كريمات طبيعية لفرد الشعر تعمليها بنفسك في البيت
كلنا عارفين ان كريمات الفرد اللي موجودة في السوق هي مش افضل اختيار لشعرنا ، لانها بتكون مليانة بالمواد الكيميائية الضارة ، واللي بتكون قاسية على الشعر وبتسبب تقصفه وتساقطه ، عشان كده النهاردة من خلال موضوعنا هنشارك معاكم طريق عمل كريمات طبيعية لفرد الشعر تعمليها بنفسك في البيت ، بمكونات طبيعية مش مضرة للشعر.
1- كريم حليب جوز الهند:
المكونات:
- 2 معلقة كبيرة من حليب جوز الهند.
-عصير ليمونة واحدة.
الخطوات:
1- ضيفي عصير الليمون لحليب جوز الهند.
2- حطي الخليط في التلاجة لمدة 2 – 3 ساعات.
3- بعدها خرجيه من التلاجة ، هتلاقيه عمل طبقة كريمية على الوش.
4- اغسلي شعرك بالشامبو ، وسيبيه ينشف بشكل طبيعي في الهوا.
5- بعدها وزعي عليه الكريم من الجذور للاطراف ، وشدي الشعر بشكل مستقيم اثناء وضع الكريم على خصل الشعر ، امسكي خصلة حطي عليها كمية من الكريم وشدي الشعر وافردية بايديكي الاتنين كويس اثناء توزيع الكريم ، واعملي نفس الطريقة لحد ما تخلصي الشعر كله.
6- سيبي الكريم على شعرك لمدة ساعتين.
7- بعدها اغسلي شعرك بالماية العادية.
8- واغسلي شعرك بالشامبو بعد يومين من عمل العلاج ده.
9- كرري العلاج ده مرة واحدة في الاسبوع لمدة شهر للحصول على افضل النتايج.
2- كريم الجيلاتين:
المكونات:
- 2 معلقة كبيرة من بودرة الجيلاتين.
- 1 كوباية من حليب جوز الهند.
- 2 معلقة كبيرة من زيت جز الهند.
- 2 معلقة كبيرة نشا.
- 2 معلقة صغيرة عصير ليمون.
- 2 معلقة صغيرة عسل.
الخطوات:
1- ضيفي زيت جوز الهند لحليب جوز الهند في حلة على النار ، واستمري في تقليبهم مع بعض.
2- بعد 3 – 4 دقايق من التسخين ضيفي النشا والجيلاتين وقلبي كويس.
3- بعد 4 دقايق كمان من التقليب ، ارفعي الخليط من على النار وضيفي عصير الليمون والعسل ، وقلبي كل المكونات مع بعض كويس.
4- اغسلي شعرك شامبو خفيف وماية عادية ، وسيبي الشعر ينشف في الهوا.
5- بمجرد ما الكريم يبرد ، وزعيه على شعرك من الجذور للاطراف ، واستمري في شد الشعر اثناء وضع الكريم ، بنفس طريقة وضع الكريم اللي فات.
6- سيبي الكريم على شعرك لمدة ساعة.
7- بعدها اغسلي شعرك بالماية بس من غير شامبو.
8- اغسلي شعرك بالشامبو بعد 3 ايام من عمل العلاج ده.
9- استخدمي الكريم ده مرتين في الاسبوع لمدة شهر للحصول على شعر مفرود وناعم.
3- كريم زيت الزيتون وحليب جوز الهند:
المكونات:
- 2 معلقة كبيرة من زيت الزيتون.
- 1 كوباية من حليب جوز الهند.
- 2 معلقة كبيرة عصير ليمون.
- 3 معلقة كبيرة نشا.
الخطوات:
1- في حلة ضيفي حليب جوز الهند, زيت الزيتون, عصير الليمون, النشا ، وحطيهم على نار متوسطة.
2- استمري في تقليب الخليط ، بعد مرور 10 – 15 دقيقة ارفعي الخليط من على النار.
3- اغسلي شعرك بالشامبو ، وسيبي شعرك ينشف في الهوا.
4- بمجرد ما الكريم يبرد ، وزعيه على شعرك من الجذور للاطراف ، مع شد الشعر اثناء وضع الكريم.
5- سيبيه لمدة 30 دقيقة على الشعر.
6- بعدها اغسلي شعرك بماية عادية وشامبو خفيف.
7- استخدمي الكريم ده مرتين في الاسبوع لمدة شهر ، للحصول على شعر مفرود وناعم.
