طريقة عمل اكلير مثالي
الوصفة اللي معانا النهاردة تعتبر افضل وصفة لطريقة عمل الاكلير الفرنسي الكلاسيكي في البيت خطوة بخطوة ، تابعي معانا المقال واتعرفي على الطريقة بالخطوات.
المكونات:
- 60 جرام ( 1/3 كوباية) زبدة غير مملحة.
- 40 جرام ( ¼ كوباية) ماية.
- 60 جرام ( ¼ كوباية) لبن كامل الدسم.
- ¼ معلقة صغيرة ملح.
- 1 معلقة صغيرة سكر.
- 70 جرام ( ½ كوباية) دقيق.
- 110 جرام ( ½ كوباية ) بيض.
طريقة التحضير:
1- انخلي الدقيق وسيبيه على جنب.
2- في حلة على نار متوسطة ، ضيفي الزبدة, الماية, اللبن, الملح, السكر.
3- لما الخليط يبدأ في الغليان ، ارفعيه من على النار ، وضيفي الدقيق مرة واحدة مع التقليب بقوة بمعلقة مطاطية لحد ما تتشكل عندك كورة ناعمة والدقيق يندمج تماما.
4- رجعي الحلة على النار تاني لمدة 3 – 5 دقايق على نار متوسطة مع التقليب المستمر ، خلال الوقت ده الماية هتتبخر من العجينة وهتلاحظي ان في طبقة جلد رقيقة اتكونت في الحلة من تحت.
5- انقلي العجينة لوعاء الخلاط وابدأي في الخفق على سرعة منخفضة لمدة دقيقة لحد ما العجينة تبرد شوية.
6- ابدأي في اضافة البيض المخفوق للعجينة اثناء تشغيل الخلاط ، وضيفي كمية صغيرة من البيض كل مرة وسيبي الخلاط يدمج البيض قبل ما تضيفي كمية تانية ، لما العجينة تتجمع مع بعض وتبقى بتلمع وقوامها مناسب انها تنزل من انبوبة التشكيل بسهولة كده تبقى جاهزة.
7- وهتتأكدي ان العجينة جاهزة لما تلاقيها بتنزل ببطء من مضرب الخلاط ، المفروض العجينة ماتكونش سايلة اوي ولا سميكة اوي ، وتقدري تظبطي القوام باضافة البيض والدقيق ، لو لقتيها سميكة اوي تبقى محتاجة بيض اكتر ، ولو سايلة اوي تبقى محتاجة دقيق.
8- انقلي العجينة لكيس المعجنات مع شكل نجمة لتشكيل العجينة ، ودخلي العجينة في التلاجة ترتاح لمدة 1 – 2 ساعة.
9- بمجرد ما العجينة ترتاح ، ابدأي في تشكيلها ، هاتي صينية عليها ورق زبدة ، وابدأي شكلي قطع اكلير متساوية جنب بعض ، وسيبي مسافة كافية بينهم عشان لما تتنفخ ما تلزقش في بعض ، الكمية دي هتعملك تقريبا 14 قطعة اكلير.
10- رشي العجينة بالسكر البودرة ، ده هيساعد ان قطع الاكلير ماتشققش في الفرن ، دخلي الصينية الفريزر لمدة 30 دقيقة على الاقل قبل الخبز ، وتقدري تجمديها لوقت اطول مافيش مشكلة.
11- سخني الفرن على درجة حرارة 200 درجة مئوية ، من غير مروحة.
12- بعدين خفضي الفرن ل 170 درجة مئوية (من غير مروحة ) ودخلي الاكلير الفرن اخبزيه لمدة 40 دقيقة ، وماتفتحيش الفرن اول 30 دقيقة ، وهتتأكدي انه استوى كويس لما يبقى لونه دهبي ومنتفخ كويس ، ومش بينكمش في درجة حرارة الغرفة بعد ما تخرجيه من الفرن.
13- سيبي الاكلير يبرد ، وبعدها تقدري تحشيه بكريمة المعجنات (كريمة باتيسيير) بالشوكولاتة او الفانيليا.
طريقة عمل كريمة باتيسيير:
المكونات:
- 480 جرام ( 2 كوباية ) لبن كامل الدسم.
- 100 جرام ( ½ كوباية ) سكر ناعم.
- 80 جرام ( 1/3 كوباية ) صفار بيض ، تقريبا صفار 4 – 5 بيضات.
- 25 جرام ( 3 معالق كبيرة) نشا.
- 25 جرام ( 3 معالق كبيرة) دقيق.
- 2 معلقة صغيرة فانيليا سايلة.
- 55 جرام ( ¼ كوباية) زبدة غير مملحة ، طرية بدرجة حرارة الغرفة.
طريقة التحضير:
1- في طبق كبير بما فيه الكفاية ، باستخدام مضرب يدوي ، اخفقي السكر وصفار البيض مع بعض لحد ما يبقى الخليط ناعم وخفيف ، تقريبا لمدة 1 – 2 دقيقة.
2- اخفقي معاهم النشا, الدقيق, الفانيليا ، لحد ما المكونات تمتزج كويس وتبقى عجينة ناعمة.
3- سخني اللبن في حلة على نار متوسطة ، واول ما يبدأ يغلي ارفعيه من على النار.
4- صبي اللبن فوق خليط صفار البيض ببطء مع الخفق بقوة باستخدام المضرب اليدوي ، في المرحلة دي الخليط هيبدأ يتقل شوية.
5- صبي الخليط في الحلة مرة تانية ، على نار متوسطة لمدة دقايق لحد ما يتقل ، حوالي 1 دقيقة بعد الغليان الاول ، ممكن الخليط يتكتل شوية في البداية ، لكن ما تقلقيش ، استمري في التقليب هتلاقي الكريمة بقت ناعمة معاكي وبتلمع.
6- ولو لسه حاسه ان في كتل ، ممكن تصفي الكريمة للتخلص من اي كتل.
7- ضيفي الزبدة الطرية للخليط ، واخلطيها بمعلقة مطاطية لحد ما تمتزج كويس ، ضيفي الزبدة على 3 مراحل مع الخلط كويس بعد كل اضافة.
8- لو عايزة الكريمة تبقى بالشكولاتة ، لكمية الكريمة دي ، سيحي 100 جرام (2/3 كوباية ) شوكولاتة ، وضيفيها للكريمة وهي دافية وقلبيهم مع بعض ، وممكن تعملي نصها كريمة فانيليا ونصها شوكولاتة ، استخدمي نص كمية الشوكولاتة (50 جرام) مع نص كمية الكريمة.
9- قبل ما تستخدمي الكريمة في الاكلير ، سيبيها تبرد تماما قبل استخدامها ، حطي الكريمة في طبق كبير وغطيها بغطا بلاستيك لتجنب تشكل طبقة جلد على السطح.
10- بمجرد ما تبرد ممكن تحتاجي خفق الكريمة مرة تانية للحصول على ملمس ناعم ، ولكن ما تبالغيش في الخلط ، عشان ما تبقاش سايلة ، اضربيها بس كام ضربة لحد ما تبقى ناعمة ، واستخدميها املي بيها الاكلير ، او اي معجنات محتاجة تتحشي كريمة.
