5 خطوات في روتينك الصباحي للحصول على بشرة متوهجة ونضرة بسهولة
في معتقد او فكرة ان كل ما استخدمنا منتجات اكتر هيبقى مفيد لبشرتنا بشكل اكبر ، ولكن الحقيقة ان العناية بالبشرة بتعتمد بطريقة بسيطة على استخدام عدد اقل من المنتجات اللي بتحقق اقصى قدر من الفوايد ، والطريقة دي مش بتوفر الوقت والفلوس بس ، ولكن كمان بتقلل من خطر تهيج البشرة بسبب الافراط في استخدام منتجات كتير على بشرتك ، من خلال التركيز على الخطوات الاساسية ، والمكونات المفيدة ، اللي هتحافظ على صحة ونضارة بشرتك بسهولة ، والنهاردة هنشارك معاكم 5 خطوات في روتينك الصباحي لتحقيق ده.
1- تنضيف لطيف للبشرة من غير ماية:
ابدأي يومك باستخدام غسول لطيف لازالة اي شوائب او زيوت زيادة اتراكمت على البشرة طول الليل ، دوري على غسول بيحتوي على مكونات طبيعية زي البابونج او الصبار ، اللي بيساعد على تهدئة البشرة وترطيبها من غير ما يجردها من حاجز الرطوبة الطبيعي.
وواحدة من مدونات الجمال بتقترح استخدام الطريقة الفرنسية للعناية بالبشرة ، واللي بتتلخص في الاساس في عدم الافراط في التنضيف ، وان تخطي غسل الوش الصبح بيساعد في الحفاظ على نعومة البشرة وتوازنها ، والطريقة دي بتتبعها الممثلة "سلمى حايك" وبتقول ان هي سبب نضارة وشباب بشرتها ، وبدل استخدام الغسول بدأت في استخدام ماء ميسيلار كل يوم الصبح ، وده ادى لتجديد بشرتها بشكل فعال من غير ما تجردها من زيوتها الطبيعية.
2- تونر لموازنة درجة الحموضة:
التونر والايسنس يعتبروا من المكونات الاساسية لاي روتين للعناية بالبشرة في كوريا ، التونر متصمم لموازنة مستويات الاس الهيدروجيني للبشرة ، والايسنس بيوفر الترطيب للبشرة ، والمنتجين مع بعض بيساعدوا على تعزيز قدرة البشرة على امتصاص علاجات العناية بالبشرة اللي هتتحط بعدهم ، وده هيأدي لبشرة مشرقة وممتلئة.
- التونر المرطب: بيساعد على الحفاظ على توازن رطوبة البشرة من غير ازالة الزيوت الطبيعية ، دوري في التونر على مكونات زي حمض الهيالورونيك او الجليسرين للحفاظ على بشرتك ناعمة ورطبة طول اليوم.
من خلال دمج الخطوة دي في روتينك اليومي ، هتحافظي على بشرتك مشرقة وصحية بسهولة.
- تونر التقشير: خبراء العناية بالبشرة بينصحوا باستخدام تونر تقشير لنوع بشرتك للحصول على نتايج مثالية ، بالنسبة للاشخاص اللي بشرتهم دهنية ، بيوصى باستخدام تونر التقشير من 1 – 3 مرات في الاسبوع للمساعدة في التحكم في الزيوت الزيادة ومنع ظهور البثور ، اما اصحاب البشرة العادية يستخدموا التونر ده 1 – 2 مرة في الاسبوع للحفاظ على بشرة متوازنة ، اما لو بشرتك جافة او حساسة الافضل استخدام تونر التقشير مرة واحدة في الاسبوع او كل اسبوعين لتجنب التهيج والحفاظ على حاجز الرطوبة الطبيعي لبشرتك.
3- سيروم صباحي بمضادات الاكسدة:
فيتامين سي يعتبر من افضل مكونات تفتيح البشرة ومضادات الاكسدة ، عشان كده خلي من اولوياتك انك تدخلي فيتامين سي في روتين العناية بالبشرة الصباحي ، وعشان تكملي تركيز الترطيب استخدمي كمان سيروم حمض الهيالورونيك ، كل يوم الصبح بدلي ما بين سيروم فيتامين سي وسيروم حمض الهيالورونيك لضمان الحفاظ على بشرتك مشرقة ورطبة.
4- مرطب لتثبيت الخطوات اللي فاتت:
لو مافيش قدامك اختيارات غير منتج واحد تعتمدي عليه لبشرتك فاكيد هيكون هو المرطب ، المنتج ده مافيش غنى عنه مش بس للترطيب ، ولكن كمان بيحسن ملمس البشرة وبيقلل ظهور التجاعيد ، من خلال حبس الرطوبة بشكل فعال ، مرطب الوش بيقفل على كل العناصر المغذية من الخطوات السابقة زي التونر والسيروم ، ده مش بس بيزود من فعالية روتين العناية بالبشرة كله ولكن كمان بيحافظ عى بشرتك مشرقة وصحية ، حتى في اكتر البيئات الصعبة.
5- استخدمي عامل حماية من الشمس لا يقل عن 50SPF:
واقي الشمس بعامل حماية بحد ادني 50 SPF يعتبر من المتطلبات الاساسية في روتين العناية بالبشرة ، اختاري تركيبة كريمية مش بتسيب اثر ابيض على البشرة ، وبيتم امتصاصه بسهولة ومناسب تحت المكياج.
