5 حيل هتساعدك على التخلص من دهون البطن العنيدة بسرعة

التخلص من دهون البطن العنيدة ممكن تشوفي انها مهمة مستحيلة ، ولكن الحقيقة انتي تقدري تتخلصي منها بعمل تغييرات بسيطة على اسلوب حياتك ، والنهاردة هنشارك معاكم 5 حيل بسيطة هتساعدك على التخلص من دهون البطن بسرعة.

1- الجريب فروت:

الجريب فروت بيحتوي على سعرات حرارية منخفضة ومليان بالالياف ، وده هيساعدك انك تحسي بالامتلاء وهيقلل من احتمالية الافراط في الاكل ، بالاضافة انه بيحتوي على مركبات زي النارينجين ، واللي بتساعد على تحسين حساسية الانسولين ، وهو عامل مرتبط بتخزين دهون البطن ، ومؤشره الجلوكوزي المنخفض هيساعد على استقرار مستويات السكر في الدم ومنع الارتفاعات اللي ممكن تأدي لتخزين الدهون حوالين منطقة الخصر والبطن.

حاولي تدخلي الجريب فروت في نظامك الغذائي يوميا.

2- خل التفاح:

خل التفاح بيحتوي على حمض الاسيتيك ، واللي بيرتبط بتقليل تخزين الدهون وتقليل الشهية ، من خلال تعزيز الشعور بالشبع ، خل التفاح ممكن يساعدك على تناول سعرات حرارية اقل طول اليوم ، بالاضافة انه هيساعد على تثبيت مستويات السكر في الدم ، وده بدوره هيمنع ارتفاع الانسولين اللي بيساهم في تخزين الدهون في منطقة البطن.

ضيفي من 1 – 2 معلقة كبيرة من خل التفاح لكوباية ماية واشربيها قبل الوجبة ، وممكن كمان تضيفي خل التفاح للاكل او للسلطة مع زيت الزيتون.

3- التنضيف بالفرشة الجافة:

الفرشة الجافة بتساعد على تحفيز تدفق الدم والتصريف الليمفاوي ، وده بيقلل من احتباس الماية وبيخلي البطن مسطحة ، كمان بتساعد على تسريع عملية فقدان الدهون في منطقة البطن ، وسهل جدا انك تضيفي الفرشة الجافة لروتينك اليومي ، ولكن للحصول على نتايج دايمة مارسي معاها تمارين رياضية بانتظام واتباع نظام غذائي صحي.

4- تمرين الفاكيوم:

تمرين الفاكيوم او تفريغ البطن سهل التنفيذ ، كل اللي محتاجاه كام دقيقة بس ومساحة للوقوف او الجلوس او التمدد ، التمرين ده بيساعد على تنشيط العضلة المستعرضة للبطن ، وهي العضلة البطنية العميقة اللي بتدعم العمود الفقري وبتمسك معدتك ، من خلال تقوية العضلة دي ، تمارين تفريغ البطن هتساعد على تحسين وضعية الجسم ، وتسطيح بطنك.

5- لف البطن:

لف البطن تعتبر طريقة شائعة بتساعد على تقليل احتباس الماية مؤقتا ، وبتساعد على تنحيف البطن بشكل بسيط ، ولكن مش بتحل محل ممارسة التمارين الرياضية بانتظام واتباع نظام غذائي متوازن.