مبيض طبيعي تعمليه بنفسك في البيت للحصول على لون بشرة افتح من غير اي آثار جانبية
المبيضات الكيميائية على المدى الطويل ممكن تسبب تلف للجلد ، لانها بتحتوي على مواد بتكون قاسية على البشرة ، عشان كده النهاردة من خلال موضوعنا هنشارك معاكم وصفات تبييض طبيعية للبشرة تجربيها بنفسك في البيت للحصول على بشرة فاتحة خالية من العيوب من غير آثار جانبية.
1- وصفة البطاطس النية:
هتحتاجي:
- 1 حبة بطاطس متوسطة الحجم.
طريقة التحضير والاستخدام:
ابشري البطاطس ، واستخرجي منها العصير ، واحتفطي فيها في برطمان او علبة نضيفة ، دلكي وشك ورقبتك بعصير البطاطس وسيبيه لمدة 15 – 20 دقيقة وبعدها اغسليه بماية باردة ، كرري الوصفة دي يوم ويوم لافضل النتايج.
2- وصفة البطاطس والعسل:
هتحتاجي:
- 1 حبة بطاطس متوسطة.
- 1 معلقة صغيرة عسل نحل.
طريقة التحضير والاستخدام:
ابشري البطاطس واستخرجي منها العصير بتاعها ، ضيفي على عصير البطاطس العسل وقلبيهم مع بعض ، ادهني بشرتك من الخليط وسيبيه لمدة 15 – 20 دقيقة تقريبا ، بعدها اغسلي بشرتك بالماية ، كرري الوصفة كل يومين للحصول على نتايج ممتازة.
3- وصفة البطاطس والجزر:
هتحتاجي:
- 1 حبة بطاطس متوسطة.
- 1 جزرة صغيرة.
- رشة كركم.
طريقة التحضير والاستخدام:
قطعي البطاطس والجزر قطع صغيرة ، واضربيهم مع بعض في الخلاط للحصول على عجينة ناعمة ، حطي الخليط في طبق وضيفي له الكركم وقلبيهم كويس مع بعض ، وزعي الخليط بالتساوي على الوش والرقبة ، سيبيه لمدة 15 – 20 دقيقة بعدها اغسليه بماية فاترة ، كرري الوصفة من 1 – 2 مرة في الاسبوع.
4- وصفة اللبن الرايب والبطاطس:
هتحتاجي:
- 1 حبة بطاطس متوسطة.
- ½ معلقة كبيرة لبن رايب (او لبن عادي).
طريقة التحضير والاستخدام:
قطعي البطاطس مكعبات صغيرة ، وضيفي لها اللبن الرايب واضربيهم مع بعض في الخلاط ، وزعي الخليط على الوش والرقبة وسيبيه لمدة 15 – 20 دقيقة تقريبا ، بعدها اغسلي بشرتك بماية فاترة ، كرري الوصفة مرة او مرتين في الاسبوع لافضل النتايج.
فوايد البطاطس للبشرة:
- البطاطس بتحتوي على خصائص طبيعية لتبييض البشرة.
- تعتبر مصدر غني لفيتامين سي اللي بيساعد على تفتيح البشرة ، كمان بيساعد على انتاج الكولاجين وبالتالي بيحافظ على البشرة ممتلئة وناعمة ، بالاضافة كمان ان فيتامين سي بينظم تركيب الميلانين وبيخلي البشرة صافية وفاتحة.
- البطاطس بتحتوي كمان على فيتامين ب 6 ، اللي بيساعد على تحسين نمو الخلايا الجديدة وتعزيز لون البشرة.
- انزيم الكاتيكولاز الموجود في البطاطس فعال جدا في تفتيح البقع الغامقة, التصبغات, الندبات, وتفتيح البشرة.
- مضادات الاكسدة الموجودة في البطاطس بتساعد على مكافحة الجذور الحرة الضارة ومنع مجموعة متنوعة من اضرار الجلد ، بما فيهم اسمرار الجلد.
- البطاطس بتحتوي على الزنك اللي نقصه ممكن يأدي لعدم توحد لون البشرة واسمرارها ، البطاطس بتعوض نقص العنصر ده ، وبتساعد على اصلاح انسجة الجلد التالفة ، واستعادة صحة البشرة واشراقها.
