ميست يومي للحصول على بشرة نضرة ونقية وخالية من العيوب

لانعاش البشرة المرهقة بعد يوم طويل ، بتبقي محتاجة حاجة سريعة ومش محتاجة مجهود وفي نفس الوقت نتيجتها فعالة ، عشان كده النهاردة من خلال موضوعنا هنشارك معاكم طريقة عمل ميست يومي لبشرة نضرة ونقية.

هتحتاجي:

- 1 خيارة صغيرة مفرومة.

- قشر ليمونة واحدة.

- 2 معلقة كبيرة جل الصبار.

- ½ كوباية ماية مقطرة مغلية.

- زجاجة سبراي.

طريقة التحضير:

1- قطعي الخيار ، وقشري الليمونة واتأكدي انك تاخدي الجزء الاصفر بس من القشر.

2- حطيهم في بولة وغطيهم بالماية المقطرة المغلية.

3- سيبيهم منقوعين لحد ما الماية تبرد تماما وتبقى بدرجة حرارة الغرفة.

4- بعد ما يبرد غطيه ودخليه التلاجة طول الليل.

5- طلعيه من التلاجة وصفيه من خلال مصفى شبكية دقيقة لازالة الخيار وقشر الليمون.

6- ضيفي جل الصبار للخليط ، وصبي الخليط في زجاجة سبراي ، ورجيها كويس لمزج المكونات كويس.

طريقة الاستخدام:

بعد تنضيف البشرة ، غمضي عينيكي ورشي عليها السبراي على بعد 11 – 12 بوصة من الوجه ، قبل المكياج ، وممكن تستخدميه بعد المكياج كمثبت.

مع الاستخدام المنتظم هتحصلي على بشرة مشرقة ونضرة وخالية من البقع في وقت قصير ، بالاضافة انه بيرطب البشرة بشكل فوري.

وتقدري تخليه في شنطتك ، ترشي منه على مدار اليوم رشة سريعة كل ما تحسي ان بشرتك محتاجة ترطيب وانعاش ، يعتبر حل فوري وبسيط لبشرتك.

فوايد المكونات:

- جل الصبار: بيحتوي على خصائص مضادة للفيروسات ومضادة للبكتيريا ، ومرطب طبيعي للبشرة.

- الليمون: هو محسن رائع للبشرة وبيديها اشراق ونعومة ، الحمض الموجود في الليمون بيساعد على تنضيف البشرة وتفتيحها لانه بيساعد على ازالة الجلد الميت وتعزيز نمو الجلد الجديد ، غني بفيتامين سي المفيد جدا لعلاح البقع الغامقة, وبقع العمر, والنمش ، كمان فيتامين سي بيساعد على ابطاء الخلايا اللي بتنتج الميلانين في الجلد ، وده بيساعد على منع الجلد من الاسمرار والتصبغات.

- الخيار: ليه فوايد لا تعد ولا تحصى للبشرة ، عشان كده بيكون مستخدم في منتجات كتير للعناية بالبشرة ، الخيار بيساعد على شفاء واصلاح بشرتك ، وازالة اضرار التعرض للشمس ، لانه ليه تأثير تبريد رائع على الجلد ، وبيساعد على تنضيف المسام من الزهم الزيادة والاوساخ ، اية الخيار بتنعش البشرة الدهنية وبترطبها ، وده بينتج عنه رطوبة مثالية للبشرة وتوازن الزيت ، كمان يعتبر قابض بيساعد على تضييق المسام الواسعة ، وتونر منعش.