جربي خدعة الثوم للحصول على ضوافر طويلة وصحية في اسبوع واحد بس
في بعض العلاجات المنزلية اللي ممكن نعملها باستخدام مكونات من مطبخنا ، تساعدنا في الحصول على ضوافر طويلة وقوية وصحية ، والنهاردة في المقال بتاعنا هنشارم معاكم طريقة تجربة خدعة الثوم للحصول على ضوافر صحية في اسبوع واحد بس.
للعلاج ده هتحتاجي:
- 1 ثمرة برتقان (ممكن تستبدليه بالليمون).
- 1 فص ثوم.
- 1 كوباية زيت زيتون.
طريقة التحضير والاستخدام:
1- قطعي البرتقان لشرايح واستخرجي منه العصير بتاعه.
2- افرمي الثوم لحد ما يبقى ناعم.
3- ضيفي الثوم المفروم لعصير البرتقان ، وسيبيه لمدة 5 دقايق.
4- بعدها انقعي ضوافرك في خليط الثوم لمدة 15 دقيقة.
5- دلوقتي ضيفي زيت الزيتون لطبق نضيف.
6- شيلي ضوافرك من خليط الثوم وانقعيهم في زيت الزيتون.
7- سيبي ضوافرك في زيت الزيتون لمدة 10 – 15 دقيقة كمان ، وبعدها امسحي ايدك بقطعة قماش.
8- ماتغسليش ايدك بالماية بعد نقعها ، نامي بيها كده واغسليها الصبح ، للحصول على افضل النتايج.
9- كرري العملية دي مرة كل يومين بانتظام لحد ما تلاحظي نتايج واضحة على ضوافرك.
- الثوم ، بيحتوي على نسبة عالية من السيلينيوم ، اللي هتساعد ضوافرك تنمو بشكل اقوى بسهولة وهتمنعها من التكسر ، بالاضافة انه بيوفر للضوافر المعادن زي الكالسيوم, المغنيسيوم, الزنك, الحديد, البوتاسيوم.
- عصير البرتقان ، بيحتوي على نسبة عالية من مضادات الاكسدة اللي هتساعد على نمو وتقوية الضوافر.
- زيت الزيتون ، بيساعد على ترطيب الضوافر وبيديها لمعان طبيعي عن طريق منعها من التقشر والتكسر.
طرق تانية لاستخدام الثوم على الضوافر:
1- ممكن ببساطة تجيبي فص ثوم وتقطعيه من فوق وتفركيه على ضوافرك بالكامل لحد ما اكبر كمية من خلاصة الثوم تغطي ضوافرك كلها.
2- قشري فص من الثوم واهرسيه وضيفيه لزجاجة طلاء اظافر ، سيبيه منقوع لمدة 10 – 15 يوم ، وبعدها ابدأي استخدام مقوي الاظافر على ضوافرك.
3- قشري كام فص من الثوم وانقعيهم في طبق مليان ماية سخنة لمدة 10 – 15 دقيقة ، بعدها افرمي الثوم واخلطيه مع كبسولة فيتامينE وعصير ليمون ، وزعي الخليط على ضوافرك مرة واحدة يوميا ، هتلاحظي نتايج فعالة على ضوافرك مع الاستخدام المنتظم.
4- تقدري تحضري زيت الثوم بنفسك عن طريق اضافة الثوم المفروم لزيت الزيتون في طاسة على النار ، سخني الزيت ده لمدة 10 دقايق وبعدها ارفعيه من على النار وسيبيه لحد ما يبرد ، صفي الزيت وادهني بيه ضوافرك مرة واحدة يوميا وسيبيه طول الليل.
5- ضيفي كام فص ثوم لكمية من الماية واغليهم على النار لمدة 10 – 15 دقيقة ، خرجي الثوم من الماية وسيبيه لحد ما يبرد ، وكل اللي هتعمليه انقعي ضوافرك في ماية غلي الثوم لمدة 15 – 20 دقيقة ، وبعدها اغسلي ايدك بماية باردة.
