زيت الورد والياسمين لتفتيح الجسم وتعطيره
لو عايزة وصفة طبيعية سهلة لتفتيح الجسم وكمان تعطيره وتنعيمه ، يبقى وصفتنا النهاردة ليكي ، هنشارك معاكم طريقة عمل زيت الورد والياسمين لتفتيح الجسم وتعطيره وتنعيمه.
هتحتاجي:
- ورد مجفف (من عند العطار).
- زيت الياسمين.
- زيت ناقل.
- زجاجة فاضية.
طريقة التحضير:
1- حطي الورد المجفف في زجاجة نضيفة ، المفروض تملي 1/3 الزجاجة بالورد المجفف.
2- املي باقي الزجاجة بأي نوع زيت ناقل تفضليه ، ممكن تستخدمي زيت زيتون, او زيت بذور العنب, او زيت الجوجوبا, او زيت اللوز الحلو, او زيت عباد الشمس ، اقفلي الزجاجة وسيبي الورد منقوع في الزيت لمدة 2 – 3 اسابيع في مكان دافي ومشمس.
3- بعد مدة النقع ما تخلص تقدري تضيفي زيت الياسمين ، ضيفي 5 نقط من زيت الياسمين لكل 10 مل من الزيت الناقل ، وقللي الكمية دي لنقطتين بس لو بشرتك حساسة ، على سبيل المثال ، ممكن تضيفي 30 نقطة من زيت الياسمين لكل 150 مل من الزيت الناقل ، وحوالي 15 نقطة من زيت الياسمين لكل 150 مل من الزيت الناقل لو بشرتك حساسة.
4- تقدري تصفي الزيت من الورد في زجاجة تانية ، ده يرجع لك انتي ، لكن تقدري تسيبيه منقوع في الزيت عادي وتستخدميه.
5- دلوقتي تقدري تستخدمي الزيت على الجسم ، بعد الشاور ادهنيه على جسمك للحصول على التفتيح والتعطير والتنعيم.
والزيت مناسب لكل انواع البشرة ، وبالنسبة للبشرة الحساسة والجافة ، الزيت ده يعتبر مفيد ليهم جدا بشكل خاص ، وهو مثالي جدا لتقليل علامات التمدد في الجسم ، وشفاء ندبات العملية القيصرية.
فوايد المكونات:
- لو هتستخدمي زيت الزيتون في الوصفة كزيت ناقل هتستفادي جدا من فوايده للبشرة ، زيت الزيتون بيساعد على تجديد شباب البشرة بشكل طبيعي ، بيقلل الندبات بعد الجراحة ، كمان زيت الزيتون غني بفيتامين أ, د, هـ, ك ، وكل الفيتامينات دي مفيدة للبشرة ، كمان بيحتوي على فيتامين E اللي يعتبر مضاد للاكسدة بيحمي البشرة من الجذور الحرة.
- زيت الياسمين ، بيستخدم بشكل شائع لعلاج البشرة ، وخصوصا لمنع الالتهابات ، ومكافحة علامات الشيخوخة ، وكمان للبشرة الجافة مفيد جدا لعلاج التهاب الجلد والاكزيما ، بيساعد كمان على تقليل البقع, ازالة الجفاف, تجنب البشرة الدهنية, تقليل التجاعيد والخطوط الرفيعة.
- زيت الورد ، مليان بالفوايد العلاجية للبشرة ، بيساعد على ترطيب البشرة واصلاحها من الندبات, مكافحة الالتهابات, تخفيف التوتر, تعزيز الدورة الدموية ، بيساعد كان على تجديد الانسجة ، ويعتبر مضاد طبيعي للالتهابات.
