9 انتصارات مش مرتبطة بالميزان تحافظ على تحفيزك لنفسك

لو بتشتغلي على تحقيق هدف صحي او انقاص وزن معين ، هيبقى من السهل جدا انك تنجرفي ورا الارقام على الميزان وتبقى واخدة كل تركيزك ، لما يبقى الميزان هو العامل المحفز الوحيد ليكي ، فلو ماحققتيش التقدم اللي انتي مستنياه ده هيحسسك بالاحباط ، وممكن يأدي كمان انك توقفي روتينك او خطتك ، ولكن التركيز على الانتصارات اللي مش مرتبطة بالميزان زي الطاقة الافضل, تحسين النوم, بشرة نضرة, صحة احسن ، ومن خلال تحويل تركيزك من الرقم الموجود على الميزان للانتصارات غير المرتبطة بالميزان ، ده هيخليكي تلاقي دافع مستمر, وثقة زيادة, وعقلية اكتر ايجابية ، والنهاردة هنشارك معاكي 9 انتصارات مش مرتبطة بالميزان لتعزيز صحتك العامة.

- ايه هي الانتصارات غير المرتبطة بالميزان؟

هي عبارة عن تحسينات في صحتك العامة وتجاوز فكرة الرقم على الميزان او مؤشر كتلة الجسم او حجم الجسم ، تحسين الصحة العامة دي علامة على انك بتحققي تقدم في نظامك الغذائي وروتين اللياقة البدنية اللي مالوش علاقة بالميزان ، والانتصارات غير المرتبطة بالميزان بتنتج عن التغذية, التمارين الرياضية, تغييرات في اسلوب الحياة ، الحاجات دي عادة ممكن تمر على ناس كتير من غير ما يلاحظوها بسبب تركيزهم على الميزان كمقياس للنجاح وتحقيق التقدم ، والانتصارات غير المرتبطة بالميزان ممكن تشمل مستويات الطاقة الاعلى للجسم, النوم افضل, تحسن الحالة المزاجية, قوة وقدرة اكبر للتحمل, الم اقل, زيادة الثقة.

- ليه الانتصارات غير المرتبطة بالميزان مهمة؟

تعتبر مهمة جدا للحفاظ على فقدان الوزن وتحسين الصحة على المدى الطويل ، لما تركزي على الرقم اللي على الميزان بس ، ممكن يكون محبط ، خصوصا لو تقدمك متقلب او ثابت ، لازم يكون الهدف النهائي لاي رحلة صحية او فقدان للوزن هو تحسين صحتك بشكل عام ، وده هيوصلك في النهاية لهدفك في فقدان الوزن.الانتصارات غير المرتبطة بالميزان هتساعدك على الحفاظ على تحفيزك وتعزيز التزامك بأسلوب حياة صحي اكتر ، لانها هتفكرك بالتقدم اللي حققتيه ، بغض النظر عن حجمه ، هتشجعك على التركيز على اللي حققتيه ، بدل التركيز على اللي ماحققتهوش ، وده هيأدي لعقلية اكتر ايجابية وزيادة ثقتك بنفسك.

9 انتصارات مش مرتبطة بالميزان للحفاظ على تحفيزك لنفسك:

1- زيادة الطاقة:

انتبهي لشعورك لما بتمارسي الرياضة اثناء النهار وبتاكلي وجبات مغذية ، هتلاقي نفسك حاسه بزيادة في مستويات الطاقة في جسمك ، وزيادة مستويات الطاقة واحدة من الفوائد الرئيسية عشان تبني اسلوب حياة صحي اكتر ، لما هتسحي بطاقة زيادة ، هتبقي اكتر انتاجية ، وهيكون عندك قدرة على ادارة التوتر بشكل افضل ، وهتعملي الحاجات اللي بتحبيها اكتر.

2- تحسين الحالة المزاجية والصحة العقلية:

اتباع نظام غذائي افضل هيساعدك في تحسين حالتك المزاجية بسبب تأثيره على حاجات زي الالتهابات, سكر الدم, وصحة الامعاء ، والنظام الغذائي الصحي مرتبط بشكل مباشر بتحسين الصحة العقلية وانحفاض الاكتئاب ، النظام الغذائي الغني بالبقوليات والفواكة والخضروات المكسرات ، والتقليل من اللحوم الحمرا والسكريات المضافة ، بالاضافة ان التمارين الرياضية هتساعدك على تحسين صحتك العقلية عن طريق تقليل التوتر والقلق والمزاج السلبي.

