6 اطعمة محتاجة تتجنبيهم للتخلص من دهون البطن

التخلص من دهون البطن ممكن يكون مش سهل ، ولكن كمان هو مش الصعوبة اللي انتي متخيلاها ، انتي محتاجة بس تعرفي تعملي ده بشكل صح عشان تلاقي نتايج ملحوظة ، والنهاردة من خلال موضوعنا هنشارك معاكم 6 اطعمة تتجنبيهم للتخلص من دهون البطن.

1- منتجات الالبان:

عدم تحمل اللاكتوز امر شائع ، ولكن في كتير من الاشخاص بيكونوا مش مدركين انهم مصابين بيه ، واللاكتوز بيخلي جسمك منتفخ وده بيدي انطباع ان في دهون زيادة ، وبالتالي المفروض تتجنبي اكل منتجات الالبان لان ده هيساعدك على الهضم والتخلص من الانتفاخ.

2- الاطعمة المصنعة:

محدش يقدر ينكر ان الاطعمة المصنعة ، زي الدوناتس, المافن والمعجنات بشكل عام لذيذة جدا وكلنا بنحبها ، ولكن هي غنية بالمواد الحافظة والسكريات اللي بتزود دهون البطن.

3- الشيبسي:

البطاطس الشيبسي بيحتوي على كميات كبيرة من الصوديوم ، وده معناه ان جسمك هيحتفظ بوزن الماية وهيخليكي اتقل ، بالاضافة كمان ان الزيوت الموجوة فيها ممكن انها تسبب الاصابة بأمراض القلب وزيادة نسبة الكوليسترول ، عشان كده لازم تتجنبيها او على الاقل تاكليها بشكل نادر.

4- البيتزا:

البيتزا تقريبا من الاكلات المفضلة عند كتير من الاشخاص وبيكون صعب عليهم تجنبها ، ولكن للاسف هي بتحتوي على مكونات غير صحية زي اللحوم المصنعة والدقيق ، ولكن ممكن تعمليها في البيت بمكونات بديلة صحية اكتر ، بدل الجاهزة.

5- السلطات الجاهزة:

السلطة في حد ذاتها مش هي اللي غير صحية ، ولكن السلطات اللي بتكون موجودة في المطاع غالبا بتحتوي على صوصات دهنية وده بيزيل العناصر الغذائية اللي فيها.

6- الايس كريم:

كمان الايس كريم من الاطعمة اللي ممكن تسبب زيادة دهون البطن ، عشان كده الافضل تتجنبيه او تقللي منه على قد ما تقدري.

ودي تعتبر بعض الاطعمة من اطعمة تانية كتير بتأدي لدهون البطن ، كل الاطعمة المصنعة, السكريات. الاطعمة المقلية, النشويات المكررة زي (الارز الابيض, الخبز الابيض, المكرونة البيضا, الاطعمة اللي معمولة من الدقيق الابيض بشكل عام) ، اتأكدي انك تحذفيها من نظامك الغذائي عشان تتخلصي من دهون البطن بشكل اسرع.