طريقة عمل كيكة نابليون

ريهام محمود

في

حلويات

كيكة نابليون هي كيكة روسية كلاسيكية لذيذة جدا ، بتتكون من طبقات رقيقة مع حشوة كريمية من الفانيليا ، والنهاردة من خلال موضوعنا هنتعرف على طريقتها بالخطوات والفيديو.

المكونات:

مكونات عجينة الباف باستري:

- 540 جرام (4 1/3 كوباية) دقيق.

- 1 معلقة صغيرة ملح.

- 400 جرام ( 1 ¾ كوباية) زبدة غير مملحة باردة ، متقطعة قطع صغيرة.

- 1 معلقة صغيرة خل ابيض.

- 270 جرام ( 1/5 كوباية) ماية باردة جدا.

مكونات حشوة الكريمة:

- 5 كوبايات لبن كامل الدسم.

- 250 جرام (1 ¼ كوباية) سكر ناعم.

- 200 جرام ( ¾ كوباية) صفار بيض ، حوالي 10 - 13 صفار بيض.

- 62 جرام ( ½ كوباية) نشا.

- 62 جرام ( ½ كوباية) دقيق.

- 125 جرام ( ½ كوباية ) زبدة غير مملحة.

- 190 جرام ( ¾ كوباية) زبدة غير مملحة.

طريقة التحضير:

تحضير حشوة الكريمة:

1- في طبق كبير باستخدام مضرب يدوي ، اخفقي السكر, صفار البيض لحد ما يبقى عندك خليط ناعم وخفيف لمدة 1 – 2 دقيقة تقريبا ، اخلطي معاهم النشا, الدقيق, الفانيليا ، وقلبي لحد ما تمتزج المكونات كويس وتحصلي على عجينة ناعمة.

2- حطي اللبن في حلة على نار متوسطة ، لحد ما يبقى دافي ، ارفعيه من على النار وصبيه فوق خليط صفار البيض اللي حضرناه ، وقلبيهم مع بعض كويس ببطء وبقوة باستخدام المضرب اليدوي.

3- صبي الخليط مرة تانية في الحلة وحطيه على نار متوسطة لمدة دقايق لحد ما قوامه يتقل ، تقريبا بعد دقيقة من الغليان الاول ، هتحسي انها اتكتلت معاكي شوية لكن ماتقلقيش ، استمري في التقليب لحد ما الكريمة تبقى ناعمة ومافيهاش اي كتل.

ضيفي ½ كوباية من الزبدة الناعمة بدرجة حرارة الغرفة واخلطيها بمعلقة مطاطية لحد ما تندمج بالكامل مع الكريمة ، والافضل تضيفي الزبدة على 3 مراحل وتخلطي بعد كل اضافة.

4- غطي الكريمة بكيس بلاستيك عشان وشها ماينشفش ، وسيبيها على جنب.

5- لكريمة موسلين لتزيين الكيكة من بره ، اخفقي ¾ كوباية زبدة في درجة حرار الغرفة لمدة 1 – 2 دقيقة ، وضيفي لها ½ كمية الكريمة اللي حضرناها على 4 مراحل لحد ما الكريمة توصل لقوام خفيف ، وماتبالغيش في الخفق لان الخليط ممكن يبقى سائل اوي او يتخثر منك ، والكريمة في المرحلة دي ممكن تبقى طرية اوي بسبب الزبدة ، ممكن تدخليها التلاجة لمدة ساعة لتبريدها قبل استخدامها.

تحضير عجينة الباف باستري:

1- اخلطي الماية مع الخل ، ودخليهم التلاجة لمدة 10 دقايق.

2- قطعي الزبدة قطع صغيرة ودخليها التلاجة لمدة 10 دقايق.

3- في طبق كبير اخلطي الدقيق مع الملح.

4- ضيفي قطع الزبدة الباردة للدقيق وقلبي الخليط بصوابعك لحد ما الزبدة تغطي الدقيق كله.

5- باستخدام معلقة مطاطية ، ابدأي باضافة خليط الماية والخل للدقيق ببطء ، وانتبهي انك تحطي الماية بالتدريج لانك ممكن ماتحتاجيش الكمية كلها ، وقفي اضافة الماية بمجرد ما العجينة تبقى رطبة بدرجة كافية ، ضيفي كمية ماية لحد ما العجينة تلم معاكي.

6- بمجرد اضافة الماية ، اعجني العجينة بلطف لمدة 10 – 20 ثانية ، لحد ما تتماسك.

7- لفي العجبنة في غلاف بلاستيك ودخليها التلاجة لمدة ساعة واحدة.

تحضير طبقات الباف باستري:

1- افردي العجينة بحجم 25 في 45 سم ، طبقي اطراف العجينة اللي فوق واللي تحت على بعض ، وافردي تاني ، كرري نفس العملية 6 مرات طبقي وافردي ، وبعد كل تطبيقة او تطبيقتين ريحي العجينة من 30 – 60 دقيقة ، ولكن ما تزوديش عن تطبقتين من غير ما تريحي العجينة.

2- بعد التطبيقة ال 6 ، دخلي العجينة التلاجة لمدة ساعة قبل الاستخدام.

الخبز:

1- سخني الفرن على درجة حرارة 190 درجة مئوية.

2- قسمي العجينة ل 9 قطع ، وافردي كل واحدة على شكل دايرة رفيعة ، وباستخدام قالب وسكينة ، اقطعي دايرة من العجينة مقاس 16 سم ، واحتفظي باللي طلع من العجينة هنستخدمه لتزيين الكيكة.

3- هاتي صينية كبيرة غطيها بورق زبدة ، حطي 2 - 3 وحدات من عجينة الباف باستري حسب حجم الصينية ، واعملي على العجينة من فوق ثقوب باستخدام الشوكة ، غطي العجينة بطبقة تانية من ورق الزبدة ، وحطيها فوقيها صينية تانية ، عشان تمنعي الباف باستري يتنفخ زيادة ، وسوي باقي العجينة بنفس الطريقة.

4- اخبزي العجبنة على درجة حرارة 190 درجة مئوية لمدة 30 دقيقة ، لحد ما يبقى لونها بني دهبي.

5- اخيرا العجينة اللي احنا قطعناها اثناء التشكيل ، اخبزيها على صينية على درجة حرارة 190 درجة مئوية لمدة 15 – 20 دقيقة او لحد ما لونها يبقى بني دهبي ، وسيبيها تبرد لحد ما توصل درجة حرارة الغرفة ، وباستخدام محضرة الطعام او كيس زيبلوك واطحنيها لحد ما قوامهم يبقى شبه الرملة ، هنستخدمها لتزيين الكيكة.