بسكويت الزبدة بالشوكولاتة والكراميل المملح
بسكويت الزبدة بالشوكولاتة والكراميل المملح وكل ده متغطي بالبندق المحمص المفروم ، من وصفات الحلويات اللذيذة ، وهي مثالية كوجبة خفيفة او مع الشاي ، تابعي معانا واتعرفي على الطريقة بالخطوات.
المكونات:
للبسكويت:
- 225 جرام (2 كوباية ناقصين معلقة كبيرة) دقيق عادي متعدد الاستخدامات.
- 175 جرام ( ¾ كوباية ناقصة معلقة صغيرة) زبدة غير مملحة باردة ومتقطعة مكعبات.
- 90 جرام ( ½ كوباية) سكر ناعم.
- رشة ملح.
للطبقة العلوية:
- 150 جرام ( ½ كوباية + 2 معلقة كبيرة) زبدة غير مملحة.
- علبة 400 جرام حليب مكثف.
- 1/3 كوباية سيرب ذهبي.
- ½ معلقة صغيرة ملح.
- 350 جرام شوكولاتة حليب.
- 4 معلقة كبيرة بندق محمص مفروم.
طريقة التحضير:
1- سخني الفرن على درجة حرارة 150 درجة مئوية مع المروحة ، وهاتي قالب كيك مربع مقاس 23 سم وبطنيه بورق زبدة.
2- في محضرة الطعام ضيفي الزبدة والدقيق واخلطيهم لحد ما الخليط يبقى شبه فتات الخبز الناعم.
3- ضيفي السكر الناعم والملح واخلطي تاني لحد ما الخليط يمتزج كويس والعجينة تتجمع مع بعض.
4- حطي الخليط في قالب الكيك المبطن.
5- افردي الخليط في الصينية كويس بالتساوي باستخدام ضهر المعلقة ، لحد ما تتأكدي ان البسكويت مسطح ومتساوي قدر الامكان.
6- اخبزي البسكويت في الفرن لمدة 30 دقيقة ، وبعدها خرجيه من الفرن وسيبيه يبرد شوية وهو جوه القالب ، اثناء تحضير الكراميل.
7- ضيفي الزبدة والحليب المكثف والسيرب والملح في حلة صغيرة ، على نار خفيفة مع التقليب المستمر لحد ما الزبدة تدوب.
8- ارفعي الحرارة لمتوسطة لعالية ، وسيبيه على نار هادية مع التقليب المستمر لمدة 6 – 8 دقايق لحد ما الخليط يبقى سميك ويتحول للون الكراميل الدهبي.
9- اطفي النار وصبي خليط الكراميل ببطء فوق البسكويت في القالب.
10- افردي طبقة الكراميل فوق البسكويت لحد ما تبقى متساوية ، وبعدها حطي القالب في التلاجة لمدة ساعة على الاقل.
11- دوبي الشوكولاتة في الميكروويف على دفعات مدتها 30 ثانية ( مع التقليب المستمر بين كل دفعة ) او استخدمي حمام ماية سخنة.
12- صبي الشوكولاتة السايحة فوق الكراميل في طبقة متساوية.
13- رشي على الوش البندق المفروم ، وسيبيها لحد ما تبرد تماما ، لمدة ساعة على الاقل ، في درجة حرارة الغرفة.
14- قطعيها ل 9 مربعات كبيرة ، او 36 مربع صغير بحجم اللقمة ، وقدميها.
نصايح للوصفة:
- ممكن تستغني عن الملح في الكراميل ، ويبقى كراميل عادي مش مملح.
- ممكن تستبدلي البندق المفروم بجوز هند مبشور او قطع توفي او سبرينكلز.
- ممكن تستبدلي شوكولاتة الحليب بشوكولاتة داكنة او شوكولاتة بيضا.
- تقدري تخزني البسكويت في علبة محكمة الغلق في درجة حرارة الغرفة ، هتقعد معاكي لحد اسبوع.
