11 خدعة ديكور تبين المساحات الصغيرة بشكل اكبر
لو شقتك صغيرة ، ومساحات الغرف عندك عايزاها يبقى شكلها اوسع ، يبقى موضوعنا النهاردة عشانك ، هنشارك معاكم خدع ديكور اللي ممكن من خلالها تخدعي العين بأن مساحات الغرف اكبر من الطبيعي ، وخلق شعور بالمساحة ، واظهار البيت بشكل منظم اكتر.
1- خداع العين باستخدام الطلاء:
طلاء السقف, الحواف, القعدة بنفس لون الحيطان ، هيطمس الحواف وهيدي ايحاء بمساحة اكبر ، ولو عندك شجاعة اكتر وممكن تعملي ديكور جريء ، ممكن تعملي في السقف ورق جدران لجذب الانتباه.
2- اختيار سجادة كبيرة:
اختاري اكبر سجادة ممكن تشتريها للمساحة عندك ، بحيث انها تكون ممتدة بالكامل تحت الاثاث ، ده هيرسم وهم بالوسع وان المساحة اكبر.
3- سيبي مساحات فاضية في الرفوف:
لو عندك رفوف مفتوحة ، انتي مش محتاجة تملي كل المساحات الفاضية فيها ، ترك بعض المساحات فاضية هيدي احساس بالوسع ومش هيبقى الشكل زحمة ، ماتمليش كل بوصة في الرفوف ، ترك الفجوات دي هيخلق حاجة اسمها "المساحة السلبية".
4- خلي الاثاث بسيط:
الاثاث والرفوف اللي بتكون عالية وليها ارجل هتخليكي تشوفي مساحة ارضية اكتر ، وده هيديكي وهم بالمساحة ، كمان بننصحك تبعدي عن الاثاث الكبير "الضخم" اللي بياخد مساحة كبيرة ، بدل كده اختاري قطع بسيطة عشان تسيبي مساحات فاضية اكتر.
5- نظمي الفوضى:
عملية الترتيب بانتظام والتخلص من الحاجات اللي مالهاش لازمة هتخليكي تستخدمي المساحة المتوفرة عندك افضل استغلال ، اسألي نفسك هل انتي محتاجة الحاجة دي ولا لا؟ لو الاجابة لا ، يبقى اتخلصي منها على طول ، اتأكدي انك تعملي عملية تنضيف وترتيب مرة واحدة في السنة.
6- اعملي لكل حاجة مساحة خاصة:
اعملي لكل حاجة مساحتها الخاصة ، والمقصود هنا في درج, صندق تخزين, سلة ، لكن ماتتحطش على الارض ، ده هيخلي من السهل الحفاظ على الاسطح فاضية ، وده هيدي انطباع بمساحة اكبر.
7- اختاري الالوان المحايدة:
الضوء القوي هو طريقة مؤكدة لخداع العين بأن المساحة اكبر من ما هي عليه بالفعل ، استخدام الالوان المحايدة في البيت كله هيدي احساس بالوسع ، وممكن تضيفي لمسة الوان للغرفة من خلال الاكسسوارات.
8- خلي الضوء يدخل البيت:
الستاير التقيلة هتخلي المكان يبان اصغر ، عشان كده من الافضل اختيار الستاير الخفيفة الشفافة اللي بتسمح لدخول الهوا والضوء الطبيعي للغرفة.
9- استخدمي المرايات صح:
لو عندك مشكلة في دخول الضوء الطبيعي للبيت ، في الحالة دي وضع مرايا قدام الشبابيك هيعكس الضوء حوالين الغرفة ، بالاضافة كمان ان المرايا بتخلق بشكل طبيعي وهم بوجود مساحة اكبر ، عشان كده بننصحك تحطي مرايا في كل غرفة.
10- التخزين هو المفتاح:
التخزين مكن يبقى هو الحاجة الاكتر اهمية اللي المفروض تعمليها بشكل صح ، لان الفوضى الزيادة ممكن تخلي الغرفة الكبيرة تبان اصغر ، عشان كده استخدمي دايما التخزين الموفر للمساحات في الشقق الصغيرة ، زي استخدام السلات لتخزين القطع الصغيرة تحت السرير ، او فوق الدولاب ، او في الزوايا غير المستخدمة ، لو المطبخ زحمة استخدمي العلب والدواليب اللي بجرارات زجاجية لتخزين المعلبات ، ده هيوفرلك ي المساحة.
11- ضاعفي المساحة الموجودة جوه الخزانات:
ممكن كمان "تضاعفي" المساحة الموجودة جوه الخزانات نفسها ، مثلا حامل التليفزيون تقدري تقسميه رفوف بشكل انه ياخد حاجات اكتر.
استخدمي كمان مقسمات الادراج لضغط اكبر عدد من الملابس في كل درج ، واستخدام صناديق تخزين في الجزء غير المستخدم اسفل دولاب الملابس للاحذية, والحاجات الموسمية زي البالطو والجواكيت.
