7 حاجات لازم تعرفيها قبل ما تعملي ميكرونيدلينج Microneedling لبشرتك
انتشرت في الفترة الاخيرة علاج البشرة بالوخز بالابر او المعروف بالميكرونيدلينج Microneedling ، واللي بيتم فيه استخدام ابر رفيعة جدا لثقب الجلد وتحفيز الكولاجين وشفاء البشرة ، وده بيأدي لتحسين ملمس البشرة, علاج بقع حب الشباب, وفوايد تانية للبشرة ، والميكرونيدلينج مش من الحلول او العلاجات السريعة للبشرة ، ولكن بتاخد شهور عشان تشوفي نتايج وفي الغالب بتحتاج جلسات كتير ، ولكن قبل ما تقرري انك تعملي ميكرونيدلينج للبشرة ، في 7 حاجات لازم تعرفيهم قبل ما تروحي تعملي العلاج لبشرتك.
ايه هو الميكرونيدلينج وايه هي استخداماته؟
الوخز بالابر الدقيقة او الميكرونيدلينج هو علاج للعناية بالبشرة بأقل تدخل جراحي ، وبيستخدم لتحسين ملمس الجلد بشكل عام ، وتحفيز انتاج الكولاجين ، وكعلاج مضاد للشيخوخة ، اثناء العلاج بيتم استخدام ابر رفيعة وحادة جدا لعمل ثقوب صغيرة في الطبقة العلوية من الجلد للوصول للبشرة والادمة العميقة ، ولما الابرة بتخترق البشرة ، بتسبب اصابات دقيقة جدا بتوصل رسالة لجسمك بمعالجة الجروح وتعزيز انتاج الكولاجين ، وده بيأدي لتحسين شكل البشرة ، تكوين الكولاجين وانسجة الجلد الجديدة بتساعد على تنعيم البشرة وشدها وتقويتها ، الوخز بالابر ممكن يساعد كمان على تقليل ظهور حب الشباب, الندبات, البقع الغامقة, التجاعيد, المسام الواسعة.
فوايد الميكرونيدلينج:
1- بيحسن مظهر وملمس بشرتك.
2- بيقلل من حجم المسام.
3- بيقلل من ندبات حب الشباب.
4- بيساعد في علاج ظهور فرط التصبغ والبقع الغامقة.
5- بيحسن مرونة الجلد.
6- بيعزز اشراقة البشرة ونضارتها وتوهجها.
7- بيقلل من الندبات, التجاعيد, علامات التمدد ، ومشاكل الجلد بشكل عام.
8- مش بيسبب تغير لون بشرتك زي علاجات البشرة التانية اللي بتستخدم الضوء او الحرارة او الليزر.
9- بيحتاج فترة نقاهة قصيرة بعد العلاج.
الاثار الجانبية للميكرونيدلينج:
لما بيتم العلاج بشكل صح ، الاثار الجانبية بتكون قليلة جدا ، ولكن زي حال كل علاجات البشرة ، ليه اثار جانبية ، ممكن بعض الاشخاص يعانوا منها.
1- تهيج بسيط في الجلد.
2- احمرار وشد في البشرة.
3- نزيف وكدمات.
4- تقشير.
5- عدوى.
6- ممكن العلاج ده مايكونش آمن للاشخاص اللي بياخدوا ادوية معينة لعلاج حب الشباب ، او اللي بيعانوا من حب الشباب النشط ، او الاشخاص اللي بيعانوا من الصدفية او الاكزيما المتوسطة للشديدة.
7- لو حامل استشيري الدكتور بتاعك قبل العلاج.
7 حاجات لازم تعرفيها قبل تجربة الميكرونيدلينج:
1- طريقة الاستعداد لجسلة الميكرونيدلينج:
لتحضير بشرتك للجلسة ، هتحتاجي توقفي مؤقتا استخدام بعض المنتجات ، زي الريتينويدات ، والمنتجات اللي داخل في مكوناتها حمض الساليسيليك, حمض الازيليك, حمض الجليكوليك ، لانها ممكن تسبب تهيج الجلد وجفافه ، كمان اتجنبي التقشير قبل كام يوم من الجلسة.حاولي تجنب التعرض للشمس لمدة 24 ساعة على الاقل قبل جلسة الميكرونيدلينج ، التعرض للشمس لفترات طويلة ممكن يأدي لزيادة تهيج الجلد ، ضروري تستخدمي واقي من الشمس كل يوم ، مهم تتأكدي ان بشرتك مافيهاش اي تهيج قبل العلاج.
