عصير القصب – فوايده ووصفات طبيعية لجمال البشرة

تقريبا مافيش حد مش بيحب عصير القصب كمشروب طعمه حلو ومنعش جدا خلال فصل الصيف بشكل خاص ، هو بيحتوي على نسبة عالية من السكر الطبيعي بالاضافة لفوايد صحية كتير ، ولكن يمكن اللي متعرفهوش عن عصير القصب ان هو مفيد كمان للبشرة ، والنهاردة من خلال موضوعنا هنتعرف على فوايد عصير القصب ، وازاي تدخليه في الوصفات الطبيعية.

فوايد عصير القصب:

- للبشرة:

بيساعد على تأخير ظهور علامات الشبيخوخة ، لانه بيحتوي على الفلافونويدات ومضادات الاكسدة اللي بتساعد على تغذية البشرة من الداخل وبتحافظ على نضارتها وترطيبها ، بالاضافة انه بيحتوي على احماض الفا هيدروكسي اللي بتساعد على تعزيز انتاج خلايا جديدة.

- بيحتوي على المعادن الاساسية:

عصير القصب يعتبر مصدر غني بالمعادن زي الكالسيوم والفوسفور ، والمعادن دي مش بتساعد على تقوية العضم بس ، ولكن بتساعد كمان في بناء مينا الاسنان ، كمان شرب عصير القصب بشكل منتظم ممكن يساعد كمان في منع تسوس الاسنان.

- بيوفرالطاقة:

عصير القصب بيعزز مستويات الطاقة في الجسم بشكل فوري لانه بيحتوي على كمية كبيرة من السكر ، والجسم عنده قدرة لهضم انواع مختلفة من السكريات الموجودة فيه بسهولة وبالتالي بيوفر لك الطاقة الفورية.

- بيعالج الحموضة:

عصير القصب ممكن يساعد بشكل كبير على علاج الحموضة ، لانه بيحتوي على خصائص قلوية ، وبالتالي هو بيساعد على تحييد الحمض الزائد الموجود في المعدة ، وده بدوره هيوفرلك الراحة من الحموضة.

- بيحتوي على فيتامين سي:

عصير القصب بيحتوي على نسبة عالية من الزنك وفيتامين سي ، وللسبب ده ممكن استخدامه لعلاج التهابات الحلق المفاجئة.

- بيساعد على بناء المناعة:

عصير القصب معروف انه بيساعد بشكل كبير على التئام الجروح ، وكمان بيساعد في اصلاح الخلايا بشكل اسرع.

وصفة عصير القصب لبشرة نضرة وصحية:

هتحتاجي:

- 2 معلقة كبيرة من عصير القصب.

- 1 معلقة كبيرة من طين البشرة (من عند العطار).

طريقة التحضير والاستخدام:

1- اخلطي عصير القص مع الطين كويس ، لحد ما يتكون عجينة سلسة.

2- وزعي العجين على بشرتك وسيبيها لحد ما تنشف تماما.

3- بعدها اغسلي بشرتك بماية فاترة.

4- كرري الوصفة مرة واحدة في الاسبوع.

تحذير: ماتستخدميش الوصفة دي لو بتعاني من حب الشباب ، وده لان العصير غني بالسكر ، وممكن الجراثيم المسببة لحب الشباب تتغذى على السكر ده وتتكاثر وتزود من مشكلة حب الشباب.

ولو مريض بالسكري لازم يشرب من العصير بحذر وباعتدال.