تونر طبيعي للتحكم في الزيوت للبشرة الدهنية اوي

التنضيف, والتونر, والترطيب ، دي تعتبر اهم 3 خطوات اساسية للبشرة ، كلنا عارفين اهمية التنضيف ، ولكن اللي منعرفوش ان التنضيف والتونر بنفس الاهمية ، وعلى الرغم من ان التنضيف بينضف البشرة لحد كبير ، الا انه مش كفاية للتخلص من كل الشوائب اللي بيمتصها الجلد خلال النهار ، استخدام التونر بيساعد على قتل اي بقايا اوساخ وشوائب على البشرة المنظف مش بيقدر يوصلها ، والتونر ضروري للاشخاص اللي بشرتهم دهنية ، لانه بيساعد على تقليل حجم المسام ، وبيعيد توازن درجة الحموضة لبشرتك ، وبيضيف طبقة واقية ، وبيخلق قاعدة مثالية لوضع المرطب ، تابعي معانا السطور الجايه واعرفي طريقة عمل تونر طبيعي للتحكم في زيوت البشرة.

هتحتاجي:

- ¼ كوباية من خل التفاح.

- 1 معلقة كبيرة نعناع مجفف.

- 1 معلقة كبيرة نيم مجفف.

- ½ كوباية ماية ورد.

- 2 – 4 نقط من زيت شجرة الشاي.

- 1 كوباية ماية مقطرة (لو احتاجتي).

طريقة التحضير:

1- هاتي برطمان زجاجي نضيف ، ضيفي فيه خل التفاح, النعناع المجفف, النيم المجفف.

2- غطي البرطمان باحكام وسيبيه من 1 – 2 اسبوع في مكان ضلمة وبارد.

3- ورجي البرطمان كل يومين لخلط المكونات.

4- بعد المدة المحددة ، صفي مركز الخل في برطمان تاني نضيف.

5- احفظيه في التلاجة هيقعد معاكي كذا شهر.

اساس التونر:

- هاتي زجاجة ببخاخ ، املي نصها بمحلول خل التفاح المركز اللي حضرناه فوق ، وضيفي نفس الكمية ماية ورد وكام نقطة من زيت شجرة الشاي او اي زيت اساسي من اختيارك.

- اعملي اختبار حساسية ، لو حسيتي انه قوي على بشرتك ، خففية بالماية المقطرة لو احتاج.

- رجي المزيج لدمج المكونات ، ورجيه قبل كل استخدام.

على حسب نوع بشرتك تقدري تظبطي مقادير المكونات.

- للبشرة الحساسة:

املي ¼ زجاجة السبراي بمركز خل التفاح ، ونفس الكمية ماية ورد ، و 1 – 2 نقطة من زيت شجرة الشاي ، واملي باقي الزجاجة بالماية.

رجيه لدمج المكونات ، ورجيه كويس قبل كل استخدام.

- للبشرة المختلطة:

املي 1/3 زجاجة السبراي بمركز خل التفاح ، وكملي بنفس الخطوات اللي قولناها فوق.

للبشرة الدهنية/المعرضة لحب الشباب:

املي ½ زجاجة السبراي بمركز خل التفاح ، وكملي بنفس الخطوات اللي قولناها فوق.

طريقة استخدامه:

- بعد غسل بشرتك ، رشيه على قطعة قطن وامسحي بيها بشرتك.

- سيبيه لحد ما بشرتك تمتصه كويس ، وبعدها حطي المرطب وكملي باقي روتين العناية ببشرتك.

استخدامات التونر المختلفة:

- تقدري ترشي منه بعد التمرين لعمل ريفريش للبشرة لحد ما تنضفيها بالغسول.

- رشي منه على الابطين لتوازن البشرة بعد التعرق.

- خل التفاح مع ماية الورد بيساعد على تحقيق التوازن بين مستويات رطوبة البشرة ودرجة الحموضة ، وده بيسيب البشرة اكتر نعومة, واقل دهنية, واكتر تغذية.

- يعتبر مقشر لطيف للبشرة ، احماض الفاكهة الموجودة في الخل والخصائص المنقية لماية الورد بتساعد على تقشير البشرة بلطف من غير استخدام مواد كيميائية قاسية.