ستايلات جريئة لرسم الايلاينر لتغيير اللوك بتاعك
لو مليتي من رسم مجرد خط بالايلاينر بالطريقة التقليدية ، النهاردة من خلال موضوعنا هنشارك معاكم ستايلات جريئة لرسم الايلاينر لتغيير اطلالتك ، وسواء كنتي مبتدئة في وضع المكياج او محترفة ، هتلاقي طرق كتير لتحويل اللوك بتاعك برسمة ايلاينر مختلفة ، من اول الخطوط الرفيعة البسيطة للخطوط الجريئة.
1- رسمةWinged Wonder:
هنبدأ بالايلاينر المجنح التقليدي ، اللي كتير من البنات متعودين يرسموه في اللوك اليومي بتاعهم ، ولكن عشان تعملي اللوك ده من غير عيوب والرسمة تطلع مثالية ، ابدأي باختيار الايلاينر المفضل ليكي ، سواء سائل, جل, قلم ، بالنسبة للمبتدئين الايلاينر القلم هيوفرلك سهولة في رسم الايلاينر.
ابدأي برسم خط رفيع على طول خط الرموش العلوي ، وخلي الرسمة اكتر سمك بالتدريج وصولا للزاوية الخارجية لعينك ، وباستخدام ايد ثابتة وحركة خفيفة ، مدي الخط لبره لفوق لرسم جناح مثالي ، وممكن تستخدمي شريط لاصق او كارت على الزاوية الخارجية للعين لظبط الرسمة ، وانهي الرسمة بتوصيل الجناح بباقي خط الايلاينر.
2- رسمة ايلاينر جرافيك:
رسمة الايلاينر الجرافيك مناسبة لو عايزة رسمة جريئة ومختلفة ، ابدأي برسم التصميم اللي انتي عايزاه باستخدام قلم تحديد ، وبعدها مرري فوقه بقلم تحديد سائل او جل.
3- استخدام لونين ايلاينر:
استخدام ايلاينر بلونين مختلفين ، هيضيف عمق وبُعد للعين ، وده هيظهرها اكتر ، ابدأي باختيار لونين مختلفين ، زي مثلا اسود ودهبي ، او مات ومعدني ، وارسميهم على طول خط الرموش العلوية ، ومدي خط واحد منهم للجناح ، ولو مش متأكدة من الالوان اللي ممكن تنسقيها مع بعض ، التجربة هي المفتاح ، جربي مجموعة مختلفة من الالوان لحد ما تلاقي اللون المثالي للون عينيكي ولون بشرتك.
4- الايلاينر السموكي:
السموكي مش بس للايشادو ، لكن كمان تقدري تعملي لوك سموكي بالايلاينر ، ابدأي تحديد عينيكي بقلم تحديد ناعم ، وبعدها استخدمي فرشة او اطراف صوابعك لدمجه لعمل تأثير سموكي ، ولاظهار العيون اكتر ، حطي طبقة من الايشادو الغامق فوق الايلاينر وادمجيه لبره باتجاه الزاوية الخارجية للعين ، وانهي مكياج العين بطبقة ماسكارا.
5- استخدمي ايلاينر ملون:
لو زهقتي من الايلاينر الاسود ، ضيفي لمسة من الالوان واسخدمي ايلاينر ملون بألوان زاهية وجريئة زي الازرق, الارجواني, الاخضر ، تعتبر من الالوان التريندي جدا للموسم ده.
ارسمي الايلاينر الملون باللون المفضل ليكي على طول خط الرموش العلوي وارسمي الجناح كمان بنفس اللون لتحقيق اقصى تأثير ، ولو مش متأكدة من اللون اللي هتختاريه ، استلهمي اللون من ملابسك او من الوان الموسم ، او ببساطة اختاري اكتر لون بيحسسك بالثقة.
6- المساحة السلبية في رسم الايلاينر:
رسم خطوط العين بمساحات سلبية هو الحل الامثل للبنات اللي بيفضلوا اسلوب البساطة اكتر في المكياج ، والستايل ده عبارة عن ترك مساحة بين خط الايلاينر وخط الرموش.
ابدأي بتحديد عينك زي ما بتعملي عادة ، واستخدمي قطعة قطن او فرشة دقيقة لازالة اي زيادة من المنتج وعمل خط نضيف من الفراغ السلبي ، نسقيه مع ايشادو بألوان محايدة وشفايف بألوان طبيعية ، او اعملي لوك اكتر جرائة باستخدام روج بلون جريء.
