وصفة الفراخ بالثوم والعسل في الفرن
قطع الفراخ المقرمشة المخبوزة في الفرن مع صوص العسل والصويا والثوم ، وصفة تحضيرها سهل وسريع ، ممكن تقدم مع الارز الابيض او المكرونة ، تابعي معانا واتعرفي على الطريقة بالخطوات.
المكونات:
للفراخ:
- 8 شرايح (800 جرام) من اوراك الفراخ.
- 3 معلقة كبيرة دقيق.
- ¼ معلقة صغيرة ملح.
- ¼ معلقة صغيرة فلفل اسود.
- ½ معلقة صغيرة ثوم بودر.
- ½ معلقة صغيرة بابريكا.
- 2 معلقة كبيرة زيت.
صوص العسل والثوم:
- 1 معلقة كبيرة خل ابيض.
- 1 معلقة كبيرة صويا صوص.
- 1 معلقة كبيرة دقيق.
- 80 مل ( 1/3 كوباية) شوربة فراخ.
- 1 معلقة كبيرة زبدة غير مملحة.
- 4 فصوص ثوم مفرومين.
- 110 جرام ( 1/3 كوباية) عسل.
للتقديم:
- ارز ابيض او ارز مقلي بالبيض.
- بصل اخضر مفروم.
طريقة التحضير:
1- سخني الفرن على درجة حرارة 190 درجة مئوية مع المروحة.
2- هاتي الفراخ قطعيها قطع صغيرة بحجم اللقمة وخليها على جنب.
3- في طبق اخلطي الدقيق, الملح, الفلفل الاسود, الثوم البودر, والبابريكا.
4- حطي الفراخ في خليط الدقيق والتوابل ، واخلطيها كويس واتأكدي ان كل قطع الفراخ اتغطت كلها كويس.
5- حطي الفراخ في صينية فرن كبيرة في طبقة واحدة ، حاولي ماتحطيش الفراخ فوق بعض ، كل ما زادت المساحة كل ما الفراخ بقت مقرمشة اكتر.
6- دخلي الفراخ الفرن في الرف اللي فوق لمدة 15 دقيقة.
7- اثناء الوقت ده حضري الصوص ، في طبق ضيفي الخل, الصويا صوص, الدقيق ، وقلبيهم مع بعض كويس ، وبعدين ضيفي لهم شوربة الفراخ تكون دافية, الزبدة, الثوم, والعسل ، خلي الخليط على جنب لحد ما الزبدة تدوب في بسبب الشوربة الدافية.
8- خرجي الفراخ من الفرن ، وصبي عليها الصوص بس حطيه حوالين الفراخ مش فوقيها عشان ماتفقدش قرمشتها ، ودخلي الصينية الفرن مرة تانية لمدة 10 – 12 دقيقة ، لحد ما الصوص يبدأ يغلي.
9- خرجي الصينية من الفرن وقلبي الفراخ في الصوص لحد ما قطع الفراخ تتغطي كلها بالصوص.
10- زينيها بالبصل الاخضر المفروم ، وقدميها مع الارز الابيض.
