وصفة الارز المقلي باللحمة المفرومة على الطريقة الآسيوية
وصفة الارز المقلي باللحمة المفرومة ، من الاكلات المعروفة في المطبخ الآسيوي وليها شعبية كبيرة ، وصفة سهلة وتقدري تحضريها في دقايق بأقل مجهود ، بالاضافة انها تعتبر وجة كاملة لانها بتحتوي على بروتين وخضار ، وكمان موفرة لانك ممكن تستخدمي فيها ارز مطبوخ عندك وتغيري طريقة تقديمه بالوصفة دي.
المكونات:
للحمة المفرومة:
- 500 جرام لحمة مفرومة.
- 1 معلقة كبيرة زيت سمسم او اي زيت نباتي تفضليه.
- 1 معلقة كبيرة سكر.
- 2 معلقة كبيرة صويا صوص.
- 2 فص ثوم مفروم.
- 1 معلقة صغيرة عشبة الليمون مفرومة على شكل معجون.
- ¼ معلقة صغيرة فلفل اسود.
- ½ معلقة صغيرة شطة.
للارز:
- 1 ½ معلقة كبيرة زيت عباد الشمس.
- 4 كوبايات ارز مطبوخ.
- 2/3 كوباية بسلة مجمدة.
- 2 بيضة.
- 1 معلقة كبيرة صويا صوص.
- ¼ معلقة صغيرة ملح.
- 1 معلقة كبيرة من عصير الليمون ، عصير ½ ليمونة تقريبا.
للتقديم:
- صوص سيراتشا حار.
- بصل اخضر متقطع شرايح.
طريقة التحضير:
1- لتحضير اللحمة ، سخني طاسة على نار عالية ، وضيفي اللحمة المفرومة ، وسيبيها لمدة 5 دقايق مع اتفتيها باستخدام المعلقة لحد ما اللحمة تاخد لون بني.
2- ضيفي زيت السمسم او الزيت النباتي والسكر وقلبيهم مع بعض لمدة 5 دقايق كمان ، لحد ما اللحمة تاخد لون بني اغمق شوية.
3- ضيفي الصويا الصوص, الثوم المفروم, معجون عشبة الليمون, الفلفل الاسود, الشطة ، وقلبي لمدة 5 دقايق كمان.
بعدها خرجي خليط اللحمة المفرومة في طبق على جنب.
4- لتحضير الارز ، في نفس الطاسة اللي عملنا فيها اللحمة ضيفي زيت عباد الشمس وسخنيه.
5- ضيفي له الارز, البسلة واقليهم لمدة 3 – 4 دقايق مع التقليب المستمر.
6- انقلي الارز على جنب واحد من الطاسة ، والجنب الفاضي اكسري فيه البيضتين ، واقلي البيض كويس لمدة دقيقة تقريبا.
اخلطي البيض مع الارز.
7- ضيفي الصويا صوص, الملح, عصير الليمون واخلطيهم مع بعض.
8- ضيفي اللحمة المفرومة للارز في الطاسة واقليهم مع بعض مع الاستمرار في التقليب ، لمدة 2 – 3 دقايق كمان لتسخين اللحمة المفرومة مرة تانية.
9- قدميه مع السيراتشا صوص والبصل الاخضر.
