غسول الشاي الاخضر والعسل للبشرة

دمج منظف البشرة في نظام العناية ببشرتك هي خطوة مهمة جدا للحفاظ على صحة البشرة ، والغسول مش المفروض يتميز بس بفعاليته في التنضيف ، ولكن كمان ضروري يساهم في اشراقة ونضارة البشرة ، وفي كتير من انواع الغسول في السوق المعمولة مخصوص لانواع البشرة المختلفة ، ولكن كتير من المنتجات دي بيبقى تساؤلات كتير خصوص المكونات اللي داخلة في تركيبتها ، وغالبا بتحتوي على مواد كيميائية مضرة ومكونات قاسية ليها آثار جانبية ضارة على بشرتك.

اختيار الغسول بيحتاج حذر شديد ، لانه بيستخدم بشكل يومي على البشرة ، وانسب وافضل بديل للمنتجات التجارية هي عمل حاجة طبيعية غير مضره ، من خلال اختيار المكونات المناسبة المناسبة لنوع بشرتك واحتياجاتها ، تقدري تستفادي من عالم علاجات العناية بالبشرة الطبيعية ، وتختاري مكونات مفيدة وآمنة على بشرتك.

والنهاردة من خلال المقال بتاعنا هنشارك معاكم وصفة بسيطة لعمل غسول طبيعي للبشرة ، والاستفادة من مكوناته الطبيعية ، مش بس لتنضيف البشرة ، ولكن كمان هيعزز من اشراق البشرة ونضارتها وهيحميها من التلف ، بالاضافة لحماية البشرة من ظهور حب الشباب والالتهابات.

طريقة عمل غسول الشاي الاخضر والعسل للبشرة:

هتحتاجي:

- 2 معلقة كبيرة عسل.

- 2 معلقة كبيرة من زيت الافوكادو.

- 2 معلقة كبيرة من الصابون القشتالي السائل ، او اي نوع صابون طبيعي (ممكن صابون جوز الهند, صابون الغار, صابون زيت الزيتون).

- كيس شاي اخضر ، او معلقة كبيرة.

- 5 نقط من زيت شجرة الشاي.

- 2 – 3 معالق كبيرة ماية مقطرة (من الصيدلية).

طريقة التحضير:

- لو هتستخدمي الصابون القشتالي هتضيفيه على طول لباقي المكونات ، لكن لو هتستخدمي صابون طبيعي عادي ابشريه وخدي منه معلقتين كبار وضيفي له شوية ماية مغليه وقلبيه لحد ما يدوب.

- في الخلاط حطي الصابون ، وضيفي له الشاي الاخضر, الماية المقطرة, العسل, وزيت الافوكادو, وزيت شجرة الشاي ، واضربيهم مع بعض كويس.

- صبي الخليط في زجاجة اي غسول قديم عندك او اي زجاجة فاضية تكون بمضخة عشان تسهل عليكي الاستخدام.

- وكده يبقى الغسول جاهز للاستخدام اليومي.