10 وجبات خفيفة هتحسسك بالشبع وتساعدك على تخسيس وزنك بشكل أسرع

هل بتحسي بالجوع بعد وقت قصير من اكل وجباتك؟ او بتحسي انك عايزة تاكلي وجبات خفيفة في وقت متأخر بالليل على الرغم من انك واكلة وجبة العشا من فترة قصيرة؟ وعشان تحسي بالشبع من غير ما تاكلي سعرات حرارية اضافية ، النهاردة هنشارك معاكم 10 وجبات خفيفة صحية هتخليكي تحسي بالشبع لفترة اطول.

1- اللوز:

اللوز يعتبر وجبة خفيفة رائعة لاشباع جوعك ، لانه بيحتوي على نسبة عالية من البروتين ، بالاضافة انه قنبلة طاقة ، وبالتالي يعتبر وجبة خفيفة مثالية لبداية اليوم ، عشان كده بننصحك تاخدي معاكي كمية من اللوز وانتي رايحة الشغل او الجامعة او المدرسة.

2- عين الجمل:

لو مش بتحبي اللوز ، جربي عين الجمل ، او ممكن تمزجيهم مع بعض للحصول على وجبة طاقة مثالية ، العناصر الغذائية الموجودة في عين الجمل بتساعد على تنشيط منطقة في المخ بتساعد على التحكم في الجوع ، وبالتالي مش هتحسي بالجوع بسرعة.

3- الكينوا:

الكينوا هو عبارة عن بذور خالية من الجلوتين وغنية بالبروتين ، وكمان هي مصدر كبير للالياف ، والبروتين والالياف هيخلوكي تحسي بالشبع لفترة اطول.

حضري طبق من سلطة الكينوا للشغل او الجامعة او المدرسة.

4- الافوكادو:

الافوكادو بيحتوي على كمية عالية من البروتين والالياف ، وبالتالي هتحسي بالشبع لفترة اطول ، بالاضافة انه مكون تقدري تدخليه في وصفات كتير جدا.

5- بذور الشيا:

لو بتحسي بالجوع بسرعة ، اعملي عصير من بذور الشيا ، لان بذور الشيا حجمها بيتضاعف هتملى المعدة وهتخليكي تحسي بالشبع لفترة اطول.

6- البيض:

هل بتدخلي البيض في وجبة الفطار؟ لو الاجابة لا ، يبقى هتحسي بالجوع بسرعة ، البيض يعتبر مصدر غني بالبروتين والدهون الصحية ، جربي كل يوم طريقة مختلفة لعمل البيض في وجبة الفطار ، مش هتحسي بالملل من اكل البيض كل يوم.

7- الحمص:

الحمص كمان يعتبر اختيار مثالي كوجبة خفيفة صحية ، لانه غني بالبروتين والالياف اللي هتخليكي تحسي بالشبع لفترة اطول ، جربي تاكلي سلطة الحمص مع تشكيلة خضروات متقطعة ، كوجبة خفيفة مثالية.

8- البروكلي:

بغض النظر عن كل الفوايد الصحية للبروكلي ، الا انه كمان غني بالبروتين والالياف اللي هتحسسك بالشبع لفترة طويلة ، 91 جرام (1 كوباية) من البروكلي المفروم بتحتوي على 2 جرام من الالياف و 3 جرام من البروتين.

9- الزبادي:

لو بتحسي بالجوع بسرعة ومش عايزة تحسي بالذنب بعد اكل وجبة خفيفة سعراتها الحرارية عالية ، جربي الزبادي ، ممكن تضيفي عليها شوية من بذور الشيا للحصول على اقصى قدر من الامتلاء لمعدتك.

10- الزنجبيل:

مشروب الزنجبيل ثبت ان عنده القدرة انه يخليكي تحسي بالشبع لفترات اطول.