طريقة عمل سيروم فيتامين E لبشرة نضرة خالية من البقع في 7 ايام بس
كلنا محتاجين لبشرة نضرة ومثالية ، وبنستخدم منتجات كتير مكوناتها كلها بتعتمد على المواد الكيميائية ، ولكن مش بنفكر ابدا في الآثار الجانبية للمنتجات دي ، عشان كده احنا دايما بنشجع على استخدام الوصفات اللي بتعتمد على مكونات طبيعية للحصول على بشرة نضرة خالية من العيوب ، والنهاردة هنشارك معاكم طريقة عمل سيروم فيتامينE لنضارة وتفتيح البشرة..
هتحتاجي:
- 4 معالق كبيرة من جل الصبار.
- 4 معالق كبيرة ماية ورد.
- 2 كبسولة فيتامين E.
- 5 – 6 نقط من زيت الليمون.
طريقة التحضير:
1- هاتي زجاجة صغيرة غامقة وضيفي لها جل الصبار وماية الورد.
2- رجيهم مع بعض لخلطهم.
3- ضيفي فيتامينE وزيت الليمون واخلطيهم كويس مع بعض.
4- كده يبقى السيروم جاهز ، رجيه قبل كل استخدام.
طريقة استخدامه:
- نضفي بشرتك بالغسول المناسب ، وبعدها خدي كام نقطة من السيروم وزعيهم على بشرتك بحركات دائرية لحد ما الجلد يمتصه كويس.
- استخدمي السيروم كل يوم قبل النوم.
- تقدري كمان تستخدمي السيروم ده كمرطب للايدين.
فوايد المكونات:
- ماية الورد:
ماية الورد بتحتوي على مواد كيميائية طبيعية نشطة بيولوجيا بتدي بشرتك فوايد مذهلة ، بالاضافة ماية الورد بتحتوي على العناصر الغذائية المفيدة للبشرة ، بما فيهم فيتامين أ, بـ 3, هـ, ومضادات الاكسدة ، بتحتوي كمان على فيتامين سي اللي بيساعد على تحسين انتاج الكولاجين في بشرتنا ، فيتامين سي بيحتوي كمان على خصائص مرطبة بتساعد على ترطيب البشرة الجافة.
- جل الصبار:
الصبار بيساعد على ايقاف الاعراض المبكرة للشيخوخة ، زي التجاعيد والخطوط الرفيعة ، كمان من افضل فوايد الصبار للبشرة هو قدرته على تغذية البشرة بفضل العناصر الغذائية اللي بيحتوي عليها ، كمان السكريات المتعددة الموجودة في الصبار مفيدة جدا في تعزيز تجديد خلايا الجلد ، بالاضافة ان الصبار مضاد طبيعي للبكتيريا وبيحارب البكتيريا المسببة لحب الشباب ، بالاضافة انه مفيد في علاج حب الشباب والبثور بفضل خصائصة المنظفة والمضادة للميكروبات.
- زيت فيتامين E:
بيساعد على ترطيب وتغذية البشرة ، بيزود من توهج البشرة وبيحافظ عليها صحية وناعمة ، بالاضافة انه بيساعد في الحفاظ على صحة الجلد ، وبيقلل من فرط التصبغ والتجاعيد ، ومضادات الاكسدة الموجودة فيه بتساعد على تعزيز تدفق الدم وبالتالي بيأخر عملية الشيخوخة وبيساعد على شد البشرة ، زيت فيتامين E يعتبر كمان مرطب طبيعي للبشرة ، والدراسات كمان اثبتت انه مفيد لعلاج الصدفية.
- زيت الليمون:
زيت الليمون يعتبر معزز رائع للبشرة ، وبيدي البشرة توهج ونعومة ، الحمض اللي موجود فيه بيساعد على تنضيف البشرة وتفتيحها لانه بيزيل الجلد الميت وبيعزز نمو الجلد الجديد ، كمان غني بفيتامين سي اللي يعتبر مفيد جدا في علاج البقع الغامقة, البقع العمرية, والنمش ، بالاضافة ان فيتامين سي بيساعد على ابطاء الخلايا اللي بتنتج الميلانين في الجلد ، وده بيساعد على منع اسمرار البشرة.
