كريم ليلي طبيعي لشد الرقبة والتخلص من التجاعيد
لما بتفكري في العناية بالبشرة وخصوصا منع علامات الشيخوخة ، الخطأ الاول اللي بتقعي فيه انك بتنسي الرقبة من روتين العناية ، الرقبة بتظهر عليها علامات الشيخوخة بشكل اسرع من باقي البشرة ، وبيبدأ يظهر عليها التجاعيد والجلد المترهل ، عشان كده ضروري اننا نهتم بالعناية بمنطقة الرقبة ، لمنع علامات الشيخوخة وترهل الجلد ، والنهاردة من خلال موضوعنا هنشارك معاكم طريقة عمل كريم طبيعي لشد الرقبة والتخلص من التجاعيد.
هتحتاجي:
- 1/3 كوباية من زبدة الشيا.
- 3 معلقة كبيرة من جل الصبار.
- 1 معلقة كبيرة عسل.
- 2 معلقة كبيرة من زيت الارجان.
- 1 معلقة كبيرة من زيت جوز الهند.
- 15 نقطة من زيت الجزر.
طريقة التحضير والاستخدام:
1- باستخدام حمام ماية سخنة ، دوبي زبدة الشيا وزيت جوز الهند مع بعض.
2- بعد ما يدوب ضيفي لهم زيت الارجان وقلبيهم مع بعض كويس.
3- ارفعي الخليط من على النار وسيبيه يبرد لحد ما يوصل لدرجة حرارة الغرفة.
4- ضيفي للخليط جل الصبار والعسل وقلبيهم لحد ما يمتزجوا مع بعض كويس.
5- اخر حاجة ضيفي زيت الجزر ، وقلبي كويس لحد ما الخليط يبقى ناعم وكريمي.
6- صبي الخليط في علبة او برطمان صغير.
7- تقدري تخزني الكريم ده في التلاجة لمدة توصل لاسبوع لو مستخدميه جل صبار طازة.
8- ولو مستخدمة جل صبار من الجاهز ، تقدري تخزني الكريم لمدة شهر واحد.
9- قبل النوم ، اغسلي بشرتك كويس ودلكيها بالكريم على رقبتك من تحت لفوق ، وتقدري تستخدميه كان للوجه ، التدليك بيساعد ان الكريم يتغلغل في البشرة بعمق.
10- سيبيه طول الليل على بشرتك واغسليه الصبح.
فوايد المكونات:
- زيت جوز الهند: هو مضاد للاكسدة قوي وبيساعد على ازالة الجذور الحرة اللي بتضر البشرة وبتسبب ظهور التجاعيد ، بالاضافة انه بيرطب البشرة وبيمنع ترهلها.
- زيت الارجان: غني جدا بالاحماض الدهنية الاساسية ، وليه خصائص مرطبة ومضادة للشيخوخة ومضادة للاكسدة ، ويعتبر افضل علاج مضاد للشيخوخة بسبب محتواه العالي من حمض اللينوليك اللي بيعزز المرونة الطبيعية للجلد وبيشد المسام ، وبيزود من معدل تجديد البشرة وبيعزز مرونتها ، ولان زيت الارجان مرطب قوي فهو بيحبس الرطوبة وبيخلي البشرة شكلها ممتليء وناعمة.
- العسل: بيساعد في تحسين مظهر البشرة ، من خلال منع ظهور التجاعيد, الحفاظ على شباب البشرة, تجنب التهابات الجلد اللي ممكن تزود من علامات الشيخوخة ، بالاضافة للبروبيوتيك والفيتامينات والعناصر الغذائية والانزيمات الموجودة في العسل بتساعد على تغذية البشرة وترطيبها ، وبيحافظ على رطوبة البشرة وبيرجعها لحالتها الطبيعية من غير ما يسبب جفافها او تهيجها ، ورغم انه مش بيزيل التجاعيد تماما الا انه بيقلل من ظهورها بشكل كبير.
- جل الصبار: بيساعد على زيادة الكولاجين في البشرة بشكل طبيعي ، وده بدوره بيساعد على تقليل علامات الشيخوخة ، زي الخطوط الرفيعة والتجاعيد ، الكولاجين بيساعد على تقليل التجاعيد وتقوية الجلد ، وبيزود من مرونة الجلد.
- زبدة الشيا: هي عامل مرطب طبيعي للبشرة ، وبتحتوي على خصائص مهدئة ومضادة للشيخوخة ، وبتساعد على تنعيم البشرة وبتمنع علامات الشيخوخة.
- زيت الجزر: يعتبر هو الافضل لما الموضوع يتعلق بعلامات الشيخوخة ، الزيت بيجمع ما بين فيتامين أ اللي بيحسن البشرة ، وفيتامين سي اللي بيعزز الكولاجين ، وفيتامين E المرطب ، وبيساعد على تنعيم الخطوط, وعلاج اضرار اشعة الشمس, والجروح, واي مشاكل تانية في الجلد.
