حاجة واحدة بس محتاجة تاكليها على الفطار لو عايزة تقللي انتفاخ البطن

انتفاخ البطن مشكلة بتحصل لاشخاص كتير ، واكيد احساس مزعج لما تبدأي بيومك وانتي حاسه بعدم الراحة ، ولكن الخبر الحلو ان وجبة الفطار هي الوقت المناسب عشان تدخلي بعض المكونات في وجبتك اللي ممكن تساعد في تقليل الانتفاخ.

التخلص من انتفاخ البطن:

المكون اللي معانا النهاردة هو الموز ، الموز من الحاجات اللي هتحسسك بالتحسن الصبح ، وخبراء التغذية بيرجعوا فايدة الموز الصبح ، لانه فاكهة منخفضة الفوماب (السكريات قليلة التعدد, السكريات الثنائية, السكريات الاحادية, البوليولات) ، وده معناه ان معدتك هتبقى اقل عرضة للازعاج خصوصا لو معدتك حساسة ، كمان الموز بيحتوي على الالياف ، وده مفيد لعملية الهضم ، كمان الالياف بتساعد في الحفاظ على انتظام امعائك وبتمنع الامساك اللي ممكن يخليكي تحسي بالانتفاخ ، كمان اكل الموز هيخليكي تحسي بالشبع لفترة اطول ، وبالتالي ده هيقلل احتمالية انك تاكلي اكتر خلال اليوم.

الموز هيقلل احتباس الماية:

حاجة كمان مفيدة في الموز هو انه بيساعد في منع وتقليل الانتفاخ لانه مليان بالبوتاسيوم ، والبوتاسيوم بيساعد في التحكم في مستويات الصوديوم في الجسم ، وده بدوره هيقلل من احتباس الماية والانتفاخ ، ومش بس كده الموز كمان بيحتوي على عناصر غذائية مهمة زي فيتامين ب 6 اللي بيدعم صحة الجهاز الهضمي بشكل عام.

باختصار ، اكل موزة الصبح ممكن يبقى مفيد جدا لجهازك الهضمي ويخفف من انتفاخ معدتك ، ممكن كمان تضيفي شرايح الموز لطبق من الشوفان المليان بالالياف للحصول على وجبة فطار لذيذة ومغذية ومفيدة لمعدتك.

في حد لاكل الموز:

على قد ما الموز مفيد زي ما قولنا ، الا انه في حد لكمية الموز في اليوم ، الافضل اكل من 1 – 2 موزة في اليوم ، لان اكل كمية اكتر من الموز ممكن يسببلك زيادة وزنك لانه بيحتوي على الكربوهيدرات والسكر.

اتأكدي ان نظامك الغذائي بيحتوي على مزيج من الفواكة والخضروات المختلفة لتحقيق التوازن ، لو بتاكلي كمية كبيرة من الموز مع غيرها من الاطعمة اللي بتحتوي على نسبة عالية من البوتاسيوم ، ممكن يسبب لك ما يسمى "فرط البوتاسيوم في الدم" اللي ممكن يسبب الضعف, التعب, التنميل, الوخز.

الافوكادو مش افضل فكرة للفطار:

الافوكادو مع التوست ممكن يكون مش افضل اختيار لوجبة الفطار ، الافوكادو بيحتوي على حاجاة مفيدة زي فيتامينات ب ومضادات الاكسدة ، ولكن مش بيحتوي على نسبة عالية من البروتين ، والبروتين مهم لوجبة الفطار ، لانه بيدي الجسم طاقة وهيخليكي تحسي بالشبع لفترة اطول ، ووجبة الفطار اللي مش بتحتوي على كمية كافية من البروتين هتخليكي تحسي بالجوع بسرعة ، والرغبة في اكل اكلات وجبات خفيفة غير صحية.

كمان نوع الخبز مهم جدا ، الخبز الابيض مصنوع من الحبوب المكررة ومش بيحتوي على الالياف المفيدة للمعدة والهضم ، بالاضافة انك هتحتاجي لاكل حوالي 8 شرايح من الخبز الابيض للحصول على نفس القدر من الالياف الموجودة في شريحة واحدة بس من خبز الحبوب الكاملة ، عشان كده الخبز الابيض بيتم هضمه بسرعة ، وهيخليكي تحسي بالجوع تاني بسرعة.