7 مشروبات صحية تشربيهم اثناء الحمل, ومشروبات تتجنبيها
شرب المشروبات المغذية هيساعدك على الحفاظ على رطوبة جسمك وتقليل المضاعفات اثناء فترة الحمل ، الحفاظ على نظام غذائي صحي ومتوازن يعتبر جانب مهم جدا من الحمل ، تضمين بعض الاطعمة المغذية والمشروبات الصحية اثناء الحمل امر ضروري جدا لنمو الطفل وللام ، ومعظم النساء تقريبا يحسوا ان شرب مشروبات صحية وطازة اسهل من الاكل ، وخصوصا في اول 3 شهور من الحمل ، عشان كده لازم تعرفي ايه هي المشروبات اللي ممكن تفيدك وانتي والجنين ، تابعي معانا الموضوع واتعرفي على بعض المشروبات الصحية جدا اللي ممكن تضيفيها لنظامك الغذائي اثناء الحمل والمشروبات اللي المفروض تتجنبيها اثناء الحمل.
المشروبات الصحية اثناء الحمل:
1- الماية:
انتي محتاجة لشرب الماية للحفاظ على صحتك ، وده طول الوقت مش بس لو حامل ، ولكن اثناء الحمل بتزيد حاجة جسمك للماية ، الماية ضرورية لصحة خلايا الدم في جسمك ، انتي محتاجة كمان للماية لمنع الجفاف والتهاب المسالك البولية اثناء الحمل ، اللي ممكن يأدي للولادة المبكرة.
ملحوظة: البول اللي لونه اصفر غامق, الريحة اللاذعة, الدوخة, التعب, جفاف العين والشفايف والفم ، تعتبر من علامات الجفاف اثناء الحمل.
2- ماية جوز الهند:
طريقة صحية تانية لمنع الجفاف ، شرب ماية جوز الهند اثناء الحمل تعتبر طريقة منعشة ومغذية للحفاظ على رطوبة الجسم ، ومفيد لتجديد الاملاح الطبيعية في الجسم.
3- عصير الليمون:
عصير الليمون يعتبر طريقة مثالية للحفاظ على ترطيب الجسم ، بالاضافة انه بيمد جسمك بفيتامين سي اثناء الحمل ، ولو بتعاني من غثيان الصبح عصير الليمون هيكون اختيار ممتاز ليكي ، عصير الليمون معروف انه من المشروبات الفعالة لتخفيف الغثيان اثناء الحمل والشعور بالراحة.
4- اللبن والمشروبات اللي بتعتمد على اللبن:
شرب كوباية لبن يوميا اثناء الحمل هيساعدك على اتباع اسلوب حياة صحي والحفاظ على لياقتك ، وده مش بينطبق على فترة الحمل بس ولكن كمان في الايام العادية ، وممكن تجربي مشروبات تانية معتمدة على اللبن ، زي الميلك شيك اللي بيحتوي على فوايد الفواكة واللبن ، ممكن كمان تجربي اللبن الرايب ، كل المشروبات دي غنية بالكالسيوم, البروتين, فيتامين ب12 ، وكلها حيوية ومهمة اثناء الحمل ولنمو طفلك.
5- عصاير الفاكهة:
عصاير الفاكهة مفيدة لصحة الحامل ، ولكن اختاري الفاكهة الطازة مش المعلبة ، وتقدري تنوعي وتضيفي كل اللي تفضليه من الفاكهة لتحضير كوباية عصير صحية.
نصيحة سريعة: لو حسيتي بالحر والعطش بعد ممارسة الرياضة اثناء الحمل ، كلي المصاصات المثلجة المصنوعة في البيت من عصاير الفاكهة الطازة ، ده هيساعدك على تبريد جسمك بشكل فوري.
6- عصاير الخضروات:
الخضروات مهمة للحصول على نظام غذائي متوازن اثناء الحمل ، وافضل طريقة لدمج الخضروات في نظامك الغذائي هي عصاير الخضروات ، في مئات من وصفات عصاير الخضروات اللي ممكن تجربيها وتنوعي كل يوم في نوع العصير.
7- الشاي المثلج:
الشاي المثلج كمان من المشروبات الممتازة لعلاج الغثيان الصباحي ، ولكن حطي في اعتبارك ان الشاي بيحتوي على الكافيين فماتكتريش منه ، لانه ينصح اثناء الحمل التقليل من الكافيين ، والخبراء بيوصوا بالحد الادنى من الكافيين 150 مجم ومايزدش عن 300 مجم يوميا.
مشروبات المفروض تتجنبيها اثناء الحمل:
1- شاي الاعشاب:
هل كنتي فاكرة ان شاي الاعشاب آمن اثناء الحمل؟ ولكن هو في الحقيقة مش كده ، لان فهمنا لتأثير المكونات المختلفة الموجودة في شاي الاعشاب على صحة الام ونمو الجنين محدود ، عشان كده احرصي على سلامتك وسلامة الجنين بتجنب شاي الاعشاب اثناء الحمل.
2- مشروبات الطاقة:
انتي محتاجة لطاقة اضافية اثناء الحمل ، ولكن مع ذلك مش بننصحك بشرب مشروبات الطاقة اثناء الحمل ، المشروبات دي مليانة بالكافيين والسكر والمكملات الغذائية التانية ، كل اللي عليكي تعمليه انك تلتزمي بالطعام الصحي لتلبية كل احتياجاتك من الطاقة بدل شرب مشروبات الطاقة ، كمان اتجنبي شرب المشروبات الدايت والمشروبات الغازية المحلاه.
