طريقة ازالة صبغة الشعر من الجلد

اوقات كتير اثناء صبغ الشعر ، الصبغة بتسبب بقع على الجلد على خط الشعر والايدين ، واوقات بقع صبغة الشعر بتسبب تهيج الجلد ، عشان كده النهاردة هنشارك معاكم علاجات منزلية لازالة بقع صبغة الشعر من الجلد.

1- معجون الاسنان:

هتحتاجي:

- معجون اسنان كمية بحجم حبة البسلة او حسب الاحتياج.

- قطعة قطن.

الخطوات:

1- حطي معجون الاسنان على القطن ، حطي قطعة القطن على المكان اللي عليه بقعة صبغة وسيبيه لمدة دقيقتين.

2- وتقدري تحطيه على صوابعك كمان ، وتسيبيه لمدة 3 – 4 دقايق ، وبعدها اشطفيه بماية فاترة استخدمي صوابعك لفرك المعجون من على الجلد ، لو البقعة مارحتش من اول مرة تقدري تكرري الخطوات مرة تانية.

2- قشر الليمون:

هتحتاجي:

- قشر ليمون حسب الحاجة.

- فوطة مغموسة في ماية فاترة.

الخطوات:

1- هاتي نص قشرة ليمونة واقلبيها من جوه لبره ، افركي الجزء اللي جوه من القشر على الجلد اللي فيه بقعة صبغة ، استمري في الفرك لمدة 3 – 4 دقايق.

2- بعد ما تخلصي فرك المكان ، هاتي فوطة اغمسيها في ماية فاترة ، ونضفي المنطقة كويس ، ولو لسه في بقع صبغة كرري الخطوات مرة كمان لحد ما تتخلصي من كل اثار البقع.

3- صودا الخبز (الكربوناتو):

هتحتاجي:

- ½ معلقة صغيرة من صودا الخبز.

- ½ معلقة صغيرة منظف سائل.

قطعة قطن.

الخطوات:

1- امزجي صودا الخبز مع المنظف السائل ، هاتي قطعة قطن واغمسيها في الخليط ، افركي الخليط على منطقة الجلد المصبوغ لحد ما البقعة تختفي ، ماتفركيش لمدة تزيد عن 3 – 4 دقايق.

2- وبعدها اغسلي المنطقة بماية فاترة ، ولو البقعة مارحتش ممكن تكرري الخطوات تاني بعد ساعتين.

4- مزيل طلاء الاظافر:

هتحتاجي:

- مزيل طلاء اظافر.

- قطعة قطن.

الخطوات:

حطي مزيل طلاء الاظافر على القطنة ، وافركي الجلد المصبوغ بلطف لحد ما البقعة تروح ، وبعدها اغسلي المنطقة بالماية العادية ، وكرري الخطوات مرة تانية لو لزم الامر.

5- الفازلين:

هتحتاجي:

- كمية فازلين حسب الحاجة.

- فوطة.

الخطوات:

1- حطي الفازلين على منطقة الجلد المصبوغ ، ودلكيه بصوابعك بحركات دائرية ، استمري في التدليك لمدة 5 دقايق او اكتر لحد ما البقعة تختفي.

2- بمجرد ما تخلصي تدليك امسحي الجلد بالفوطة ، وبعدها تقدري تغسلي المنطقة بالماية لو لزم الامر ، لو البقعة مارحتش بشكل كامل كرري نفس الخطوات مة او مرتين لحد ما تختفي.

احتياطات:

1- اتأكدي من عدم تكرار اي طريقة من اللي قولناها اكتر من مرتين في اليوم ، عشان مايسببش تهيج الجلد.

2- عند تطبيق اي علاج من علاجات اللي قولناها ، اتأكدي انها ماتلمسش عينك ، ولو حصل اغسلي عينيكي فورا بالماية العادية واستخدمي قطرة مهدئة للعين.