زيوت ليها مفعول السحر على بشرتك
الزيوت الاساسية ممكن توفر حل فعال جدا لاي نوع من مشاكل الجلد ، كل نوع زيت اساسي بيحتوي على خصائص فريدة جدا بتساعد في حماية بشرتك من التأثيرات السيئة المختلفة ، في المقال بتاعنا النهاردة هنتعرف على فوايد واستخدامات بعض الزيوت العطرية اللي ليها مفعول السحر على بشرتك.
1- زيت شجرة الشاي لعلاج حب الشباب:
فوايده:
- يعتبر زيت شجرة الشاي فعال جدا في علاج كل انواع التهابات حب الشباب على البشرة.
- الخصائص المختلفة المضادة للالتهابات الموجودة في الزيت ده بتساعد على تهدئة الالم والتورم والاحمرار.
طريقة استخدام الزيت:
الطريقة 1: ماسك لعلاج حب الشباب
هتحتاجي:
- 1 نقطة من زيت شجرة الشاي.
- 1 معلقة كبيرة من جل الصبار.
امزجي المكونات مع بعض ، وزعي الخليط على البشرة وركزي على المناطق المصابة بحب الشباب ، سيبيه لحد ما ينشف لمدة 2 – 3 دقايق ، بعدها اغسلي البشرة وحطي مرطب ، ويفضل كمان تعملي الماسك قبل النوم وتسيبيه على بشرتك طول الليل.
الماسك ده هيساعد على علاج التهابات حب الشباب من غير ما يسيب اي ندبات على بشرتك.
الطريقة 2: علاج فوري لحب الشباب
هتحتاجي:
- 1 نقطة من زيت شجرة الشاي.
- كام نقطة ماية عادية او من اي زيت حامل.
اخلطي زيت شجرة الشاي مع الماية او الزيت الحامل ، وحطيه مباشرة على المناطق المصابة بحب الشباب.
2- زيت اللافندر لتفتيح البشرة:
فوايده:
- زيت اللافندر بيحتوي على خصائص مضادة للالتهابات ومضادة للفطريات.
- هيساعد على علاج الاكزيما من بشرتك, والتهابات الصدفية, وتفتيح البشرة.
- هيساعد على تنضيف البشرة وتقليل التهيج والاحمرار.
طريقة استخدام الزيت:
الطريقة 1: غسول البشرة بزيت اللافندر
هتحتاجي:
- 5 – 10 نقط من زيت اللافندر.
- 3 معالق كبيرة من اي نوع صابون طبيعي (ممكن صابون زيت زيتون دوبيه على حمام ماية سخنة).
- معلقة كبيرة من اي زيت مغذي زي زيت الجوجوبا, او الزيتون, او اللوز, او زيت الارجان.
دوبي الصابون على حمام ماية سخنة ، امزجي معاه باقي المكونات ، وصبي الخليط في زجاجة بمضخة ، خدي كمية صغيرة من الغسول ده ودلكي بيها البشرة لمدة دقايق زي طريقة استخدام الغسول العادي وبعدها اغسليه بالماية ، استخدمي الغسول ده يوميا بشكل منتظم.
الطريقة 2: تونر زيت اللافندر
هتحتاجي:
- 2 نقطة من زيت اللافندر.
- 1 معلقة صغيرة ماية ورد.
- وسادة قطنية.
اخلطي المكونات مع بعض ، اغمسي القطن في الخليط وامسحي بيه بشرتك كلها بعد تنضيفها بالغسول.
3- زيت اللبان لشد البشرة:
فوايده:
- زيت اللبان بيحتوي على خصائص معينة لاعادة تشكيل الانسجة ، وخصائص مضادة للالتهابات.
- بيساعد على شفاء الجروح بشكل سريع ، وتضييق المسام.
- بيعالج علامات الشيخوخة المبكرة, التجاعيد, ندبات حب الشباب.
- بيتحكم في انتاج الزهم في بشرتك وبيمنع التهابات حب الشباب.
طريقة استخدام الزيت:
الطريقة 1: حمام بخار للبشرة بزيت اللبان
هتحتاجي:
- 3 نقط من زيت اللبان.
- 2 نقطة من زيت الجيرانيوم.
- طبق مليان ماية سخنة.
- فوطة.
ضيفي الزيوت العطرية للماية السخنة ، قلبيهم مع بعض ، غطي راسك بالفوطة وخلي بشرتك مواجهة للبخار ، لمدة 5 – 10 دقايق.
الطريقة 2: سيروم البشرة بزيت اللبان
هتحتاجي:
- 20 نقطة من زيت اللبان.
- 10 نقط من زيت الليمون.
- 10 نقط من زيت اللافندر.
- كام نقطة من اي نوع زيت ناقل (ممكن زيت زيتون, زيت جوز هند, زيت جوجوبا).
هاتي زجاجة صغيرة بقطارة ، وضيفي لها كل الزيوت العطرية ، واملي باقي الزجاجة بأي زيت ناقل من اختيارك ، اقفليها ورجيها لمزج المكونات ، استخدمي السيروم ده يوميا قبل النوم ، هيساعد على علاج آثار الشيخوخة, البقع, الندبات, والتصبغات.
4- زيت الورد لآثار الشيخوخة:
فوايده:
- بيساعد على تقشير وترطيب البشرة بشكل طبيعي.
- الزيت ده كمان مشهور بخصائصه المضادة للشيخوخة.
- بيساعد على زيادة مستوى الكولاجين ، وبيمنع آثار الشيخوخة زي التجاعيد والخطوط الرفيعة, بيساعد على علاج البقع العمرية, والبقع الداكنة بشكل عام.
- بيعالج مشاكل التصبغ ، وبيعزز اللون الطبيعي لبشرتك.
طريقة استخدام الزيت:
الطريقة 1: سيروم زيت الورد المضاد للشيخوخة
هتحتاجي:
- 9 معالق صغيرة من زيت الورد.
- 12 معلقة صغيرة من زيت الجوجوبا.
- 12 معلقة صغيرة من اي زيت اساسي تاني من اختيارك.
- زجاجة بقطارة.
هاتي زجاجة بقطارة اخلطي فيها كل الزيوت ، اقفليها ورجيها كويس لمزج المكونات ، وكده السيروم جاهز ، خدي كام نقطة منه ووزعيه على بشرتك كل يوم قبل النوم.
السيروم ده هيساعد على علاج مجموعة من عيوب البشرة زي التجاعيد, البقع الغامقة, تغير اللون وندبات البشرة.
الطريقة 2: مرطب للبشرة
هتحتاجي:
- 2 نقطة من زيت الورد.
- كام نقطة من الماية العادية.
امزجي المكونات كويس وحطيه مباشرة على بشرتك ، هيساعد على ترطيب بشرتك وهيمنع مشاكل الجفاف.
