11 فكرة عقاب مبتكرة للاطفال عشان يتعلموا من اخطائهم
في حين ان كل الاباء بيبقوا عايزين ولادهم يتعلموا السلوك المقبول اخلاقيا واجتماعيا ، ولكن من الطبيعي ان الاطفال بيعملوا غلطات ، ولما الاطفال بيغلطوا بتحسي غالبا بالارتباك في رد الفعل واللي المفروض تعمليه وايه التصرف الصح او الغلط معاهم ، وتمشي على تربية صارمة ولا سهلة ، تبقي متسلطة ولا مرنة ، وفي طرق كتير لتربية الطفل ، وطرق التربية بتلعب دور مهم في تعزيز علاقة صحية بين الوالدين والطفل ، وواحدة من الاسئلة اللي بتواجه اي ام واب هو اذا كان مقبول معاقبة الطفل ، ولو الاجابة اه ، اي هي العقوبة البناءة للاطفال ، مش لازم دايما تكون العقوبة صارمة ، زي مثلا منعهم من المدرسة ، او الغاء مصروفهم لمدة اسبوع ، الحقيقة ، ان اساليب التصحيح السلوكي القاسية او تعديل السلوك القاسي ممكن يسبب ضرر اكتر ما ينفع ، بدل كده ، الافضل ان العقوبات تكون ابداعية وتعليمية ، والنهاردة من خلال موضوعنا هنشارك معاكم افكار ابداعية للعقاب لمساعدة اطفالك على التعلم من اخطائهم.
العقوبات القاسية والجسدية لتأديب الطفل هتأدي لمزيد من السلوكيات غير المرغوبة هيبقى ليها آثار سلبية دايمة على صحتهم العقلية والبدنية ، عشان كده الافضل تستخدمي اساليب تأديب فعالة لمساعدة طفلك على فهم السلوكيات المناسبة من غير ما تأذية.
وحسب الدراسات ان الاشخاص اللي بيتعرضوا للضرب بشكل منتظم او من وقت للتاني هما اكتر عرضة لاظهار سلوك عدواني والتعرض للاضطراب العاطفي على المدى الطويل ، والضرب ممكن يأدي لتحسن سلوك الطفل على المدى القصير بس ، ولكن نادرا انه يساعد الاطفال على تحسين سلوكهم على المدى الطويل.
افضل 11 فكرة مبتكرة لعقاب اطفالك:
العقوبات الابداعية بتساعد الاطفال على فهم اخطائهم وتساعدهم على التحرك في الاتجاه الصحيح ، من غير ما يحسوا بالاذى او الاذلال ، والشكل ده من اشكال العقاب اسمه التعزيز الايجابي ، وده بيقلل من احتمالية تكرار السلوك السلبي في المستقبل.
1- جربي ال Time in بدل ال Time out:
اطلبي من طفلك انه يجرب حاجات ابداعية اثناء فترة "ال time out” وده هيخليها تتحول ل "time in” ، لان تقييد الاطفال ممكن يدفعهم للتمرد ، وده مش هيساعد في تصحيح سلوكهم.حددي عقوبات زي انهم يعملوا اي حاجة يدوية ، او تنضيف اوضتهم او رف كتبهم ، او يكملوا اي مهام ناقصة عندهم.
2- خلي الطفل يقضي وقت مع نفسه:
لو طفلك عمل حاجة غلط في البيت ، اسمحي له يخرج في وقت فراغة ويهدي اعصابه ، ممكن يطلع يتمشى او يجري حوالين البيت شوية ، ولو عنده حيوان اليف ممكن تسيبيه ياخده معاه ، واكيد ده هيبقى حسب سنه يسمح بده او لا.
3- تعديل وقت النوم:
في بعض الاحيان ، ممكن تعدلي وقت نوم طفلك بشكل مباشر حسب طريقة تصرفه طول اليوم ، لو الطفل كان شقي وعايزة تعاقبيه ، ممكن تقدمي ميعاد نومه بخمس او عشر دقايق او اي وقت تحسي انه صح.وفي المقابل الايام اللي بيعمل فيها سلوكيات كويسة ، ممكن تديه وقت اكبر للعب كمكافأة ، الحاجات دي ممكن تساعدهم على تعلم الانضباط الذاتي.
