طرق ازالة الاظافر الاكريليك في البيت بنفسك
الاظافر الاكريليك هي اظافر صناعية بيتم تثبيتها على اطراف الصوابع وبتبقى كأنها ضوافر طبيعية ، وبتكون قوية وبتثبت فترة على الضوافر ، وفي حين اننا ممكن نشيل الاظافر الاكريليك في صالون متخصص ، ولكن النهادرة من خلال موضوعنا هنسهل عليكي المهمة دي ، وهنتعرف مع بعض على طرق ازالة الاظافر الاكريليك بنفسك في البيت باستخدام بعض العلاجات الطبيعية.
1- الماية الدافية:
هحتاجي:
- ماية دافية.
- 1 معلقة صغيرة ملح.
الطريقة:
1- سخني الماية لحد ما تبقى دافية ، اتأكدي ان الماية مش سخنة اوي ولا باردة اوي ، الغرض الرئيسي من الماية الدافية هي تليين الاظافر الاكريليك والغرا اللي موجود تحتها.
2- لما الماية تبقى دافية بدرجة كافية ، ضيفي لها الملح وسيبيه لحد ما يدوب.
3- دلوقتي اغمسي صوابعك في المحلول ده لمدة 15 دقيقة تقريبا.
4- بعد 15 دقيقة هتلاحظي ان الضوافر بقت ناعمة اكتر وهتقدري تشيليها بسهولة ، دي تعتبر من اسهل واامن الطرق.
2- طريقة الفويل:
هتحتاجي:
- مبرد ضوافر.
- مقص ضوافر.
- مزيل طلاء اظافر.
- قطع قطن.
- قطع من ورق الفويل.
- زيت جوز الهند.
الطريقة:
1- قصي الجزء العلوي من الضوافر الاكريليك باستخدام مقص ضوافر حاد لان الاظافر الاكريليك بيكون صعب قصها شوية ، لحد ما توصلي لاطراف صوابعك.
2- بعد قص الضوافر نعميها باستخدام المبرد.
3- لو حاطه اي مانيكير شيليه بمزيل طلاء الاظافر.
4- دلوقتي اغمسي قطع القطن في مزيل طلاء الاظافر او الاسيتون ، اتأكدي ان القطن مشبع بالاسيتون بشكل كامل.
5- حطي قطع القطن على ضوافرك ولفي الضوافر بورق الفويل.
6- سيبي ضوافرك عليها قطع القطن وملفوفة بالفويل لمدة 20 دقيقة تقريبا.
7- دلوقتي شيلي ورق الفويل مع قطع القطن وهتلاقي الضوفر الصناعي انفصل بسهولة عن ضوافرك الطبيعية ، ولو لقيتي الضوفر لسه مش بيطلع معاكي ، لفيه مرة كمان بالقطن وورق الفويل وسيبيه شوية.
8- في الاخر ادهني ضوافرك بزيت جوز الهند لترطيب الضوافر والجلد اللي حوالين الضوافر بعد عملية الازالة ، دي كمان تعتبر من اسهل واامن الطرق لازلة الضوافر الاكريليك.
3- طريقة برد الاظافر:
هتحتاجي:
- مبرد اظافر.
- مقص اظافر.
- مرطب.
الطريقة:
1- باستخدام المقص شيلي الجزء العلوي من الضوافر.
2- دلوقتي باستخدام المبرد ، ابدأي ابردي حواف الضوافر بالاضافة للجزء اللي في النص منه.
3- استمري في برد الضوافر لحد ما تحسي انك وصلتي لضوافرك الطبيعية.
4- هتلاقي الضوافر الاكريليك اتشالت بسهولة بعد البرد المستمر.
5- بعد ازالة الضوافر الاكريليك ، استخدمي مرطب لضوافرك الطبيعية وللجلد اللي حوالين الضوافر.
4- طريقة خيط الاسنان:
الطريقة دي مش هتقدري تعمليها الا بمساعدة شخص تاني.
هتحتاجي:
- ستيك الجلد اللي حوالين الضوافر.
- خيط تنضيف الاسنان.
- مزيل طلاء الاظافر.
- مرطب.
- مبرد اظافر.
الطريقة:
1- شيلي اي مانيكير من على الضوافر الاكريليك باستخدام الاسيتون.
2- دلوقتي باستخدام ستيك الجلد اللي حوالين الضوافر ، ارفعي الضوفر بالراحة ، بحيث يبقى في مساحة تدخلي الخيط.
3- دلوقتي خلي الشخص اللي معاكي يدخل خيط الاسنان ويمسك طرفين الخيط بايدية الاتنين.
4- باستخدام حركة المنشار ، حركي خيط الاسنان تحت الضوفر ، هتلاقي الضوفر انفصل عن ضوافرك الطبيعية.
5- شيلي اي غرا باقي على ضوافرك الطبيعية باستخدام مبرد الاظافر ، وبعدها رطبي الضوافر بكريم مرطب او زيت.
اساطير وحقائق عن الاظافر الاكريليك:
- الاسطورة: ان الوان الاظافر الاكريليك والغرا ممكن يدخل لمجرى الدم.
الحقيقة: كل السوائل المستخدمة اثناء وضع الضوافر الاكريليك بتبدأ في التصلب وبتبقى صلبة في خلال دقايق ، وبالتالي لا يمكن امتصاصها في مجرى الدم.
- الاسطورة: الاظافر الاكريليك ممكن تضر ضوافرك الطبيعية.
الحقيقة: الضوافر الطبيعية مش هيحصلها اي ضرر الا اذا استخدمتي منتجات مش مناسبة ، وعند وضع الغرا لازم التأكد انه مايجيش على الجلد ، وماتحاوليش تسحبي الضوافر بقوة ابدا بعد تثيتها لان ده ممكن يضر الضوافر الطبيعية.
