8 علامات هتساعدك تعرفي جودة الجينز كويسة ولا لا
كلنا عندنا في دولابنا اكتر من بنطلون جينز بموديلات مختلفة ، لانه مريح وسهل تنسيقه مع اي ملابس تانية ، ولكن ضروري ان الجينزتكن جودته كويسة عشان يقعد معاكي فترة طويلة ، والنهاردة من خلال موضوعنا هنشارك معاكم علامات تدوري عليها في البنطلون تقولك ان الجينز ده جودته كويسة ولا لا.
1- اللون الداخلي متطابق مع اللون الخارجي:
الجينز اللي جودته كويسة المفروض يكون لونه من جوه اغمق من اللون اللي بره ، وده بيرجع ان النسيج المستخدم في الجينز بتكون الخيوط الخارجية بتاعته هي الملونة او غامقة ، وخيوط الجنب التاني بتكون بيضا او افتح ، وبالتالي لو لقيتي الجينز اللونين متطابقين ، ده علامة تقولك ان الجينز جودته سيئة.
2- تقفيل سيء للخياطات:
بصي كويس على تقفيل خياطات الحواف ، في الجينز عالي الجودة ، هتكون الخياطة ناعمة وشكلها انيق ومتخيطة في النص وهيتم تخييط كل حافه لوحدها ، لكن الجينز اللي جودته سيئة غالبا بيتخيط الحافتين مع بعض ، وبالتالي المكان ده بيبقى سميك اكتر ، وبيكون مش مريح في اللبس.
3- مصنوع من القطن الخالص:
الجينز الطبيعي بيكون نسيج متين جدا ، ومع ذلك هو مش خالي من العيوب ، اول حاجة الجينز بيكش بعد الغسلة الاولى ، تاني حاجة بياخد وقت طويل عشان يبقى اكتر نعومة وياخد شكل جسمك.
عشان كده بيتم حل المشكلة دي باستخدام الليكرا او البوليستر او الاسباندكس ، وده مهم بشكل خاص للبنات اللي بيحبوا الموديلات الضيقة ، وعادة الجزء الامثل للمادة المرنة بيكون بين 0.5 – 3% ، ولو كانت اعلى ، بيبقى في احتمال ان الجينز يتمدد بسرعة ويفقد شكله.
4- مافيش مسامير على الجيوب:
كلنا ممكن نشوف ان القطع المعدنية على الجينز على انها عناصر زخرفية ، ولكن في الواقع ، المسامير دي موجودة لسبب ، بيتم تثبيتها في اماكن التآكل المتزايدة لتقوية القماش وزيادة متانة الجينز.
ولازم تكون المسامير عملية ، مش مجرد قطعة متثبة على القماش وخلاص ، بالاضافة كمان لازم تنتبهي للمادة المصنوعة منها ، لو المعدن باهت وشكله رخيص ، في احتمال ان المسامير تتآكل بمرور الوقت وتتلف الجينز بسرعة.
اما لو بنطلونك مافيش فيه مسامير خالص ، ماتقلقيش بصي بس على زوايا الجيوب ، لو مستخدم فيها خياطة متقطعة معززة بدل المسامير ، ممكن نعتبر الجينز ده كمان عالي الجودة ومتين ، ولكن لو مافيش تعزيز للخياطة في الزوايا ، دي علامة ان جودته سيئة.
5- طبقات ضعيفة:
جودة الخياطات ممكن تحدد مدى متانة الجينز ، لازم تكون قوية وخالية من اي خيوط بارزة ، لازم تبصي كويس على الجوانب والجيوب.
وتعتبر الخياطة المزدوجة او السلسلة هي الاقوى ، لو اختارتي الجينز بخياطة واحدة ، اتأكدي ان الخيط قوي وسميك بدرجة كافية.
وفي طريقة تانية للتأكد من الخياطات وهي ببساطة شدها ، لو سمعتي صوت طقطقة القماش او شوفتي الخيوط بتتفرق من بعض وانتي بتشديها ، دي علامة اكيدة ان الجينز جودته سيئة ، وفي الغالب الجينز مش هيدوم فترة طويلة لو بتلبسيه كل يوم.
6- قماش ناعم:
ممكن الموضوع ده يكون مش منطقي ، ولكن المفروض ان الجينز مايكونش ناعم ومريح عند تجربته لاول مرة ، وده لان الجينز عالي الجودة بيحتاج وقت على ما يتمدد وياخد شكل جسمك.
لو الجينز من البداية ناعم ومريح اوي ، فاحتمال انه يكون مش مصنوع من خامة جودتها كويسة.
7- عدد مش كفاية من حلقات الحزام:
لو متعودة على لبس الجينز مع الحزام ، الافضل تحسبي عدد حلقات الحزام ، المفروض يكون في 5 حلقات على الاقل ، والا البنطلون مش هيبقى متثبت كويس على وسطك وهينزل لتحت وانتي لابساه.
وعشان الجينز يبقى اقوى ، المصنعين بيستخدموا "حلقات الحزام المزدوجة" بتكون في حلقة اصغر تحت الحلقة الكبيرة ، والتصميم ده بيكون امتن ، وده بيسمح انك تلبسي عليه احزمة بأحجام مختلفة بشكل مريح.
8- عدد ونوعية الجيوب:
في الجينز اللي جودته رديئة غالبا الجيوب بتتحط للزينة بس ، ومستحيل يتحط اي حاجة فيها لانها بتبقى صغيرة اوي ، وحتى لو قدرتي تحطي حاجة فيها هتبقى مكلكعة وشكلها مش حلو ، حاولي تحطي تليفونك او مفاتيحك او محفظتك في الجيوب وشوفي هيبقى شكلها ايه.
كمان انتبهي لعدد الجيوب ، عادة بيكون في 4 جيوب ، 2 قدام و 2 ورا ، ومع ذلك الجينز اللي فيه 5 جيوب يعتبر كلاسيكي ، والجيب الخامس بيكون عبارة عن جيب صغير جوه واحد من الجيوب الامامية ، ولكن حاليا الجيب ده مالوش اي استخدام عملي ، ولكن وجوده يبين ان الشركة المصنعة مهتمة بالتفاصيل.
