جل ليلي للحصول على بشرة صافية خالية من العيوب

نبات النيم ، معروف بفوايده الطبية والتجميلية ، وبيدخل في كتير من علاجات التجميل ، سواء لعلاج البثور ، او علاج مشكلة حب الشباب ، او تهدئة البشرة المتهجية ، النيم يعتبر علاج متعدد الاستخدامات ، والنهاردة هنشارك معاكم طريقة عمل جل النيم للحصول على بشرة صافية خالية من العيوب.

المكونات:

- 1 معلقة صغيرة من النيم المطحون (من عند العطار).

- 4 معلقة كبيرة من جل الصبار.

- زيت شجرة الشاي (اختياري).

طريقة التحضير:

- اخلطي النيم المطحون مع جل الصبار ، وامزجيهم مع بعض كويس للحصول على جل ناعم.

- اختياري ، ممكن تضيفي كام نقطة من زيت شجرة الشاي واخلطيه معاهم كويس.

- انقلي الجل في علبة او برطمان زجاجي للاستخدام.

- تقدري تخزنيه في التلاجة ، هيفضل صالح للاستخدام لمدة توصل لشهر.

طريقة الاستخدام:

- خدي كمية صغيرة من الجل ودلكي بيها بشرتك في حركات دائرية ، استخدميه يوميا قبل النوم وسيبيه واغسليه الصبح ، لعلاج مشاكل البشرة المختلفة زي البثور, حب الشباب, الرؤوس السودا.

- للحصول على فوايد اضافية ، ضيفي ½ كوباية ماية ورد للجل ، وجمديه في قوالب التلج ، واستخدمي مكعب واحد من تلج النيم والصبار على بشرتك يوميا ، الطريقة دي بتساعد على تهدئة البشرة المتهجية, تقليل البثور, تنقية البشرة.

فوايد جل النيم:

1- بيحتوي على خصائص مضادة لحب الشباب:

بيزيل البثور, بيقلل علامات وندبات حب الشباب ، وبيساعد على تنقية البشرة.

2- التحكم في الزيوت:

بيساعد على قتل البكتيريا وتقليل الزيوت ، وده بيخليه مفيد للبشرة الدهنية والمعرضة لحب الشباب.

3- تنضيف المسام:

بينضف المسام المسدودة ، بيقلل من الرؤوس السودا والبيضا ، والصبار بيساعد على ترطيب البشرة.

4- الوقاية من حب الشباب:

مزيج النيم مع زيت شجرة الشاي بيساعد على علاج حب الشباب ، ومنع نمو البكتيريا المسببة لحب الشباب.

5- مكافحة الشيخوخة:

مضادات الاكسدة الموجودة في جل النيم بتساعد على ازالة التجاعيد, الخطوط الرفيعة, وعلامات الشيخوخة.

من خلال دمج جل النيم في روتين العناية ببشرتك ، هتحصلي على بشرة صحية وصافية ونقية.