4- خليه يحضر ترابيزة العشا:
لو طفلك ماجاش يقعد في وقت العشا المحدد ، على الرغم من تنبيهه اكتر من مره ، خليه هو يحضر الترابيزة ، ده مش بس هيغرس فيه الاحساس بالمسؤولية ، ولكن كمان هيبين له ان في عواقب لافعاله.
5- قوة الممارسة:
لو اطفالك بيعانوا من مشاكل في المدرسة بسبب واجباتهم المنزلية ، او واجبات معمولة غلط ، او خطهم مش حلو ، اتأكدي من حصولهم على قدر كافي من التدريب في البيت ، بدل معاقبتهم او توبيخهم.انسخي الواجبات كذا نسخة ، وخليهم يكرروها ويدربوا عليها في البيت.وخليهم ياخدوا وقت اضافي لتحسين خط ايديهم.
6- خليه يمسك لسانه:
لو طفلك استخدم كلمة سيئة او شتيمة ، خليه يمسك لسانه بالمعنى الحرفي للكلمة.اطلبي منه يخرج لسانه ويمسكه بصوابعه لمدة دقايق.
7- العمل التطوعي:
في كل مرة طفلك يخرج من اوضته ويسيب وراه كركبة وفوضى او ينسى يكمل حاجة معينة ، اديه مهمة يعملها.ممكن تخليه ينشف الاطباق بعد غسيلها ، او يغسل الاطباق ، يحضر ترابيزة الاكل ، يسقي النباتات ، يطبق الغسيل ، اختاري اي حاجة مناسبة لسنه.
8- منطقة خالية من القتال:
لو اطفالك اتخانقوا مع بعض لاي سبب ، اعملي منطقة في البيت سميها منطقة خالية من القتال ، ده شكل من اشكال التعلم التعزيزي اللي هيعلم اطفالك الحدود.خليهم مثلا يقصوا اي صور مفضلة ليهم من المجلات القديمة ، ويلزقوها في مكان معين في البيت ، والقاعدة هي انهم مش هينفع يتخانقوا قدام الصور دي.
9- حددي الوقت:
لو اطفالك مش بيسمعوا الكلام من اول مرة او بياخدوا وقت طويل عشان يخلصوا حاجة طلبتيها منهم ، اظبطي تايمر ، بدل ما تقولي لهم خلصوا ده في خلال نص ساعة مثلا ، اظبطي التايمر جنبهم وقولي لهم انه لو رن قبل ما يخلصوا هتحرميهم من بعض الحاجات اللي بيحبوها.
10- خليهم يختاروا عقوبتهم:
اطلبي من اطفالك يكتبوا عقوبات ابداعية على قطع ورق صغيرة وطبقيها وحطيها في علبة او برطمان ، في كل مرة يعمل حاجة غلط ومحتاجة تعاقبيه ، اطلبي منه يختار ورقة من البرطمان ويعمل اللي مكتوب عليها ، ده هيساعد طفلك انه يحس انه جزء من العملية.
11- حرمانهم من امتيازاتهم:
- حرمانهم من بعض الامتيازات زي مواعيد اللعب ، او وقت مشاهدة التليفزيون ، او برامجهم المفضلة ، عشان يعرفوا عواقب السلوك السيء.
- وحرمان طفلك من الامتيازات اللي مش مهمة بالنسبة له مش هيكون فعال ، عشان كده لازم تقرري بعناية ايه الامتياز اللي هتحرميه منه ونتيجة حرمانه منه هتكون فعالة.
- ولازم تطبقي ده بشكل معتدل عشان تحافظي على فعاليته ، الاستخدام المتكرر للعقاب على الفاضي والمليان هيقلل من تأثيره ، والعقوبة تكون في نفس يوم السلوك السيء.
في الاخر لما طفلك يهدى ، ممكن تطلبي منه انه يفكر في تصرفاته ويشوف اذا كان الاعتذار امر ضروري في الحالة دي ، وافكار العقاب هنا هي لتأديب اطفالك بطريقة مناسبة من غير اذلال ليهم ، وكمان بتساعدهم على الاستفادة بشكل افضل من وقتهم.والخبراء بينصحوا بشرح القواعد, واعطاء الاهتمام ، والثناء على السلوكيات الايجابية لطفلك ، لان ده هيساعد على تأديب الطفل بكفاءة ، يعني زي ما بتعاقبيهم على الغلط ، كافئيهم كمان على الحاجات الكويسة.
