حافظي على علاقتك قوية بشريكك بال 9 نصايح دي

هل بتدوري على طرق لرفع علاقتك لمستوى اقوى؟ بناء علاقة قوية ومحبة ودائمة بيحتاج بذل مجهود واهتمام باستمرار ، رعاية علاقتك هي عملية مستمرة ، وفي حاجات تقدري تعمليها على اساس يومي عشان تفكري شريكك بمدى اهميته بالنسبة لك وللحفاظ على علاقة قوية ، والنهاردة من خلال موضوعنا هنشارك معاكم 9 نصايح لعلاقة قوية مع شريكك.

دمج الايماءات والحاجات البسيطة اللي ليها معنى في روتينك اليومي ممكن تعزز علاقتك بشكل كبير جدا ، والافعال دي على الرغم من صغرها وبساطتها ، الا انه ليها تأثير عميق على شعور شريكك وعلى علاقتك بشكل عام.

تخيلي انك تبدأي كل يوم برسالة حب وغزل لشريكك وهو في الشغل ، او حضن دافي قبل ما ينزل الشغل ، الافعال البسيطة دي بتقوي الروابط بينك وبين شريكك ، تخصيص الوقت للاستماع باهتمام, والتعبير عن الامتنان, دعم اهداف واحلام كل طرف للتاني دي هيقوي علاقتكم يوم بعد يوم.

والنهاردة في المقال بتاعنا ، هنشارك معاكم مجموعة نصايح تقدري تدمجيها في روتينك اليومي للحفاظ على علاقتك قوية ، وكلها حاجات بسيطة وسهلة التنفيذ ولكن بتضمن لك استمرار حبك وتعميقه مع كل يوم بيمر بينكم.

9 نصايح لعلاقة قوية مع شريكك:

1- افتكري انك تبتسمي كتير:

دي لفتة بسيطة جدا ، لكن فعالة جدا ، لما تبتسمي ده هيدخلك في مود افضل بشكل فوري ، ومعروف ان الاتسامة معدية ، يعني لو ابتسمتي اللي حواليكي هيستجيبوا بالمثل ، وده مهم بشكل خاص لما الموضوع يتعلق بالعلاقات ، ابتسمي له وهو في المقابل اكيد هيبتسم لك وده بدوره هيخليكوا تحسوا بالسعادة وهيبقى بينك رابطة اقوى.

2- امدحيه كتير:

لو عايزة حبيبك يبقى رومانسي اكتر او يعمل حاجات تحسسك بالحب ، افضل طريقة عشان تديه اشارة هي انك تمدحيه حتى على أبسط الحاجات ، لو حضنك او جابلك ورد او هدية ولو بسيطة ، اشكريه وامدحيه ، ليه ده فعال؟ لانه لما يعرف انه متقدر وانك بتلاحظي الحاجات الصغيرة اللي هو بيعملهالك ، ده هيشجعه يعملك اكتر ، ده هيقطع شوط كبير جدا في تقوية ونجاح علاقتك.

3- اظهري الامتنان للي عندك:

الشعور بالامتنان للي عندك هو وسيلة اكيدة لارسال المشاعر الايجابية لشريكك ، والشعور ده يعتبر تذكير دائم ليكي عن انك راضية وسعيدة مع شريكك ، والشعور بالامتنان ده مش مجرد حاجة تمارسيها في العلاقات بس ، ولكن كمان لازم تكوني ممتنة لكل حاجة في حياتك.

4- افتخري بيه قدام الناس:

التباهي والفخر بيه قدام الناس ، ده هيعزز عنده فكرة انك محظوظة لوجودك معاه ، وهيعزز ثقته في نفسه ، وده كله هيأدي لحياة اسعد وعلاقة اقوى بينكم.

5- ماتنسيش آداب التعامل بينكم:

كتير من الازواج ممكن مع الوقت والتعود على بعض ينسوا آداب التعامل ، ببساطة لما مثلا يساعدك في البيت او يجيب لك حاجة ماتنسيش تقولي له "شكرا" او لما تطلبي منه حاجة تقولي له "من فضلك" كجزء من محادثتكم اليومية ، بغض النظر عن مدى قربكم من بعض او سنين الجواز بينكم ، مهم انك تكوني مهذبة وتعاملوا بعض بنفس الاحترام اللي بتعاملوا بيه شخص غريب عمل حاجة لطيفة او خدمة ، دي لفتة بسيطة بتساعد في الحفاظ على علاقة سعيدة وايجابية.

6- ممارسة الهوايات مع بعض:

بغض النظر عن مدى استقرار علاقتكم ، دايما في طرق تعمليها ممكن من خلالها تحسني العلاقة ، فكري في الهوايات المشتركة بينكم او حتى فكري في ابتكار هوايات جديدة ، ممكن تتعلموا اي مهارة مع بعض ، تسافرو سوا وتعملوا قايمة بالاماكن اللي عايزين تزوروها.

7- خليكي مؤمنة بيه:

ركزي على افضل الصفات في شريكك ، وقولي له انك مؤمنة بيه ، وهو في المقابل هيبقى مؤمن بيكي ، وده هيبني عندكم عقلية ان مافيش حاج مستحيلة وانكم ممكن تعملوا اي حاجة مع بعض ، ولكن ده اكيد مش معناه انك تؤمني بيه بأكبر من قدراته ، في النهاية مافيش حد مثالي ، ماتحطيش توقعات فلكية ، ولكن خدي وقتك وحددي الحاجات اللي بتحبيها فيه ، ده هيضمن علاقة قوية ودايمة.

8- اعملي حاجات تفاجئه:

جربي تعملي الحاجات اللي ممكن تخلي حياته اسهل حتى لو بسيطة وصغيرة ، على سبيل المثال ، لو مثلا قضى يوم مرهق في الشغل ، اعملي له وجبته المفضلة ولما يرجع البيت يتفاجأ بيها ، او تعملي له عصيره المفضل اول ما يرجع من الشغل بعد يوم طويل ومرهق يشربه ، او اعملي له نوع حلويات هو بيحبه ، لو عنده مكتب او مكان بيشتغل فيه في البيت رتبيه ونظميه عشانه ، كلها حاجات بسيطة ولكن تظهرله مدى اهتمامك بيه.

9- خليكي داعمة ليه:

اكيد في ايام زوجك هيمر فيها بأوقات صعبة او ضغوطات ، ممكن يواجه صعوبة في مشروع عمل ، او واجه اي مشكلة في الشغل ، بغض النظر عن اللي بيمر بيه ، مهم انك تقدمي له الدعم ، وشجعيه يعمل حاجات تخرجه من مود الضغط ، شجعيه مثلا يدخل ياخد شاور ويلبس هدومه وتنزلوا تتمشوا مع بعض ، او تروحوا تاكلوا في مطعمه المفضل ، تشجيعه في الاوقات الصعبة هيفكره دايما انك بتلعبي دور مهم فعلا في حياته.