2- يوم الجلسة:
ماتحطيش في اليوم ده اي لوشن او عطور او سيروم ، ولو حاطه مكياج شيليه قبل الجلسة بمنظف لطيف ، جلسة الميكرونيدلينج بتاخد حوالي 30 دقيقة ، اول حاجة في الجلسة هتكون تغطية بشرتك بمخدر موضعي لتقليل اي الم ناتج عن العلاج ، وبمجرد ما المخدر يشتغل ، هيتم تنضيف بشرتك باستخدام الكحول لتقليل خطر الاصابة بالعدوى وبعدها بيبدأ العلاج.
3- بعد العلاج:
بعد مرور ما لا يقل عن 4 ساعات بعد الجلسة ، ممكن تستخدمي غسول لطيف وماية باردة واستخدام ايديكي بس لتجفيف بشرتك ، اتجنبي كمان اي نشاط يخليكي تعرقي زيادة ، زي السباحة او ركوب العجل او التدريبات المكثفة بعد العلاج مباشرة ، بعد 24 ساعة ممكن تستخدمي مكياج معدني وكريمات وقاية من الشمس ، اتجنبي احواض الماية السخنة والساونا وحمامات البخار لمدة 48 ساعة على الاقل ، كمان المفروض تنامي على ضهرك مع رفع راسك لتقليل التورم او الالم.
4- عملية التعافي:
التعافي بعد الجلسة بسيط جدا ، عادة الجروح اللي بتسببها الابر بتلتئم بسرعة ، على الرغم ان الموضوع مكن ياخد وقت على ما تشوفي نتايج العلاج ، ماتحطيش مكياج بعد العلاج وخدي استراحة من الريتينول واحماض الفا هيدروكسي واحماض بيتا هيدروكسي لحد ما بشرتك تلتئم تماما ، اتجنبي التعرض للشمس بشكل مباشر لمدة اسبوعين على الاقل ، وضروري دايما تستخدمي واقي من الشمس لحماية بشرتك.
5- الادوية:
لو بتاخدي ادوية لعلاج حب الشباب ، لازم توقفيها قبل العلاج بالابر بكام شهر ، عشان كده لازم تتأكدي من الدكتور المتخصص ، ماتخديش ادوية مضادة للالتهابات زي الايبوبروفين او موترين لمدة 3 ايام على الاقل قبل العلاج ، لانها ممكن تدخل مع عملية الالتهابات الطبيعية في الجسم اللازمة لتجديد شباب الجلد بشكل صحيح ، وماتاخديهاش كمان لمدة اسبوع بعد العلاج ، ممكن تستخدمي بعد الجلسة مسكن للالم زي تايلينول لو حسيتي بأي الم.
6- الاثار الجانبية وعملية الشفاء:
طبيعي جدا بعد الجلسة يكون في تأثير شبه حروق الشمس في اول يوم لتلات ايام ، هتحسي ان بشرتك مشدودة او جافة او حساسة للمس ، ممكن تعاني كمان من بعض الاحمرار او الكدمات البسيطة او التورم اللي المفروض يختفي من نفسه ، التقشير هيبدأ بعد 3 – 5 ايام من العلاج ، هتلاحظي جفاف الجلد وتقشره ، ماتفركيهوش او تخدشيه ، والغسول اللطيف وحمض الهيالورونيك والمرطب المغذي مثاليين لفترة التعافي ، تقدري تستخدمي منتجات العناية بالبشرة العادية مرة تانية بعد 5 – 7 ايام من العلاج ، بمجرد ما بشرتك تتوقف عن التهيج ، على الرغم انك المفروض تستني لمدة 10 ايام قبل ما تدخلي الريتينويدات مرة تانية لروتينك.
7- عدد الجلسات اللي هتحتاجيها:
للحصول على افضل النتايج ، بننصحك بتكرار جلسات الميكرونيدلينج كل 4 – 6 اسابيع ، مع 3 – 5 جلسات ، حسب نوع بشرتك وخطة العناية الشخصية ، والدكتور هيقولك ايه المناسب لنوع بشرتك.
