغلطه وتسامحوا بعض، لان المكابرة في الغلط هيزود المشكلة وهيكبرها اكتر.

٧- حبوا بعض من غير مطالب:

لما الزوجين بيفرضوا قواعد على بعض، زي مثلا “دي مسؤوليتك مش مسؤوليتي” او “انا قومت بدوري، ودلوقتي جيه دورك” غالبا ده بيعكس فقدان للحميمية بينكم، ومتخصصين العلاقات بيقولوا كل ما كانت العلاقة اكتر ود وحميمية، قلت القواعد اللازمة لتنظيمها.

الحب الحقيقي مش محتاج مطالب، الطرفين مش بيحاسبوا بعض مين بيعمل حاجات اكتر، في البيت اللي فيه زوجين بيحبوا بعض كل واحد بيشوف حاجة محتاجة تتعمل بيعملها.

انتوا الاتنين المفروض تتشاركوا في كل حاجة مثلا هو بيحضر الترابيزة للاكل انتي بتغسلي الاطباق، تعملوا الاكل سوا، انتي تغسلي الستاير هو يعلقها، تتسوقوا مع بعض، لازم المشاركة دي تكون موجودة.

٨- اصرفوا على قد الامكانيات المتاحة:

اختاروا اسلوب الحياة المناسب مع دخلكم، بلاش يكون في مصاريف في حاجات مالهاش لازمة ممكن تدخلكم في مشاكل مالية وده هينعكس على علاقتكم، عيشوا الحياة اللي تتناسب مع الموجود عشان تعيشوا حياة هادية اكتر.