اسرار 90% من الرجالة بيخافوا منها ومش بيتكلموا عنها ابدا

النهاردة موضوعنا مش هنتكلم عن مخاوف النساء ، ولكن في حالات كتير من العلاقات المرأة بتكون هي القوية والرجل هو ملك الدراما ، وده مش تقليل من شأن الرجل ولكن هي توضيح ان زي ما الستات ليهم مخاوف ، الرجالة كمان ليهم مخاوفهم ، على مر العصور في صورة نمطية في اذهاننا عن الرجالة انهم رمز للقوة ومالهمش مخاوف ، ولكن ده ببساطة مش صحيح ، النهاردة هنشارك معاكم 15 حاجة بتقلق معظم الرجالة لكن مش بيصرحوا بيها.

1- شكل الجسم:

النساء بيتم توعيتهم من سن صغير عن اجسامهم وازاي يهتموا ويعتنوا بيه من خلال نظام غذائي صحي واسلوب حياة صحي اكتر عشان يحافظوا على جسمهم ، وده مش معناه ان الرجالة مش بيهتموا باجسامهم بالتمارين الرياضية والاكل الصحي ، لكن الرجالة كمان بيلفت نظرهم شكل الموديلز الرجالة وبيقارنوا نفسهم بيهم وده السبب اللي بيدفعهم للاهتمام بشكلهم ومظهرهم ، وممكن يكون اكبر مخاوف الرجل هي الكرش اللي مش بيقدر يتخلص منه بسهولة.

2- الفلوس:

الرجالة غالبا بيكون اكبر قلق ليهم هو الفلوس ، لان الراجل هو المسؤول عن اسرته ، فدايما بيكون قلقان على الناحية المالية ، حتى لو معندوش اسرة ، ولان الحب والاهتمام والرعاية هي حاجات مهمة بالنسبة للمرأة ، ففكر الراجل دايما هنلاقيه بيدور حوالين توفير احتياجات شريكته.

3- الطول:

الصورة المثالية في ذهن الراجل "هي الراجل الطويل" ، ومن زمان دايما كان بيتوصف حلم المرأة في الروايات الرومانسية هو "الراجل الطويل, الاسمر. الوسيم" ، فالطول مهم جدا بالنسبة للراجل ، وعنده مخاوف دايما انه يتوصف بانه "قصير".

4- رؤيته لباقي الرجالة كتهديد:

الرجالة بيحسوا بالغيرة ، على الرغم من انها مش بتبقى واضحة زي غيرة النساء ، ولكن الراجل بيشوف اي راجل تاني في محيط شريكته هو تهديد محتمل ليه ، وده بيقلل من تقديره لنفسه ، وحتى لو شريكك مابينش انه قلقان لو شافك بتتكلمي مع زميل ليكي في الشغل ، ولكن جواه بيبقى في مقارنات بينه وبين الشخص ده ، وفي الحالة دي هيكون عليكي تبيني له ان هو رقم واحد في حياتك.

5- تجربة علاقات سيئة:

الحقيقة ان الرجالة بيخافوا من الوقوع في غلطات في العلاقات زي النساء بالظبط ، وبيبقى عنده انعدام امان او خوف انه يعمل اخطاء مع شريكته ممكن تأثر على العلاقة ، ولكن التفاهم والتنازلات والاهتمام هي اللي بتخلي العلاقة آمنه وبتحافظ على ثقة كل طرف في التاني.

6- مشاكل الشعر:

دي حقيقة ان الرجالة عندهم خوف من الوصول لمرحلة الصلع ، حتى الشعر على جسمهم ممكن يبقى مشكلة بالنسبة لهم ، هل هو كتير اوي او قليل اوي؟ وغالبا كتير من الرجالة بيبقى عندهم قلق من تسريحات شعرهم هل هي فوضوية او مرتبة وشكلها حلو او مش رجولية ما فيه الكفاية ، الشيب كمان مشكلة تانية بالنسبة لهم وخوفهم من ان سنهم يبان اكبر ، ويبدأوا يفكروا في صبغ شعرهم.

7- النظام الغذائي:

شائع جدا اننا نسمع اي واحدة بتقول "انا ماشية على نظام غذائي" ولكن عدم سماع راجل بيقول كده مش معناه انه مش بيهتم بأكله ، في الايام دي عدد كبير من الرجالة بيهتموا بمظهرهم وشكل جسمهم وبينتبهوا لاكلهم ، والحفاظ على صحتهم كويسة ، رغم انهم مش بيتكلموا عن ده كتير.

8- علاقته بشريكته:

كتير من المقالات بتتكلم عن مشاكل العلاقات من وجهة نظر المرأة ، ولكن ده مش معناه ان الرجالة مش بيهتموا بالعلاقة ونجاحها ، الحقيقة ان الرجالة بيهتموا جدا بشريكاتهم وبيخافوا انهم يبوظوا العلاقة ، ولكن هما اقل في التعبير والكلام عن ده.

