طريقة عمل طاجن الفاصوليا الخضرا
زي ما تعودنا نشارك معاكم وصفات مختلفة ، النهاردة هنشوف مع بعض طريقة مختلفة لعمل الفاصوليا الخضرا ، تابعي معانا السطور الجايه واتعرفي على طريقة عمل طاجن الفاصوليا الخضرا بالصوص الابيض.
المكونات:
- 1 كيلو فاصوليا خضرا.
- 4 شرايح بيكون بقري ، متقطعين قطع صغيرة.
- ½ بصلة كبيرة مفرومة.
- 3 فصوص ثوم مفرومين.
- 4 معلقة كبيرة زبدة.
- 4 معلقة كبيرة دقيق.
- 2 ½ كوباية لبن كامل الدسم.
- ½ كوباية كريمة طبخ.
- 1 ½ معلقة صغيرة ملح ، او حسب الذوق.
- فلفل اسود حسب الرغبة.
- 1/8 معلقة صغيرة شطة.
- 1 كوباية جبنة شيدر مبشورة.
- شوربة فراخ لو لزم الامر لتخفيف الصوص.
- 114 جرام فلفل احمر متقطع.
- 1 كوباية فتات خبز البانكو.
طريقة التحضير:
1- قطعي الفاصوليا نصين ، اسلقيها في ماية مغلية فيها شوية ملح ، لمدة 3 – 4 دقايق ، وبعدين طلعيها من الماية المغلية ونزليها على طول في ماية متلجة عشان توقفي عملية الطهي ، ولما تبرد صفيها وخليها على جنب.
2- في طاسة على نار متوسطة ضيفي البيكون البقري ، وقلبيه لمدة دقيقتين ، وبعدها ضيفي البصل والثوم ، قلبيهم مع بعض لمدة 3 – 5 دقايق لو لحد ما البيكون يستوي والبصل يبقى لونه دهبي ، بعدها ارفعيه من على النار وسيبيه على جنب.
3- في طاسة تانية او حلة ، دوبي الزبدة على نار متوسطة ، وضيفي لها الدقيق وقلبيه كويس لمدة دقيقة لدقيقتين ، بعدها ضيفي اللبن والكريمة ، واستمري في التقليب لحد ما الصوص يتقل لمدة دقيقتين تقريبا ، وضيفي الملح والفلفل الاسود والشطة والجبنة الشيدر ، قلبي لحد ما الجبنة تدوب ، ولو حسيتي ان الصوص تقيل اوي خففية بشوية شوربة ، واطفي النار.
4- ضيفي للصوص الفلفل الاحمر ، وخليط البيكون والبصل اللي جهزناه في البداية ، وصبي الخليط فوق الفاصوليا المسلوقة وقلبي لحد ما المكونات كلها تمتزج مع بعض كويس ، صبي الخليط في صينية فرن ورشي على الوش فتات خبز البانكو ، دخليها الفرن على درجة حرارة 180 درجة مئوية لمدة 30 دقيقة او لحد ما الصوص يستوي والوش بتاعها يبقى لونه دهبي.
5- ممكن كمان كاضافة بعد ما تخرج من الفرن ترشي على وشها بصل مبشور متحمر.
6 - ممكن تقدميها مع فراخ مشوية ، وارز ، او مع بطاطس مهروسة.
