بودر طبيعي لتعزيز الكولاجين
الجسم بيبني الكولاجين من الاحماضالامينية و ٣ عوامل مساعدة هما فيتامين سي، والزنك، والنحاس، ونقص اي عنصر منهم هيأدي لتباطؤ انتاج الكولاجين، والبودر اللي معانا النهاردة بيحتوي على الـ ٣ عناصر الاساسية دي.
المكونات:
- ١/٢ كوباية من بذور السمسم.
- ١/٢ كوباية من بذور القرع.
- ١/٤ كوباية من بذور عباد الشمس.
- ١/٤ كوباية من بذور الكتان.
- ١/٤ كوباية كاجو.
- ١/٢ كوباية لوز.
- ١/٤ كوباية عين جمل.
- ٣ معالق كبيرة املا بودر.
- معلقة صغيرة قرفة بودر (اختياري).
الكمية دي تكفي لتحضير حوالي ٣٠٠ جرام، تكفي شخص واحد لمدة شهر تقريبا.
طريقة التحضير:
- حمصي كل مكون لوحده في طاسة، ابدأي بتحميص السمسم على نار هادية لمدة دقيقتين لتلات دقايق، وبعدين بذور القرع لمدة ٣ - ٤ دقايق، وبذور عباد الشمس لمدة دقيقتين، وبذور الكتان لمدة دقيقة واحدة بس على نار هادية، واللوز والكاجو وعين الجمل بيحتاجوا لتحميص من ٥ - ٦ دقايق على نار هادية مع التقليب المستمر.
- افردي كل مكون في طبق وسيبيه يبرد تماما، بعدها اطحني البذور والمكسرات الاول، وبعدين ضيفي القرفة والاملا البودر واضربيهم مع بعض مرة كمان.
- وممكن تنخلي الخليط على منخل للتخلص من اي كتل والحصول على قوام بودر ناعم.
- واحفظي الخليط في برطمان زجاجي محكم الغلق، وخزنيه في التلاجة لمدة اقصاها ٤ اسابيع.
طريقة الاستخدام:
خدي من الخليط معلقة واحدة كبيرة يوميا.
ضيفيها لكوباية لبن دافي كل يوم بالليل، او للبن الرايب الصبح، او امزجيها مع عصير الموز، ولكن اللبن الدافي هو انسب حاجة لان الدهون بتساعد على امتصاص فيتامين E.
وضيفي الخليط للبن وهو دافي، لان الحرارة العالية بتفقد جزء كبير من فيتامين C وهو المكون الاكتر فعالية في المكونات.
ولو امكن كلي حاجة طازة غنية بفيتامين C زي برتقانة، جوافة، عصير ليمونة في كوباية ماية دافية.