9- علاقات شريكته السابقة:

لو شريكته ليها تجربة سابقة سواء خطوبة او علاقة حب ده بيخلق عند الراجل مشاكل في تقدير الذات ، وبيعتبر الراجل السابق ده علامة على المنافسة وانه محتاج يظهر انه افضل منه ، والمشكلة التانية اللي ممكن تواجه الراجل في الحالة دي انه يكون اقل خبرة من المرأة ، وده بيشوه الى حد ما شعوره بالرجولة ، ولكن احنا بنقول للراجل هنا ماتقلقش ، لان المرأة الجيدة مجرد ما يكون في حياتها راجل بتحبه ، مش هتقارنك بأي حد ولا هتهتم بتجاربك السابقة مادام انت بتهتم بيها وبتحبها.

10- التعبير عن المشاعر:

كام واحد سمع وه صغير جملة "ماتعيطش! انت راجل!" الجملة دي تقريبا مترسخة في نفسية الراجل من صغره ، وللسبب ده غالبا الراجل بيخاف من التعبير عن مشاعره بشكل واضح ، عشان كده من اكبر الغلطات ان الام والاب يزرعوا الفكرة دي في اي طفل لانها بتأدي لمشاكل واحباطات مكبوتة في المستقبل ، الراجل مش هيكون ابدا اقل رجولة لو عيط او عبر عن مشاعره ، التعبير عن المشاعر مش علامة ضعف ابدا.

11- بيخاف انه يكون مش راجل بمعنى الكلمة:

بالنسبة لكل النساء ، كام مرة وقفت مستمتعة وهي بتشوف شريكها بيصلح اي حاجة في البيت بنفسه ، بالنسبة للرجالة بيشوفوا ان دي علامة انهم رجالة حقيقين مسؤولين ، ولو مش هيقدروا يعملوا ده ، ممكن يسبب لهم شعور بعدم الكفاءة ، ولكن ده في الحقيقة مفهوم غلط ، لو مقدرتش تصلح حاجة في البيت ده مش هيقلل من رجولتك ، وافتكر دايما ان شريكتك اختارتك مش عشان تصلح لها كل حاجة في البيت ، ولكن عشان عايزاك تهتم بيها هي مش بحاجات البيت.

12- الخوف من الدكتور لعمل فحوصات معينة:

صدقي او لا ، ولكن دي اسمها متلازمة "البالطو الابيض" ، وهي ان عدد كبير من الرجالة بيخافوا من فحص مناطقهم الحساسة عند الدكتور ، او يروحوا يعملوا فحوصات متعلقة بالبواسير او مشاكل البروستاتا ، وعلى قد ما يقدروا هيحاولوا يحلوا المشكلة بنفسهم لحد ما يبقى مافيش قدامهم اي اختيار تاني غير انهم يروحوا للدكتور.

13- عدم الاحتياج ليه:

الرجالة بيحبوا يحسوا انهم مهمين ، سواء من خلال المساعدة في البيت, توفير احتياجات الاسرة, تقديم الدعم لزوجته, الرجالة عادة بيبقوا في حالة رضا لما يحسوا انك محتاجة لهم ، ولكن لو الراجل حس انه مش مهم ، وانك شايفاه مجرد مصدر للفلوس بس ، ده ممكن يجرحه جدا.

14- خيبة الامل:

صدقي او لا ، ولكن الحقيقة ان الرجالة بيخافوا من خيبة الامل وخذلان النساء ، وبيخافوا من الوقوع في الاخطاء ، او انهم يقولوا حاجة تزعل شريكاتهم ، او نسيان حاجة طلبتي منه يعملها ، وخيبة الامل بتأدي للشعور بعدم الاهمية والرفض ، وعلى الرغم من القوة اللي بيتمتع بيها الراجل ، الا انه غالبا النساء هما ليهم التأثير في البيت من خلال التأكيد والحميمية ، فلما الراجل يسعى للحميمية ويتم رفضه بسبب حاجة غلط عملها ، فده بيأثر عليه وبيخوفه جدا.

15- الرفض:

اخيرا ، الراجل عنده خوف من الرفض ، لما الراجل بيتم رفضه ، ده بيشكل عنده اهانه لانانيته ونفسيته الذكورية ، وعلى الرغم ان المجتمع دايما عنده صورة نمطية ان الراجل بيتحمل الرفض ، ولكن الحقيقة انهم بيلاقوا صعوبة في تقبل ان الست اختارت واحد تاني غيره ، لما الراجل بيسمع كلهمة "لا" بيلاقي صعوبة في قبولها ، ولكن بطبيعة الحال ، الراجل السوي عاطفيا هيتغلب في النهاية على المواقف دي ، ولكن الرفض في بدايته بسيبب له جرح عميق وبياخد وقت طويل للشفاء منه.