ازاي تحطي حدود لنفسك: 5 نصايح هتساعدك
الحدود الصحية هي واحدة من اهم المكونات لحياة سعيدة ومُرضية ، وفي حين ان بعض الناس بيكون عندهم القدرة على وضع الحدود لنفسهم ، الا ان البعض التاني بيلاقي صعوبة في ده ، واكيد هي عملية محتاجة شوية ممارسة ، ولكن وضع الحدود امر لابد منه لحماية رفاهيتك الشخصية ، وفي حين ان الحدود عموما في معظم الاحيان بتركز على الحدود مع الاخرين ، ولكن مهم كمان وضع حدود مع نفسك ، لانه يعتبر شكل اساسي من اشكال العناية الذاتية اللي بتساعد على تحسين صحتك العقلية ومزاجك وبتساعدك على تحقيق اهدافك ، تابعي معانا واعرفي ازاي تحطي حدود لنفسك وليه ده مهم جدا.
ايه هي الحدود وليه مهمة؟
الحدود هي الحدود والقواعد اللي بنحطها لنفسنا ، سواء في علاقاتنا او مع نفسنا ، وفي حين انه مهم تعملي حدود شخصية مع اللي حواليكي ، ضروري كمان انك تعملي حدود لنفسك ، الحدود هتساعدك على مراقبة سلوكك واتباع اسلوب حياة صحي ، وضع الحدود هيساعدك على رسم الخط الفاصل بين اللي مناسب ليكي واللي مش مناسب ، ودي خطوة مهمة لحياة صحية ، وتحقيق اهدافك.
7 انواع من الحدود:
1- الحدود الجسدية:وده بيشمل احتياجك للمساحة الشخصية ، وراحتك عند اللمس ، والاحتياجات الجسدية زي الراحة والاكل ، مافيش مشكلة انك تقولي للي حواليكي بانك مش بتحبي حد يلمسك ، او انك محتاجة للاكل والراحة ، او انك محتاجة مساحة اكبر.
2- الحدود العاطفية:بتشمل احترام مشاعرك وطاقتك وتقديرها ، ودي طريقة لحماية سلامتك العاطفية والتأكد انك في الحالة الذهنية الصحيحة لعمل محادثات معينة.
3- الحدود الزمنية:الامر بيتعلق بحماية استخدام وقتك واساءة استخدامه ، الحدود دي بتساعدك على فهم اولوياتك وتخصيص وقت كافي للحاجات المهمة في حياتك من غير الافراط في الالتزام ، وافتكري دايما انه مقبول انك تقولي "لا" ، او تطلبي فلوس اكتر على عدد ساعات شغلك الاضافية ، او الالتزام بنشاط او حدث لفترة معينة بس.
4- الحدود الجنسية:وده بيشمل حماية صحتك الجنسية ، والموافقة ، والاحترام ، والخصوصية ، وفهم التفضيلات والرغبات ، وجود حدود جنسية صحية بيشمل طلب الموافقة ، مناقشة وسائل منع الحمل ، رفض الحاجات اللي مش بتحبيها في العلاقة ، احترام خصوصية الشريك.
5- الحدود الفكرية:ودي بتشمل الافكار والمفاهيم ، والحدود الفكرية الصحية بتشمل احترام افكار الاخرين والوعي بموضوعات المناقشة المناسبة ، ومعناه كمان التفكير في اذا كان الوقت المناسب للكلام في موضوع معين ، زي السياسة.
6- الحدود المادية:وده بيشمل حماية ممتلكاتك المادية ، من الصحي جدا ان يكون عندك فهم عن اللي ممكن واللي مش ممكن تشاركيه او مش مش عايزة تشاركيه ، وازاي بتتوقعي التعامل مع اي حاجة تخصك لو سلفتيها لشخص تاني.
7- الحدود مع نفسك:وده بيشمل وضع الحدود للحفاظ على سلامتك وصحتك ، وده معناه انك تختاري الحاجات اللي تخدم مصلحتك ، حتى لو مش ممتعة بالنسبة في الوقت الحالي.
5 اسباب تدفعك لوضع حدود لنفسك:
1- هيحسن صحتك العقلية وحالتك المزاجية.
2- هيخلق لك وعي ذاتي اكتر.