3- تحسين النوم:

لو بتمارسي التمارين الرياضية بانتظام وبتعتمدي على نظام غذائي صحي ، فأكيد ان نومك هيتحسن ، التمارين الرياضية هتساعدك على تخفيف التوتر اللي بيخليكي صاحية الليل ، هيساعدك كمان في تقليل المشاكل المتعلقة بالنوم وهيخليكي تنامي بشكل كافي ، كمان بعض الاطعمة ممكن تساعد في قلة النوم او تدهور النوم ، زي الاطعمة الغنية بالصوديوم, الاطعمة الغنية بالدهون والسكر, الاطعمة والمشروبات اللي بتحتوي على الكافيين ، كمان ضروري انك تحاولي تتجنبي الاكل في خلال 3 ساعات قبل النوم ، بالاضافة ان الاكل الصحي والتمارين الرياضية هتأدي لفقدان الوزن بشكل صحي ، وهيساعدك على النوم بشكل اعمق.

4- الم اقل:

فقدان الوزن بيقلل من الضغط على مفاصل الجسم ، وخصوصا الساقين واسفل الضهر ، ولو وزنك بيقل مع مرور الوقت ، هتحسي بألم اقل في المفاصل ، وده بدوره هيخلي من السهل ممارسة تمارين رياضية اكتر والحفاظ على الصحة العامة بقدر الامكان ، بالاضافة انه ثبت ان ممارسة الرياضة بتساعد في السيطرة على حالات الالم المزمن بما فيهم آلام اسفل الضهرو والالم العضلي الليفي, وهشاشة العظام.

5- زيادة الثقة:

لما تلتزمي بأسلوب حياة صحي واظهار نفسك بشكل احلى كل يوم ، ده هيكون ليه تأثير كبير على مستويات ثقتك بنفسك ، الالتزام بممارسة التمارين الرياضية هيخليكي تحسي بالثقة والقوة والقدرة على التغلب على اي حاجة ، اسلوب الحياة الصحي اكتر هيساعدك على بناء ثقة اكبر في مظهرك وشعورك اتجاه نفسك ، بالاضافة انك هتكوني اكتر جراءة في الحاجات اللي تقدري تعمليها.

6- هتعملي الحاجات اللي بتحبيها بشكل اكبر:

لما هتحسي انك اكتر ثقة وقوة ونشاط ، هتقدري تعملي الحاجات اللي بتحبيها بشكل اكبر ، لو اعتمدتي على اسلوب حياة صحي اكتر ، هتلاقي ان عاداتك الجديدة بتسهل عليكي الخروج وعمل الحاجات اللي بتستمتعي بيها اكتر ، سواء ركوب العجلة مع اصحابك , السفر لاماكن جديدة ، وممارسة اي حاجة بتحبيها بشكل عام.

7- تحسين القوة والقدرة على التحمل:

لما تنتظمي على روتين لياقة بدنية ، هتلاحظي مع الوقت انك تقدري ترفعي اوزان اتقل ، وجسمك يقدر يعمل مجهود اكبر ، وممارسة الرياضة لفترة اطول ، هتحسي بتحسن عند ممارسة الرياضة او المشي ، وهتحسي بشكل عام بتحسن في ممارسة الانشطة مقارنة باللي كنتي عليه اول ما بدأتي.

8- بشرة صافية اكتر:

التمارين الرياضية ممكن تساعد في تعزيز مظهر بشرتك بطرق كتير ، بتساعد على تحسين تدفق الاكسجين لبشرتك ، وده هيحسن مرونتها ، وهيقلل من التوتر اللي ممكن يضر بشرتك ، هيعزز انتاج الكولاجين ، وهيعزز نمو الخلايا ، ولما نيجي للنظام الغذائي ، العادات الصحية بما فيهم شرب كمية كافية من الماية ، وزيادة مضادات الاكسدة والفواكة والخضروات والمكسرات والبقوليات الغنية بالبوليفينول ، بالاضافة للبروبيوتيك ، هتساعدك على تعزيز صحة بشرتك.

9- تحسين المؤشرات الطبية:

لما تعملي تغييرات صحية على نظامك الغذائي وروتين التمارين الرياضية ، هيظهر تحسن على مؤشرات صحية مهمة زي الكوليسترول, سكر الدم, ضغط الدم ، ده هيطمنك بأن التغييرات اللي عملتيها ساعدت على تحسين صحتك وده هيحفزك على الاستمرار في روتينك الصحي الجديد.هل انتي مستعدة تعملي بعض التغييرات الصحية؟ خلي الانتصارات غير الرتبطة بالميزان دي تخليكي متخفزة وتشجعك على البداية في تغيير روتينك او الاستمرار لو بدأتي بالفعل وحاسه انك هتكسلي.