افضل 4 مكونات للبشرة الحساسة
الاشخاص اصحاب البشرة الحساسة بشكل خاص بيعانوا من تحسس بشرتهم بسرعة من اي حاجة تقريبا ، وبيكون التعامل معاها مجهد جدا وبتحتاج عناية خاصة ، ومش بنقدر نحدد سبب تهيج البشرة وتحسسها من البداية ، ولكن مع ذلك في حاجات ممكن تمنع تحسس البشرة من البداية ، والنهاردة من خلال موضوعنا هنشارك معاكم انسب المكونات والمنتجات الطبيعية للبشرة الحساسة.
1- الصبار:
هتحتاجي:
- 2 معلقة كبيرة من جل الصبار.
- 1 معلقة كبيرة من زيت الارجان.
اخلطي الصبار مع زيت الارجان ، واستخدميه كمرطب للبشرة ، تقدري تستخدمي الصبح وبالليل.
الصبار يعتبر من اكتر المكونات المهدئة للبشرة ، وهو مناسب لكل انواع البشرة (بما فيهم البشرة الحساسة) ، الصبار بيحتوي على فيتامينات ومعادن ومضادات اكسدة بتعالج مشاكل البشرة وبتمنع جفافها وتقشرها ، الصبار بيساعد على تهدئة البشرة الملتهبة او المصاة بالحكة بسبب خصائصة الطبيعية المضادة للالتهابات.
2- العسل:
هتحتاجي:
- 1 معلقة كبيرة عسل.
- 1 معلقة كبيرة لبن.
اخلطي العسل واللبن مع بعض ، واستخدميهم كمنظف يومي لبشرتك.
العسل غني بمضادات الاكسدة ، وهو عامل مرطب بيحبس الرطوبة في البشرة ، وبيمنع البكتيريا والالتهابات ، بالاضافة ان العسل سهل تضيفيه لروتين العناية ببشرتك ، تقدري تحطيه مباشرة على بشرتك او تضيفيه لاي مكونات تانية لعمل ماسك للبشرة الحساسة ، ودوري دايما على المنتجات اللي بيكون المكون الرئيسي فيها هو العسل.
3- الشاي الاخضر:
هتحتاجي:
- 1 كيس شاي اخضر.
- كام نقطة من زيت الجوجوبا.
في كوباية ماية دافية انقعي كيس الشاي كام دقيقة ، بعدها خرجي الكيس وضيفي كام نقطة من زيت الجوجوبا واخلطيهم مع بعض كويس ، انقلي الخليط في زجاجة ببخاخ واستخدميه كسبراي مرطب لبشرتك ، اتأكدي من رجه كل مرة قبل الاستخدام.
الشاي الاخضر معروف بأسم نافورة الشباب لانه بيسرع من تجديد خلايا الجلد ، لانه بيحتوي على الكاتيكين والعوامل المضادة للبكتيريا ، الشاي الاخضر بيساعد على تخفيف الالتهاب والاحمرار.
4- زيت الجوجوبا:
كل اللي هتعمليه ادهني بشرتك كلها بزيت الجوجوبا ، وسيبي الزيت يتغلل في بشرتك ، وبعدها تقدري تحطي واقي الشمس.
زيت الجوجوبا يعتبر مرطب طبيعي للبشرة ، بيتم امتصاصه بسهولة لانه اكتر زيت يشبه الزيت الطبيعي للبشرة ، وبالتالي بيخترق الطبقة الخارجية من البشرة بعمق وبيديها التغذية المثالية ، ولانه مضاد للبكتيريا وللالتهابات بشكل طبيعي فهو مثالي للبشرة الحساسة وممكن انه يخفف حالات زي الاكزيما والصدفية ، وتقدري كمان تستخدميه لشعرك وفروة راسك.