3- هيساعدك في تحقيق اهدافك المستقلية.
4- هيخلق لك روتين واسلوب حياة صحي اكتر.
5- هيساعدك على الحفاظ على احترامك لنفسك.
ازاي تحطي حدود مع نفسك:
1- حددي المجالات في حياتك اللي محتاجة لحدود:
في مجالات كتير في حياتك ممكن تلاقي انها محتاجة لتنظيم وحدود اكتر ، وكل شخص بيختلف عن التاني ، وده ممكن يشمل الامور المالية ، استخدام الاجهزة الالكترونية ، الاكل ، التمارين الرياضية ، العمل ، الروتين اليومي ، العلاقات ، الصحة العاطفية ، واسألي نفسك لو وضع الحدود في الحاجات دي هيحسن حياتك ولا لا.
2- حطي حدود تعكس اهدافك وقيمك:
فكري في اللي انتي عايزاه لمستقبلك ، وايه هي اهدافك؟ وايه هي قيمك؟ خلي ده يساعدك في هيكلة حدودك ، على سبيل المثال ، لو هدفك انك تبدأي عمل تجاري ناجح ، ده هيخليكي تحطي حدود لنفسك انك تنظمي وقتك اكتر وتنامي وتصحي بدري عشان تبقي مركزة ، ولو بتقدري اسلوب الحياة المتوازن ، هتحطي حدود انك تشتغلي لحد ساعة معينة بس وعدم العمل ابدا في الويك اند ، ولو عندك هدف لانقاص الوزن ، هتحطي حدود صحية على الاكل وهتمارسي رياضة.
3- خليكي صادقة مع نفسك:
في المرة الجاية اللي هتنوي فيها تشتري حاجة كبيرة او تتقدمي لوظيفة جديدة ، اسألي نفسك بتعملي ده ليه ولمين ، لو حاسه فعلا ان ده هيحسن من جودة حياتك ، اعمليه ، اما لو هتعملي ده من باب لفت الانتباه او اثارة اعجاب شخص تاني ، فهنا ممكن ماتبقاش دي الخطوة الافضل بالنسبة لك ، انك تبقي صادقة مع نفسك في اتخاذ القرارات هيساعدك في وضع حدود صحية ، وعمل الحاجات اللي بتستمتعي بيها فعلا.
4- اتوقفي عن مقارنة نفسك بغيرك:
في جملة بتقول ، المقارنة هي لص الفرح يعني المقارنة بتسرق فرحتنا باللي معانا ، ومع ظهور وسائل التواصل الاجتماعي ، بقى من الصعب عدم مقارنة نفسك بغيرك ، ولكن حاولي تفتكري دايما ان اللي بيعمله شخص تاني في حياته مالوش تأثير عليكي ، هيكون دايما في شخض عنده حاجات اكتر منك ، وانتي كمان هيبقى عندك حاجات اكتر من اشخاص تانيين ، ولو وسائل التواصل الاجتماعي تأثيرها سلبي عليكي ، حاولي تبعدي عنها قدر الامكان ، ركزي انك تعيشي حياة افضل بعيد عن وسائل التواصل الاجتماعي ، حياة تكون بتتوافق مع قيمك واهدافك.
5- اعملي تغييرات تدريجية:
لو لسه بادئة عملية وضع الحدود مع نفسك ، حاولي انك ماتحطيش حدود كتير مرة واحدة ، لانها عملية بتشمل تغيير روتينك وعاداتك ، ولو عملتي ده مرة واحدة ممكن يأدي لنتايج عكسية ، لكن عمل تغييرات بالتدريج هيساعدك على تحقيق نجاح اكتر ، على سبيل المثال ، لو انتي متعودة تمسكي الموبايل لحد ما تنامي وعايزة تقللي من استخدامه وتنامي بدري ، حاولي تحركي الجدول الزمني بتاعك بمقدار 15 دقيقة في كل مرة لحد ما توصلي لهدفك (مافيش موبايل بعد الساعة 10 مساء وبعدها 9:45 مساء وبعدين 9:30 مساء وهكذا).في النهاية وضع الحدود لنفسك هو واحد من افضل الحاجات اللي ممكن تعمليها للعناية بنفسك وصحتك ، استخدمي النصايح دي لعمل حدود صحية.
