طريقة استخدام الموز لتجديد البشرة
الموز من المكونات اللي ليها فوايد كتير جدا للبشرة ، حتى قشر الموز ليه فوايد للجلد ، والنهاردة من خلال موضوعنا هنشارك معاكم طرق استخدام الموز لتجديد البشرة والتخلص من علامات الشيخوخة.
1- وصفة الموز والشوفان:
هتحتاجي:
- موزة صغيرة مهروسة.
- 1 معلقة كبيرة عسل.
- 1 معلقة كبيرة شوفان مطحون.
- 2 معلقة كبيرة كريمة تقيلة.
طريقة التحضير والاستخدام:
- في طبق اهرسي الموز ، وضيفي له الكريمة, العسل, الشوفان ، وكمية مناسبة من الماية لعمل عجينة من المكونات ، وزعي الخليط على بشرتك ، وتقدري تستخدمي الخليط للجسم كله مش بس للوش ، سيبيه على بشرتك لمدة 30 دقيقة ، وبعدها اغسليه بماية فاترة.
- كرريه مرة واحدة في الاسبوع للحصول على بشرة متجددة وصحية.
- الماسك ده غني بالفيتامينات ومليان بالمكونات المرطبة وده بيخليه فعال لمكافحة الشيخوخة للبشرة اللي اتعرضت للتلف بسبب الشمس الاجهاد والتلوث.
2- وصفة القهوة والموز:
هتحتاجي:
- 1 موزة.
- 1 معلقة كبيرة قهوة.
- 1 معلقة كبيرة لبن.
- 1 معلقة صغيرة عسل (اختياري).
طريقة التحضير والاستخدام:
- في طبق اهرسي الموزة ناعم ، وضيفي لها القهوة واللبن وقلبيها كويس لخلط المكونات ، وزعي الخليط على بشرتك ، سيبيه لمدة 20 دقيقة ، بعدها بلي اطراف صوابعك بالماية ودلكي الماسك على بشرتك بحركات دائرية خفيفة لمدة كام دقيقة ، وبعدها اغسلي بشرتك بالماية.
- كرري الماسك مرة واحدة في الاسبوع.
- الموز يعتبر بوتوكس طبيعي للبشرة ، والقهوة واحدة من مضادات الاكسدة القوية اللي بتساعد على ازالة سموم البشرة ، واللبن يعتبر منظف طبيعي بيساعد على تنضيف بشرتك بعمق من غير ما يسبب تقشير كاشط للجلد.
3- وصفة الموز والافوكادو:
هتحتاجي:
- 1 افوكادو.
- 1 موزة.
- 1 معلقة صغيرة زيت زيتون.
- 1 معلقة صغيرة عسل.
طريقة التحضير والاستخدام:
- قطع الموز شرايح رفيعة ، وقطعي الافوكادو ، حطيهم مع بعض في الخلاط واضربيهم للحصول على عجينة ناعمة خالية من الكتل ، بعدها ضيفي لهم باقي المكونات وقلبيهم مع بعض كويس ، وزعي الخليط على الوش والرقبة وتحت العين ، سيبيه لمد 15 – 20 دقيقة ، وبعدها اغسليه بماية دافية.
- كرري الماسك مرة كل اسبوعين على الاقل.
- الموز مضاد طبيعي للشيخوخة وبيساعد على تقليل الخطوط الرفيعة والتجاعيد ، والافوكادو بيساعد على تجديد البشرة التعبانة والباهتة.
4- ماسك الموز والكركم لعلاج البشرة المعرضة لحب الشباب:
هتحتاجي:
- ½ موزة.
- ½ معلقة كبيرة عسل.
- 1 معلقة كبيرة عصير ليمون.
طريقة التحضير والاستخدام:
- في البداية اخلطي كل المكونات ماعدا عصير الليمون للحصول على عجينة ناعمة وخالية من الكتل ، وبعدها ضيفي عصير الليمون للخليط ، وقلبي كل المكونات مع بعض كويس ، وزعي الخليط على بشرتك ، سيبيه لمدة 20 دقيقة ، وبعدها اغسليه بالماية.
- كرري الماسك مرتين في الاسبوع.
- الماسك ده هيساعد على تقليل ظهور حب الشباب النشط على بشرتك ، وبيساعد على تحسين ملمس البشرة وتنقيتها.
5- وصفة الموز والزبادي لمكافحة الشيخوخة:
هتحتاجي:
- 1 موزة.
- 1 معلقة صغيرة زبادي.
- 1 معلقة صغيرة عصير برتقان او ليمون.
طريقة التحضير والاستخدام:
- قطعي الموز واهرسيه كويس لحد ما يبقى عجينة ناعمة ، ضيفي له الزبادي واخلطيهم كويس ، وبعدين ضيفي عصير البرتقان او الليمون ، واخلطي كل المكونات مع بعض كويس ، وزعي الخليط على البشرة ، سيبيه لمدة 15 دقيقة ، وبعدها اغسليه بالماية ، الماسك ده يعتبر مناسب كمان للبشرة الحساسة والدهنية جدا.
- كرري الماسك مرة كل اسبوعين.
- الزبادي بتساعد على تنضيف مسام البشرة بعمق وتعتبر مرطب طبيعي للبشرة ، الموز بيزيل السموم من البشرة من الداخل ، عصير البرتقان بيساعد على تنضيف المسام المسدودة.
