٧ نصايح لترطيب الشعر الجاف
سواء كنتي بتعاني من جفاف الشتا او بسبب استخدام الحرارة او التجعد والهيشان بسبب الرطوبة والحر، فالترطيب المناسب هيرجع لشعرك صحته من تاني، والنهاردة هنشارك معاكم ٧ نصايح لترطيب الشعر بشكل طبيعي من غير استخدام مواد كيميائية او اي منتجات شعر غالية.
1- اغسلي شعرك بماية فاترة:
لو بتستخدمي ماية سخنة لغسل الشعر، لازم تغيري ده لان الماية السخنة بتزيل الزيوت الطبيعية من شعرك، وده بيأدي لجفافه وتلفه، عشان كده لازم تغسلي الشعر بماية فاترة لمنع الجفاف والخشونة، الماية الفاترة بتساعد على تنضيف فروة الراس مع الحفاظ على رطوبة شعرك، واتجنبي كمان غسل الشعر يوميا لان الغسيل المتكرر بيزيل الزيوت الطبيعية اللي محتاجها الشعر عشان يفضل رطب، كفايه تغسليه مرتين او تلات مرات في الاسبوع.
2- استخدمي شامبو وبلسم مرطبين:
لو بتستخدمي منتجات للعناية بالشعر بتحتوي على الكبريتات والسيليكون والبارابين، ده هيأدي لشعر جاف وتالف وعشان تتجنبي ده اختاري شامبو وبلسم بيحتوي على مكونات زي الجلسرين وحمض الهيالورونيك والزيوت الطبيعية زي زيت الارجان او زيت جوز الهند وزبدة الشيا، اللي بتساعد على الاحتفاظ بالرطوبة، اتأكدي من استخدام البلسم بعد كل غسله مع التركيز على نص الشعر والاطراف.
3- جربي ماسك ترطيب عميق:
للحصول على ترطيب اضافي، استخدمي ماسك ترطيب للشعر مرة واحدة في الاسبوع، هيوفرلك ترطيب وتغذية مكثفة للشعر وهتقلل من التجعد والهيشان وهتحسن مرونة الشعر، لانه ماسكات الترطيب العميق بتحتوي على مكونات غنية زي الكيراتين, حمض الهيالورونيك, البروتينات والزيوت اللي بتساعد على استعادة ترطيب الشعر الجاف والتالف، حطي ماسك الترطيب بعد غسل شعرك وسيبيه من ٢٠ لـ ٣٠ دقيقة وبعدين اشطفيه.
4- استخدمي سيروم مغذي للشعر:
السيرومات اتصممت بشكل خاص عشان تحبس الرطوبة في الشعر وتوفر حماية اضافية ضد عوامل الجو، بعد غسل الشعر بالشامبو والبلسم، حطي سيروم مغذي ومرطب على الشعر الرطب، مع التركيز على الاطراف، اختاري سيروم بيحتوي على زيوت مغذية زي زيت الجوجوبا او زيت الارجان.
5- اتجنبي ادوات تصفيف الشعر بالحرارة:
من اهم نصايح ترطيب الشعر تقليل استخدام ادوات التصفيف بالحرارة، زي السيشوار والمكوى، لانها بتأدي لفقدان الرطوبة وده بيخلي الشعر جاف ومعرض للتكسر، عشان كده اتجنبي استخدامها بقدر الامكان وسيبي شعرك ينشف في الهوا بشكل طبيعي، ولو مضطرة تستخدمي الحرارة اتأكدي من استخدام سبراي او سيروم واقي من الحرارة قبل استخدامها، هيساعد على تكوين حاجز بين الحرارة والشعر، وبيمنع فقدان الرطوبة وبيقلل التلف.
6- احرصي على قص اطراف الشعر بانتظام:
في العادة اول حاجة بتتعرض للتلف هي اطراف الشعر، وقص الشعر بانتظام امر ضروري للحفاظ على صحة شعرك، لانه بيزيل التقصف وبيمنع التكسر وبيساعد على تعزيز نمو الشعر بشكل صحي، حاولي قص اطراف شعرك كل ٦ لـ ٨ اسابيع حسب حالته وطوله.
7- ضيفي احماض اوميجا ٣ الدهنية ومضادات الاكسدة لنظامك الغذائي:
جنب روتين العناية بالشعر التركيز على النظام الغذائي مهم جدا للحفاظ على صحة شعرك، العناصر الغذائية الاساسية زي اوميجا ٣ الدهنية الموجودة في اطعمة زي السالمون, بذور الكتان والجوز، بتغذي فروة الراس وبتعزز ترطيبها، والاطعمة الغنية بمضادات الاكسدة زي التوت, السبانخ, والكرنب بتساعد على حماية الشعر من التلف وتعزيز صحة فروة الراس بشكل عام، وجنب الاطعمة دي احرصي على شرب ما لا يقل عن ٧ لـ ٨ كوبايات ماية يوميا للحفاظ على ترطيب شعرك.
