كرات التمر وجوز الهند بـ 3 مكونات بس من غير خبز
لو عايزة وصفة حلويات سهلة وسريعة ، النهاردة هنحضر مع بعض كرات التمر وجوز الهند مش هتحتاج اكتر من 3 مكونات بس وهتبقى جاهزة في 10 دقايق بس ، تعتبر وجبة خفيفة وصحية وتقدري تعمليها في اي وقت عايزة فيه حاجة حلوة سريعة.
المكونات:
- 1 كوباية تمر منزوع النوى.
- 1 كوباية لوز.
- ¼ كوباية من جوز الهند المبشور.
- 2 معلقة كبيرة ماية دافية.
الطريقة:
1- في محضر الطعام ، ضيفي التمر واللوز والماية الدافية.
2- اضربي المكونات لحد ما تحصلي على خليط شبه العجينة ، الخليط لازم يكون طري وقابل للتشكيل.
3- اغرفي من الخليط معلقة كبيرة وشكليها على شكل كورة ، كرري نفس العملية لحد ما تخلصي الكمية كلها.
4- اغمسي الكرات في جوز الهند المبشور لحد ما تغطيها كلها.
5- وكده تبقى جاهزة للاكل على طول ، وممكن تحفظيها في علبة محكمة الغلق في درجة حرارة الغرفة لحد اسبوع ، وممكن تحفظيها في التلاجة لحد اسبوعين ، او في الفريزر لمدة توصل ل 3 شهور.
نصايح للوصفة:
- لو التمر اللي متوفر عندك ناشف او جاف شوية ، انقعيه في ماية دافية لمدة 15 دقيقة ، وبعدين صفيه من الماية كويس واستخدميه.
- ممكن قبل ما تفرمي اللوز مع التمر تحمصيه شوية في طاسه على نار ، التحميصة دي بتضيف نكهة حلوة.
- ممكن كمان تضيفي للخليط وانتي بتضربية شريحة زبدة سايحة او زيت جوز هند للحصول على نكهة اضافية.
- ممكن تغلفيها بجوز الهند المبشور زي ما عملنا في الوصفة دي ، او تستبدليه وتغلفيها باللوز المبشور, او الفول السوداني , او الفستق ، ممكن تستخدمي اي نوع مكسرات تفضليه للتغليف.
