تأثير وضع الاسبرين مع كريم البشرة!
ممكن تكوني سمعتي عن استخدام الاسبرين للبشرة وانه مفيد لنضارتها، النهاردة هنشارك معاكم وصفة الاسبرين مع كريم البشرة وتأثيرها الفعلي على بشرتك.
ليه الاسبرين فعال للبشرة؟
الاسبرين هو عبارة عن حمض اسيتيل ساليسيليك، وده نفس المكون الموجود في معظم علاجات حب الشباب، والمقشرات الكيميائية، وسيرومات مكافحة الشيخوخة.
فوايد حمض الساليسيليك:
بيزيل خلايا الجلد الميتة (تقشير كيميائي).
بيحتوي على خصائص مضادة للالتهابات وده بدوره بيقلل الاحمرار.
بيفتح المسام وبينضفها بعمق.
تفتيح البقع الغامقة واثار حب الشباب بمرور الوقت.
طريقة استخدام الاسبرين:
المكونات:
من ٢ لـ ٣ اقراص اسبرين عادي غير مغلفة، كام نقطة من الماية العادية او ماية الورد، الكريم المرطب العادي بتاعك.
طريقة التحضير:
اطحني الاسبرين باستخدام ضهر المعلقة لحد ما يبقى بودر ناعم، ضيفي له من ٣ لـ ٤ نقط من الماية العادية او ماية الورد وسيبيها لمدة ٣٠ ثانية لحد ما تتكون عجينة، وامزجي كمية صغيرة (حوالي ١/٢ معلقة صغيرة) لكريم البشرة بتاعك، ووزعي الخليط على بشرتك، وسيبيه من ١٠ لـ ١٥ دقيقة لو هتستخدميه كماسك، او استخدميه ككريم ليلي وسيبيه طول الليل واغسليه الصبح بالماية الفاترة، وبعدين حطي مرطب عادي.
كرريه من مرتين لتلات مرات في الاسبوع كحد اقصى، لان استخدامه يوميا خصوصا لو بشرتك حساسة ممكن يأدي للجفاف والتقشر والتهيج.
ماسك الاسبرين:
لو عايزة علاج مركز اكتر بدل من مزجه مع الكريم المرطب، استخدمي الماسك ده مناسب للبشرة الباهتة والمسام المسدودة.
المكونات:
٣ اقراص اسبرين غير مغلفة، ومعلقة صغيرة من العسل، وكام نقطة من عصير الليمون (اختياري, واستغني عنه لو بشرتك حساسة).
اطحني الاسبرين وضيفي له كمية كافية من الماية لتذويبه، وبعدين امزجي معاه العسل، ووزعي الخليط على البشرة وسيبيه من ١٠ لـ ١٢ دقيقة وبعدين اغسليه.
العسل بيرطب البشرة، والاسبرين بيقشرها، والليمون بيساعد على تفتيح البشرة.
مين المفروض مايستخدمش الاسبرين؟
لو بتعاني من حساسية من الاسبرين.
لو بتستخدمي اي منتجات ريتينول او احماض الفا هيدروكسي قوية او حمض الساليسيليك بوصفة طبية.
لو بتعاني من الاكزيما او الوردية او بشرتك حساسة اوي، اختبري الوصفة على الذراع من جوه لمدة ٢٤ ساعة، لو ماظهرش اي احمرار او تهيج تقدري تستخدميه على بشرتك.
لو بشرتك جافة تقدري تستخدميه، ولكن ضروري ترطبي بشرتك كويس بعد كل استخدام.
ايه اللي تتوقعيه وامتى:
بعد الاستخدام الاول للاسبرين هتلاحظي نعومة واشراقة للبشرة، وده ناتج عن ازالة طبقة خلايا الجلد الميتة.
بعد اسبوعين لتلات اسابيع من الاستخدام المنتظم (مرتين لتلات مرات في الاسبوع)هيساعد على تقشير البشرة، وده هيقلل من البقع الغامقة، وتنضيف المسام المسدودة.
بعد ٤ اسابيع الاحمرار والبقع هتبدأ تقل وملمس البشرة هيبقى متجانس اكتر.
لو لاحظتي تقشر او جفاف مفرط في الاسبوع التالت، قللي الاستخدام لمرة واحدة في الاسبوع.
