ازاي تختاري الامبولات المناسبة لبشرتك؟
لو امبولات البشرة مش موجودة بالفعل في روتين العناية ببشرتك ، فأكيد انها لازم تكون موجودة ، لانها مليانة بمكونات قوية ، بتدي بشرتك العناية اللي محتاجاها ، ولو قررتي انك تدخلي الامبولات في روتين العناية بتاعك ، ولكن مش عارفة تبدأي منين وتختاري ايه ، النهاردة من خلال موضوعنا هنساعدك في اختيار الامبولات المناسبة لبشرتك.
امبولات البشرة تعتبر اختيار رائع لعلاج مشاكل جلدية معينة ، لان الامبولات بتحتوي على مكونات مركزة ، مع تركيبات بسيطة مصممة مخصوص لعلاج مشاكل جلدية محددة.
- البشرة الجافة:
لو بشرتك جافة زيادة دي تعتبر مشكلة جلدية ، وتعتبر الامبولات اختيار جيد لعلاج البشرة الجافة ، لان تركيبتها مرطبة بشكل عام ، وفي نفس الوقت خفيفة الوزن وسريعة الامتصاص.
في الحالة دي دوري في الامبولات على المكونات اللي بترطب البشرة بعمق ، وبتدي بشرتك جرعة ترطيب ، زي حمض الهيالورونيك.
- البقع الغامقة, بهتان البشرة, او لون بشرة غير موحد:
البقع وبهتان البشرة ولو البشرة غير الموحد ممكن تظهر لاسباب كتير ، زي اشعة الشمس, الشيخوخة, والامراض الجلدية.
في الحالة دي اعتمدي على الامبولات اللي بتركز على التفتيح وتصحيح لون البشرة وعلاج التصبغات ، للمساعدة في تقليل مظهر الجلد غير الموحد ، استخدميها لمدة 3 شهور على الاقل لنتايج افضل.
- الخطوط الرفيعة والتجاعيد:
اكيد الخطوط الرفيعة والتجاعيد هي جزء طبيعي من عملية الشيخوخة ، ولكن لو حسيتي ان علامات الشيخوخة دي ظهرت في وقت مبكر عن المعتاد ، في انواع مختلفة من الامبولات ممكن تستخدميها لابطاء عملية الشيخوخة.
دوري على الامبولات اللي بتحتوي على مضادات الاكسدة ، زي فيتامين سي ، اللي بيحارب الاجهاد التأكسدي وبيساعد على ابطاء علامات الشيخوخة المبكرة ، زي الخطوط الرفيعة والتجاعيد.
اختيار تاني كمان هو استخدام الامبولات اللي ليها خصائص مقشرة ، وده هيساعد على تجديد البشرة بمرور الوقت ، وتنعيمها وتنعيم مظهر الخطوط الرفيعة والتجاعيد.
- ملمس بشرة غير متساوي:
في حين ان لون البشرة غير الموحد بيكون في فرق في لون بشرتك ، ولكن الملمس غير الموحد فهو بيكون نعومة البشرة غير موحدة لما بتلمسيها ، هتلاقي اماكن خشنة عن اماكن تانية ، والنتؤات, علامات الشوائب, تقشر الجلد, الجفاف, او الخشونة بتساهم في عدم تناسق ملمس البشرة.
لو عايزة بشرة ملمسها موحد وناعمة ، فأفضل امبولات في الحالة دي هي اللي بتساعد على تقشير البشرة ، لان خلايا الجلد الميتة لما بتتراكم بتخلي ملمس بشرتك غير موحد ، وبالتالي التخلص من خلايا الجلد الميتة هتساعد على تقليل الملمس غير الموحد وهيخلي بشرتك اكتر نعومة.
