دليل اختيار تينت الشفايف والخدود المناسب للون بشرتك
التينت من المنتجات اللي ظهرت مؤخرا في عالم المكياج ، لعمل لوك طبيعي من غير استخدام منتجات كتير ، والميزة فيه انه متعدد الاستخدامات تقدري تستخدميه للشفايف, الخدود, وحتى كايشادو ، وتعملي لوك مكياج كامل طبيعي وسهل بمنتج واحد بس ، بالاضافة انه سهل الدمج, وخفيف على البشرة, وبيدم فترة طويلة ، وعشان اللوك يطلع مثالي ، النهاردة هنشارك معاكم دليل اختيار التينت المناسب للون بشرتك.
فهم لون بشرتك:
قبل ما تختاري اللون لازم تفهمي لون بشرتك الاول ، ده هيساعدك في اختيار اللون اللي يكمل لون بشرتك الطبيعي.
- البشرة الفاتحة: بيكون مناسب ليها جدا الالوان الوردية الناعمة, المرجانية الفاتحة, ودرجات الخوخي.
- البشرة المتوسطة: مناسب ليها الالوان الوردية, الارجوانية, ودرجات الخوخي الدافي.
- البشرة الزيتونية والسمرا: هيناسبها الالوان الوردية الغنية, الاحمر الدافي, درجات الخوخي العميقة.
- البشرة الداكنة: مثالي ليها اللون التوتي الجريء, الاحمر, البرقوقي العميق هيكمل لون بشرتك بشكل مثالي.
انواع تينت الشفايف والخدود:
في انواع مختلفة من التينت وكل نوع ليه مميزاته الخاصة.
- التينت الجل: النوع ده بيعتمد على الماية في تركيبتة وبيديكي لون شفاف ، وهو مثالي جدا للحصول على لمسة نهائية Dewy طبيعية.
- التينت الكريمي: النوع ده بيتميز بلون كثيف اكتر وصبغة اقوى ، وسهل دمجه ، والنوع ده مثالي جدا لاصحاب البشرة الجافة لانه بيضيف لمسة ترطيب.
- التينت السائل: بيتميز ان صبغتة عالية وبيجي عادة مع اداة تطبيق براس صغيرة ، وممكن يكون دمجه اصعب من الانواع التانية ، ولكن بيوفر لون جريء وقوي وبيدوم فترة طويلة.
- الستيك تينت: الستيك تينت مريح وسهل الاستخدام ، ومثالي جدا لاضافة اللمسات النهائية اثناء التنقل ، وعادة بيكون قوامه كريمي وسهل الدمج.
نصايح تطبيق التينت:
- للخدود:
- ابدأي بكمية صغيرة الاول ، وزعيها على تفاحين الخد ، ولو احتاجتي لون اقوى ممكن تزودي ، لانه من الاسهل بناء اللون بدل من تخفيفه.
- ادمجي التينت بسرعة على الخدود ، لان التينت بينشف بسرعة ، عشان كده لازم تدمجيه فورا بصوابعك او باسفنجة المكياج او بالفرشة ، ادمجيه في حركات دائرية للحصول على لمسة نهائية ناعمة.
- واكيد لو لزم الامر وعايزة لون اقوى ، حطي طبقة تانية من التينت وادمجيه مرة تانية.
- للشفايف:
- الاول حضري شفايفك واتأكدي من تقشيرها وترطيبها.
- حطي كمية صغيرة من التينت على الشفايف وادمجيها بأطراف صوابعك او بفرشة الشفايف للحصول على لون متساوي.
- وللحصول على لون اكتر كثافة ، حطي طبقات اضافية لحد ما توصلي للون المطلوب.
اختيار لون التينت:
دلوقتي بعد ما عرفنا كل الاساسيات ، جيه الوقت للعثور على اللون المثالي ، هنقولك بعض النصايح اللي لازم تحطيها في اعتبارك لما تروحي تشتريه للحصول على افضل لون للشفايف والخدود.
- اختبار قبل الشراء: لو ممكن في المكان اللي هتروحي تشتري منه ، اختبري المنتج على بشرتك عشان تشوفي اللون عليكي.
- حطي نوع بشرتك في الاعتبار: لو بشرتك دهنية الافضل ليكي التينت الجل او السائل ، لو بشرتك جافة اختاري التينت الكريمي او الستيك.
- بصي على المكونات: دوري على المنتجات اللي بتحتوي على مكونات مرطبة زي الصبار, الجلسرين, حمض الهيالورونيك ، خصوصا لو بشرتك جافة.
- فترة الثبات: فكري في المدة اللي محتاجاها لاستمرار الصبغة ، التينت الجل والسائل بتدوم فترة اطول ، في حين ان التينت الكريمي هتحتاجي لاعادة تطبيقه تاني طول اليوم.
